E prav za prav ajmo mi malo u nike analize ča bi se stručno reklo
piše: Jadran Šantić Šangarelo
Kako van se nisan dugo javija jer su se događale raznorazne fortutime oko mene od operacjuna očiju do lipe đite po Portugalu, nisan van ni moga ništa nova spjegat. Ma sad san se vratija doma i počeja sa nikin falšin očaliman iz DM-a od sto kun lagašno čitat pa evo bome i notavat čako na kartu oliti u ovu makinjetu.
Ujutro kad se ustanen i pojin čakod ča mi žena spremi odma siden na katrigu ispri laptopa i čitan Jutarnji list na internet. Ma gospemi jema svaki pizdarij da prostite u njemu, od kurbaluka do šporke pulitike …sudski procesi i zatvorske glume sa golf palicaman, pa do razni politički spletki kojima diriđa veliki meštar iz Mostarskega zatvora.
Sve se mislin ča bi bilo lipo i juski za ošervat se a ono jutros ka šaka u joko Saborski kafić ne izdaje fiskalne račune. Štijen ja to štivo i pari mi se da je puno više napisano nevidjivon tinton između redaka vengo u onemu ča se vidi.
E prav za prav ajmo mi malo u nike analize ča bi se stručno reklo. U temu famoznemu kafiču kojega je otvorila prva vlast u lipoj našoj, odma je bi toliko nakaradno zamišjen da ga je tribalo još unda zatvorit.
Zašto, a bome zato ča je več unda dava pravo svin saborskin zastupniciman oba doma da uz, ionako velike plače i beneficije svi vrsti, jemadu i svoju radničku menzu sa smišnin cinaman za koje nisi nikad moga kupit u butigu kvarat o kila kruva, 20 deki mortadele i malu biru pa obidvat.
Ka prvo moran reč da je u štartu sve lipo zamišljeno …sabornici radidu velevažan i ozbiljan posal, stalnu mučidu možjane važnin pitanjiman o državne važnosti, trošidu velike kalorije i normalno je da moradu čakod izist.
E tu sad leži zajeb. Kako se od sabornika u štartu stvorila povlaštena kasta i dalo jin se velike šolde bilo bi bezobrazno da jin se sad od ti šolad vazimje velike pineze za platit obid u saborskomen kafiču, jerbo kad su več povlašteni unda neka budu skroz i dajmo jin da budu kategorija manjamukte, a kako to u narodu ne bi zvučalo lipo niko se salamunski dositija da jin se naplati nika sramotna crkavica pa da se more reč …eto čaje pa i oni plačadu ča poidu.
Kako su te sramotne rabote nastavjale sve vlade pa i ova ča je puno kukurikala po svomen dvoru pa od muke zamukla a poslin uredbi šjor Linića koji je uveja fiskalizaciju na vela vrata nije istu uvela u kasu saborskega kafiča, odma je judiman palo to u joko.
Moran bit jako kritičan i poručit tin politikantiman da kako ji ni sram vlastitega naroda i dok se ztvaraju razne butige zbog dvi kune manjka joli viška u kasi vaman GOSPODO sram ne dolazi do đon obraza i ne samo ča jidete ka kraji oli cari i to mukte, vengo ne poštivate vlastite zakone, vengo raznin smicalican izbjegavate i kredete to malo poreza ča bi išlo u Liničevu jadnu blagajnu.
Znan da ne bi bilo dobro da napuštate zgradu sabora radi obida i da grete vanka jerbo bi zbog tega patija posal ma kako vas ionako nikad nima unutra radi razni kvorum,a a niko ne zna diste ti bi kafič tribalo zatvorit.
Ma jopet mislin da bi ga tribalo pritvorit u restoran sa ekskluzivnin cinama alpari vašin plačaman pa vi unda jite unutra a bome i platite poštenu cinu i to sve po zakonu priko fiskalne blagajne pa mislin da bi unda velika večina vas dolazila u sabor sa sndvičima koje van sparičaju žene doma.
Tija bi ovi dil mojega notavanja završit porukon: GOSPODO SRAM VAS BILO!
Čita san razne napise od moji dragi novinari Dežulovića i šjor Ante Tomića i moran reč da su pogodili i sve juski napisali a da jin je usputna kritika upučena na sve adrese puna gorke istine.
Tomić je taka u osinje gnjizdo kulture i istaknija totalnu nepismenost naše mladeži ma jopet mi ni jasno kako ta ista mladež svaku godinu gre u razred naprid. Mora bit da su jin profešuri još nepismeniji od nji a more bit da i dalje dilidu ocjene priko mita i korupcije.
Ja se sičan iako je bilo davno da san jema obilati popis naslova za lektiru kao u osnovnu tako i u sridnju skulu i da nisan jema šanse čakod priskočit.
U ona vrimena čak san mora i sastave o tin nasloviman sastavjat i notat u školske velike zadače. Danas ne da ne znaju ko su bile madam Bovari i Šjora Ana Karenjina o kojiman nota bene piše naš Tomić vengo niki misle da su to samo naslovi od filmov koje oni i tako ne gledaju.
Judi moji ja nisan pametan i više neznan ko smi govorit o višestoljetnoj kulturi u Hrvata kad nan je kulturna nadgradnja ravna nuli.I u znanju se moran dotaknit i našega spliskega poteštata šjor Baldasara. Štovana Snježana Pavić je lipo u foje notala uvijenu kritiku šjor Baldasaru, jerbo je zabrani trubačkomen sastavu u svitu poznatomen iz Kočani u Makedoniju da sviri u Splitu jerbo mu se to po njegovin VISOKOUMNIN standardiman ni uklapalo u program na spliskoj rivi.
Uvik san misli da dok u Splitu nima poteštata od kolina da če moj Split odit nase i to koraciman mačka u čižman ma i ovi Baldasar me skroz snerva svojin poteziman od zabrane privezivanja lipi jahti uz zapadnu rivu pa do ovega gafa sa trubačiman iz Makedonije.
I dok su ti trubači zabavjali svit svojin sviranjen u Pariz, Londru i druge velike svitske metropole …oti naš pametnjakovič jin ni dopusti da sviraju na spliskoj rivi da je nebidu izneredili a i onako je jadna.
Ja ovod sa ovega mista šajen apel sviman u Split a bome i cilu Ervasku da se zakonon zabrani svaki turbofolk i svaka šund muzika a da se vrate lipi šlageri, starograjske pisme i bome naše dalmatinske narodne ,a da van rečen niman ništa ni kontra naši slavonski, zagorski, prigorski i ni ostali Ervaski lipi skladbi.
Evo štioci moji več san se umori od ovega notavanja pa vas lipo pozdravjan uz žeju da van život u novoj godini gre boje, sritnije i u dobremu zdravju sa puno više pinez.
Živi i veseli bili pozdravja vas vaš morski čovik Šangarelo.