ŠTORIJE IZ MALOG MISTA
piše: Jadran Šantić Šangarelo
E judi moji svašta na ovemu svitu.U ovemu momen burnemu životu vidija san svašta, svakakvi judi lipi i nakazni, svakakvi beštij, svakakvi rib, a bome san i neke čudne i ulovi …ka ća su kostorog, kojega san na ušću Neretve ulovi 88. Godine, pa onu tanku dugu mačetu, kojojn se srebrena boja lipi za ruke, koju san ulovu u Satrogorskoj vali 96. Ma gospemi ovako čudo još nisan vidi, a nisan ni čuja da niko o temu pripovida.
Ma da nije slik nebi bome ni sad virova. Dunkve …o čemu se ovod radi? Moj dragi prijatej Osvit Radić …o kojemu san već pripovida, je jedan jako smišan i interesantan čovik. Po porjeklu je naš bliski vlaj iz okolice Vrgorca iz sela Kotezi. I po ocu a i po materi …ma jopet kako je rojen u Gradac more se reć da je fetivi Gračanin. I ti moj prijatej, je jedan jako vridan čovik …posadi je puste vinograde …bavi se verduron, a kad nije u vlašku na zemji …onda je po cili dan u ribarščini.
Nesmin zaudobit i ne reč da je uporan ka jazavac kad je na more. Muku ti ježovu ..ne vraća se doma u porat, ako nima ulova …pa sad more past i debeli mrak …moredu cipat kaluni ,more i nevera učinit sa kišon …ma on se uvik vraća sa svojon staron i derutnon pasaron o4 metra i sa lipon porcijon …oli liganj …oli ribe …ma zna puno puti bit i mišano.
E da ne dujin …pri nikoga vrimena se vratija sa ribarščine u porat i vezije kajić. Pitaju ga kibici jema li ća, a on grintav brontula sebi u brk …jema, jema ..ma posve malo i izlazi na rivu iz kajića.
U temu momentu jedan kibic sa rive ugleda da ništo dugo visi zalipjeno na dno o pasare i pita ga …an, a ćatije ono ispo broda? Ošerva se moj prijatej Osvit i zablenija se ništo visi i koprca se u moru. Vrati se on u pasaru i rukon pokuša uvatit to čudo ća se koprca …ma gospemi neće da se odlipi. Kako ni jema rukavice, a jema je jednu šporku kanavacu, kojoj se kolur ne more odredit, a gospe mi ni starost …jerbo on šnjoj tare ruke posli skidanja ribe sa udice i nikako je ne pere tako da smrdi ka kuga i kolera.
I s njon je ćapa tu zvir i odlipi je o dna pasare. Kad tamo jema se ća i vidit nika beštija …tila ka ugor …ma misto just niko okruglo čudo, o justa puno strašni zubi, a žvale tri prsa široke.
I unda su počele barufe od oni dežurni pametnjakovića ća sve znadu, e to je to …ma nije vengo to …i skoro su se zakarali …ma moj je prijatej bi pametan i tu zvir je odni doma da prvo se slika s njon na rivi u portu ispri svojega lokala Naše malo misto. Sutra se od oceanografskog instituta u Splitu, a bome i priko one sveznajuče tražilice interneta, doznalo da se radi o nikoj čudnoj beštiji kojoj je ime Morska paklara.
E poza tin, skoro cilu šetemanu se padale zajebancije na račun moga prijateja Osvita Radića, da mu se ta neman …ta zvir, zalipila za pasaru, jerbo na dnu jema trave školjak i svakakvi pizdarij i jerbo pasaru ni ostruga …i da jon intonit ko zna koliko godišć …i da je ta zvir parazit i lipi se za svašta za male i velike ribe, pa lipo i komodno žive grickajući i ćićajući svoga domaćina, oliti prisilnoga dobrotvora.
Kako me je muka natirala da i ja jeman kompjuter malo san se zabavja oko tega da znan više o tioj beštiji, pa san doša do zakjučka da se ta beštija skalala u more iz Neretve di se mristi i reste, jerbo jon triba ladnija voda …puno kisika i pržina di odlaže larvu, pa kad nareste unda se skalaje u more i to uz obalu di traži žrtve.
Ti moj prijatej Osvit mi je da i dvi slike i ka prave dokaze morete vidit štioci dragi o kakvoj se zviri ovod radi. Šoma delašoma to bi bilo sve.
Sritni i veseli bili …pozdravja vas vaš morski čovik Šangarelo.
Ča je, je. Prava beštija.