piše: Đurđa Vukelić Rožić
Pondelek je. Ob sedme vure vjutro zajni auto se odvezel z našega dvorišča, dva su otišla čera. To su ona deca kaj denes v jutro ideju na posel ili vnuki v školu. Bili su doma od petka i sobote, kak koji. Jožekov osemdeseti rojsni dan!
Još dok sem im z mosta mahala, frkala sem rukave i brže bole, baba, sad se zorganizeraj i primni se posla, da ne misliš kak je dom pust bez dece. Prvo podoji kravice i pošni slavlenika žnjima na pašu. Onda reši mleko i operi dojače, metni pune čupeke na banjek na toplo naj se mleko skiseli. Prazne operi i natekni na prlke. Vrhnja se pribralo vu frižideru, bu treba stepati puter, čim se vlovi malo cajta. Treba obed pristaviti, finu kokošju juvicu z puno peršuneka, mrkvice, frtal kolerabice, celer, listek zelja, pol lista kelja, list vegete (miloduh, luštrek, ljupčac, selen, op. Ifkica), da se malo počinemo od kolača i mesa. Deci smo dali od vsega pomalo za domom, naj obaviju dan bez kuvanja. A još je ostalo.
Ak za osemdeseti rojsni dan nemreš naraniti svoju familiju, ona narani tebe. A ak nemaš z kem podeliti to veselje i koga počastiti, dudiš v svoje špilje sam, onda bolše da ga nesi ni doživel. Tak je pokojni stric Vladek znal reči, a on je na paši z blagom navek čital knige, koje je nosil z knižnice v Zagrebu, blizu skladišča gde je delal kaj nočni čuvar. I tam je imel cajta za čitanje kak i vu vlaku. Pribral je i nekaj od narodne mudrosti i dosti toga ze svojih greški i greha.
Ostavil nas je v svojemu devedeset i drugom letu, a skoro pedeset let je živel sam. I još bi bogec stari bil z nami da ga ni brzi cug pobral, ni dedek baš dobro čul ni videl. Tvrdoglavi kakov je bil, ni štel nositi očale, a ni slušnega aparata. Bi si negdo mogel misliti da je ostarel! Tej put je išel z kolmi na pijac, vozil je krumper i grah za prodati. Konjeki su stali pred štrekom gda je vojke zategel, ali su se vlaka splašili, vlakovođa je trubil kaj bedasti. Stric ni stigel kočnicu povleči, konjeki su pobegli na štreku. Lokomotiva je zagrabila i otrgla kola, a konji, rudo i vageri su prešli v Dolnje Moslavačko Selo. Kaj je najgorše, tu prekletu rampu tam još nesu dendenes naredili, a i mi smo ostareli! Sramota.
Dok sem išla z štale z dojačom punom mleka pred me je dobežala mačka i nejna četiri miceka: Astra, Nikita, Đoli, ĐejLo, čini mi se. Vnuki su mi to zapisali, nikak zapametiti. Vse su bila ženska imena, a nesem se štela mešati. Deca su im bili kumi, a miceki kaj miceki, kaj je briga za ime. Če se ima dobro jesti i lepo, toplo mesto za spati, mišekov kolko treba, moreš je i kokoš zvati. Am sem se skoro i popiknula na nje, tak su je deca ta tri dana razmazila. Prvo su je iskali po senu i vsekud za njima puzali, imala sem straha da im se kaj ne stane. To su gradska deca, malo nespretnoče i ve ti ga na, zlo ne spi. Gda su je našli, natezali su je i igrali se žnjima, je mačka sirota posedela od brige. Sad gda su deca prešla proč, miceki očeju da bi je ja zabavlala, a gda?
Friška juvica je prelepo dišala. Čeri i snehe su vse suđe i pode oprale, veš speglale, stoljnake, salvete i kujnske krpe smo hitile vu vešmašinu, ali još navek je bilo vsega svud razvlečenoga. Rešila sem da bum kujnske elemente dobro oprala i počistila sad gda je večina tih plastičnih škatulic otišla z decom v grad, servisi su zvlečeni van i ranjgle. Foto albumi su ostali na kavuču i stoleku v boravku, vsaki si je zel sliku koju je štel, su rekli da je buju na rengen deli, snimili i onda slali jeni drugima. Če me metnu na društvene mreže, me buju čuli. Imam ja kuhače za nihove riti…
Tu su bile šlape, valda deset pari, to sem posložila v škatulu i odnesla na ormar v prvu sobu. Ja računam da si doma tam gde te čekaju šlape. V te su sobe negda naše čeri spale i vučile, a sad je tam stare krame za neveruvati. Cipel, kaputov, vse kaj deca zguštiraju i nemreju obleči, slažu po ormarima i stelažami v staromu domu. Zlu ne trebalo. Vnuke tam zajdu i prekaplu kak da je to rudnik zlata. Sad je pol toga po postelama rashitano. Kak se moda navek vrača, sad su si dekle kojekaj zebrale da budu kombinerale z novim, zoveju to vintage moda. A gdo zna jel je budu. Valda dizajneri imaju kuršlus v glavi pak nemreju nekaj originalno zmisliti, nek zvlečeju ono kaj je več prede prevereno i uspešno bilo. Pak to prodaju pod najnoviji svetski prestižni hit.
Nekak sem priredila sobu i kujnu. Noklice omesila naj odstojiju, samo je zakuvam gda se Jožek vrne z blagom z paše. Brisala sem prašinu na stoleku v čošku, do kauča, kad tam, pod njim je plosnata škatula z prelepom slikom velike plave vode, kaj bi rekla da je morski zaljev ili jezero, hižice onak na kat, z puno oblokov i balkonov, šarapolki, a fasade v sem farbam, kaj da je duga suze pustila na tej mali grad. Vse je puno cvetja i cvetućih grmov. Za gradom, a more biti da je to evuropsko selo z dvajstprvoga veka, sedela je gora, skoro kaj pol Slemena. Otprem i vidim na denu škatule – pol slike posloženo, a pol ni. Puzzla!
Sednem i počnem pikati. Za čas potrefim komadič balkona z grančicom oleandera deti na mesto. Zemem očale i mam opazim komadić vrata, del čamca i pesov rep kam trebaju iti i složim je. Išlo je to meni. Lepi osečaj, ze kaosa narediti red. Am sem se tak pametno osečala, za neveruvati! A zaprav, celo živlenje baš to delam. Decu, Jožeka, marvu… vse moram vrnuti na nihova mesta naj bi vse štimalo. Zgubila sem osečaj za vreme, kad, čujem kravice mučeju, Jožek nekaj kune! Brže bolje zaprem puzlu i skrijem pod stol, gore hitim stolnjak. Bežim dolejati vode na juvu, nahajcati šparhet, zvaditi pečeno meso od čera z frižidera, da se malo prigreje na toplini kujne, zvadim grah-šalatu da ne premrzla i beš van zvleči vodu v kopanju.
– A gde si ti, Ifkica? Celo vreme te zovem z livade, ne javlaš se na mobitel.
– Am sem pospremala.
– Pak su cure vse priredile i oprale snočka. Vse je bilo čisto. Kaj si pospremala?
– Si bil v prve sobe? Si videl kaj su vnuke razvlekle z ormarov i stalaže? Šlape, kape, samo Bog zna kaj je tu vse bilo. Staru robu su sprobavale.
Nekaj je štrmlal, mumlal i šlabekoval sebi v brk. Ja sem zaprla velika vrata na pole, brže bole zakuvala juvu. Noklice od griza su tak uspele, ko zmišlene, topile su se v zubima! Na brzinu sem naredila popis i posle obeda Jožeka otpravila v dučan, poloprivrednu pateku po seme bele detelice, i onu običnu bolšu selsku pateku. Treba još i v kemijsku čistionu otiti i diči moj kostim i njegvo svetečno odelo. Pri šnajderu Zlatku Srebačiću v Ivanić, ostaviti Ljubičin baloner, se podstava rasparala gda je išla z auta van i priprla ga z vrati. On je tak dobri majstor da to ni za veruvati, vse probleme reši z iglu i koncom, a voli si i popripovedati z mušterijom. A popevle, kaj slaviček! Dale, kumi Jagici treba zaisput odnesti nekaj mesa i kolače, nemremo mi dva vse kaj je ostalo od vikenda pojesti celi mesec. I ima navrnuti se kumu Poldrugaču, kupiti pet litri crnoga vina zetu za feštu na poslu.
– Ifkica, am kaj je tebi, pa me ne bu doma celi dan!?
Posle jela otpravila sem Jožeka na zadatke i čez obluk gledela kak se z autom zvaža na cestu. Zaklučala sem hižu i ostavila kluč v brave, na kvaku od ulaznih vrat sem obesila praznu kantu od pocinčanoga pleha, naj bi čula gda se vrne. Navlekla sem firunge, zvlekla šest flašic z kiselim vugorkima i paprikom na stolek v špajzi, odnesla tam vandlin z vodu i krpu, tak da morem gazdi reči da sem špajzu pospremala, i brže bole nazaj k puzli! V špajzi, vu prazni žbanjici od masti imam skritu flašičku Skenderbeg konjaka kaj mi je suseda Pepica dala gda joj je familija došla z grada. To sem zvadila i dela sredi stola. Bum Jožeka znenadila, ne bu se ni setil pitati kaj sem imela celi dan v špajzi za delati. Malo mita ne škodi.
I – nazaj k puzli!
(Priča je objavljena u zbirci “Ifkica kaj Ifkica”, 2022.)