autorica: Đurđa Vukelić Rožić
Iz zbirka “Ifkica za 55”
lektorirala: Ivana Cerinski, prof
Zima je išla kraju, conjki snega su se vlekli po dvorišču kak rashitani komadi gúna. Z dana v dan ti znucani dronjki bili su vse menši, a nihova zmazanoča vse zmazanija. Zmed te kerpic zime kaj se komaj zatrajala, v kalcem bistre vode leščila je i lukala na svet zelena trava kraduči mi joči, pozdravlajuči to malo zimskoga sunčeca.
Celo dvorišče bilo je puno otiskov: šapice, papki, kopita, potkove, kandže, čižme, tačke, trakač, beciklin, traktor, platon, vrapčje i kokošje nogice, stočkano z klunima živadi. Gdo bi znal kaj i gdo se tu ni potpisal. Celi roman za čitati o selskom sirotinjskom imanju. Te trage bi detektivi tajne službe imeli za istraživati bar pol radnoga veka. Koja je kokoš bila naša, koja Marekovićkina v poseti lavoru z kuruzom, ktera se dotepla z Rendulićevoga jata. Koji otiski pripadaju koje čučice. Ili race, morti racaku. Skopale su kanale po blatu gda su s klunima gablec iskale. I guske imaju plavajuče kože, ali su nihovi tragi vekši i glibje prepadnu, su težeše. Gda se vse to prek noči smrzlo, bili su to reljefi, hijeroglifi i umetnička dela od neprocenjive i neponovlive vrednosti. Zakaj bi tajne službe istraživale vse to? Jer su to dokazi zločina, stalno je nekoga gazil, lovil i žral.
Vnukova cura, a nikak nis mogla zeznati od česa živi, slikala je umetnost naše živadi i marve v kalu, bi reči fotograferala je smržnene blato i koječiji i kojekakvi the poop (drek, op. Ifkica). Gda ju je na dvorišču vidla kak se vleče za strojem z pol metra objektiva, Krivušićka me je nazvala i veli da jel znam da je to umetnica ta i ta, i bome mi je napripovedela cele romane. Imela je izložbe fotografij v Rovinju i Zagrebu, Beču i Londonu. Nagrađivana umetnica. „Nejni muž Ratko je pajdaš z mojim sinekom, imaju stan v moje stare zgrade v Zagrebu. Ide od cveta do cveta, gde slajše, tam dugše. Žal mi je tvega sineka, al to je tak“. A ja, da bi reč rekla. I kam baš nevola od Krivušičke mora svoj nos rivati kam treba i ne treba!
Gda su deca prešla proč, suseda Gajgerica me je zvala i veli da joj se čini da je tu gospu slikaricu videla pri kleti Mireka Trnorušca. Veli i tam se prenavlala ze foto-aparatom, a on je roštil pekel i bome i nju okretal, a ne na gradele, pozabeči da klet nema firunge.
Vnuk se je posle falil kak je naredila izložbu ze slikami blata i poopa na našemu dvorišču v Grazu, i dobila je dobre kritike. A on kaj dete, presrečen! Držim, vsi su se bojali nekaj reči jer nigdo ni zaprav razmel kaj to je. Posle je imela izložbu teh isteh originalnih slik v Pragu i prek kanalca, v Engleske. Prodati čak ni smržneni pačji drek, več same negvu sliku i to pet put, bome je to treba znati! A gdo su ti lubiteli umetnosti kaj se dive bokčijskomu dvorišču? Morti se moglo reči da su račji tragi zaprav stupine nog snežnog čoveka, ak su snimleni z pravoga vugleca v pravom momentu vu odnosu na Kumovu slamu, oblake i položaj Zemle spram Suncu. A to je valda bilo gda se umetnica popiknula na čuču kaj si je pred num čučnula i naša je umetnička fotografkinja opala v blato. To je onda bil pravi perfomans pred štalum. Valda je kokoš mislela da je dekla šari pevec v onim risanim tajicam, a ak očemo po istine, nesu ni čučice kaj su negda bile. Gda je k sebe došla, dekla se stuširala i preslekla v trenirku kaj ju je našla v ormaru, od naše dece, nazula je moje čižme da pe slikati svoj otisek v na pol odmržneno blato. Zmazani veš je porinula vu vrećicu skupa z obuču, zebrala si je tenisice na tavanu i to je bilo to.
Posle sem čula da je prodala slike i kupila si novi avuto. I tak, penezi leže v blatu, a malo ko se zna popiknuti na nje. Naš se vnuček uspel zalubiti v lepu mladu doktoricu, pokojnoga Franca Tušeka vnuku, išel je k nje na pregled i borme su se sistematski zalubili. I mam je cela familija zdraveša!