piše: Jadran Šantić Šangarelo
Evo judi moji uvatila me velika lampa i moran van ispripovidit ovo ča mi se dogodilo, a more bit i da san sanja ko če ga znat.
Cili san svoj život na more i oko mora a najviše na ribarščini i to dok san bi mlaji stalno san odi šoto mora sa raznin puškan a najdraža mi je bila Maresova midi i mini Sten. To su van po meni dvi puške na ariju koje su najboje lovice u rukaman prav ega meštra, jerbo su jako okretne a to je zato ča nisu duge vengo kratke, ma jemadu itac ka karabini vanka.
Uz to ča san stalno ronija a zbog čega me je prva pokojna žena znala proklinjat, a posebno liti jerbo bi ja otiša kvragu pod more kako je ona govorila a ona je morala bit sa dicon na najlpijon plaži na svitu na ušču Neretve. Ma koja Copacabana? Ka da jon je bilo loše, a?
Kad su dica podnaresla tili su i oni mulci na ribe i onda ajmo Pape mooooolin te i tako dok mi ne dopizdu a ja onda ka grintav (a drago me sa dicon bilo ić lovit) samo bi ka zabrontula da ona ne vidi da ja i u toj ribarščini guštan i onda bismo sa tri šćapa pošli lovit doli na ušče Neretve velike Glamce još veče Arkaje joli Ovčice kako ji doli zovedu puste male Oradice oko 15 deki znalo se ulovit i kojega velikega Pauka tako da se nikad ni odilo doma bez barenko 2-3 kila ribe i kako san zna da če bit ronjanja kako riba ni očiščena a ona je nezna i ne voli čistit ja bi per la finta da mi ni teško na more očisti svu ribu. A sa svakon san ribon orija beštimje.
I tako su se izminjivala lita u Opuzenu na riki i na Ušču, u Komiži na Visu, u Ubliman na Lastovu, po cilemu Braču i Šolti a napose u Stari Grad na Hvar di mi je bilo najdraže, i tamo san lovi največe lignje a uvatija san i prvi mač od skoro dva i po metra kojega u ono vrime niko ni ni vidi.
U temu momen mlajemu ribarenju največa riba koju san ulovi je bi lubin o 8 kili kojega san puškon potega na Ušču Neretve u prevoznici kraj donje brane. Zna san donit iz ribarščine i po 30 kili ribe sa parangala posebno ugori, jedan put san sa mojin dragin prijatejen Krišton na parangal zahvaljujući njegovoj ješki uvati četri orade ukupnega piza 12 i po kili. Jedan put je meni i rođaku od moje žene Đoki sa izgubjenega parangala (a to je druga štorija) uteka lipi bome čukov od cirka 7-8 kii.
Dva puta san lovi iznad jednega potopjenoga broda u naše malo misto Gradac i skoro san najeba jerbo me ništo vuklo doli a ja nisan da i tako san slomi dva ščapa koja su mogla podnit po 60 kili piza. Svi govoridu joli Murina velika, joli veliki Ugor i za živo čudo na temu mistu ronidu šporski roniteji na ariju i rekli su mi da su vidili ugora koji je oko vrata debel u promjeru priko 25 centi. Na udicu sa ščapon nikad nisan ulovi ništa spektakularno osin jedne lampuge od 2 kila i strelke od 3 kila, a e sitija san se da san jednon uvati i bilizmu na žIvu bukvu od 6 kili i to je sve.
Puno san se puti pita ča san bogu zgrišija pa ne mogu ulovit velikega Zubaca od 8-10 kili joli barenko istega Pagra a da o velikin arbuniman od kila i više i ne govorin. Kako san bi nikidan u Londru 10 dan i nisan često moga pratit moju ženu u osvajanju Londre osta bi doma sa njezinin rođakon Zoranon gledat TV i skoro svako pozapodne bi zaspa.
Gleda san tamo nikoega čombu iz Australije koji lovi i molaje nazad velike ribe, došlo mi je da ga skalamaštran. Judi moji koje su to ribe za narizat na fete i šnjiman na gradele pa prolit lipin našin maslinovin ujen i zalit crnin vinon a on je lipo pojubi u sri just i šnjon nase u more.
Mislin da san u toj jutnji i zakunja pa san se poza nikega vrimena počeja budit i vikat na moje sinove Lucio, Vibore držite krenu nedajte da uteče, sad kontraj makinjon u šiju sad bome polako naprid i nedaj da gre pod kajič jerbo če propela prikinit i zagucat krenu pa smo onda najebali i tako u svoj toj dreki san se upotija ka gola voda.
Meni se činilo da je bitka sa ton „NEMANI“ trajala cilu vječnost i unda san se naša na ovemu svitu vas mokar o znoja rasparani rukavi od košuje umoran ka da san kopa i promuka ka da san do besvisti druka za Ajduka, a najgore je bilo ča san vas bi izgranfan po rukan i po licu ka da san vodi bitke sa najjučin zmajiman a da mi se ovo ni dogodilo u samemu srcu Londre na Covent Gardenu mislija bi da nisan sanja vengo da mi se stvarno dogodilo.
Čujen da u banju toči voda i promisli san da se Zoki tušira a kako je i on ka i ja gluv ka top promislija san da ni ništa čuja ka ni nije. Kad je izaša iz banja razrogači je oči i vas u straju pita a ča ti se dogodilo joli je ko provali u stan pa si se pobija? Nije Zoka moj vengo san zaknja i ništo san sanja. Gleda on mene i ništa mu nije kjaro a žena kad me vidila poslin šetnje po Londri skoro je afanalo.
Sutra dan Zoka je iša ujutro ranije po novine i kad se vrati doma vidi san da je cili nervožast i in fotan a unda u vas glas udri name, an zaknja si i ništo grubega sanja a susidi me zaustavjadu i pitadu ko se ono u mene u stanu tuka da je cila kuča bečila od vike. Mora san mu sve ispripovidit ma nisan to triba učinit jerbo kad san završi njega je uvati luđački smij da miu je skoro pozlilo i tribalo ga je prolivat vodon da dojde sebi.
Mislin se ja i pitan triba li se otić judiman u kuči škužat a moj ti Zoka opet prasne u smij pa mi kaže ne triba jerbo mislin da čemo se ovod u Londri na tvoj račun dugo zajebavat. Sve san to prihvatija i kako san se u Londru osramoti ma još van nisan reka ča smo moji sinovi o ja u temu momen snu uvatili, uvatili smo tunu koja je pizala oko 45 kili pa mi ni unda ni žaj ča san diga naku dreku ma da je to zapravo diza bi ja i goru.
Eto svašta se živin judiman događa ja san barenko u snu ulovi na udicu ribetinu ma kako još nisan u dubokoj starosti a još san i dobro žvelat možda mi se i na javi posriči da ulovin čako veliko dok ne partin gori na istinu ma ja ču i gori noist moje arte za ribanje.
Ako mi se posrići sve ču van lipo spjegat.
Zagreb 09.12.2014 god