Ivan Dobra Žirjanin
Parića san ča bi u valižu stalo:
par gač, ništo košulj, kapu i postole,
šudare na cvite, i libro još malo.
To su sve te, majko, moje puste kole!
Nisan puno više ni unda onija
ka’ san mora tebe tamo ostaviti.
Molila si Boga da bi se vratija
i da tote mogu lipo ostariti.
Molija san s tobun i Gospu i Boga,
i Svetog in Sina Krista Mučenika,
da ublažu patnje života mi moga,
pa da rečen svemu: Zbogun mi, Merika!
Mene čeka školj moj na najlipšen moru
di ću isti pupu, a ne gristi koru!
