NA SILVESTROVO

piše: Jadran Šantić Šangarelo
Na ovo važno i lipo večer kad se uz dobru spizu i pismu zaboravja sve ono ča dušu mori mora san sist za makinju i notat nikoliko rečenic.

Puno puti u životu se dogodi da te puno ružni stvari izneredi pa popizdiš do daske i unda poslin dva tri dana zažališ ča si reka.

Evo ovod sad sa ovega mista želin se ispričat sviman  koje san možda uvridi notavajući  svoje misli u mojoj kolumni.

Isto tako moran reč da to nisan reka iz svoji izmišljotin vengo iz poriva koji su me naveli iz tuđi dila koji su me infotali pa san reagira u svomen stilu.

U judskemu životu uvik se sve vrti u jednmu kolu koji daje elipse od dobrega prima lošemen i nase.. Naša svakodnevnica je zatrovana opčon mržnjon izmeju livi i desni i virujen dok se to u obiteljiman ne privede kraju da če nas ta mržnja trovat i daje. Bilo bi najlipje da se svaka mržnja nasiđena u Hrvata zaboravi.

Po obitejskemu nasljeđu san ljevičar koji je tolerantan ma isto ne mogu oprostit onin pastiriman koji bi tribali gajit jubav i toleranciju a oni siju mržnju svuda oko sebe i svoji oltari koji u stvari nisu njiovi vengo njiovega puka. Moj pokojni barba fra Bernardo Buljević bi zna reč: “Pa ništa na meni ni oko mene ni moje pa ni ovi habit i šandale sve je božije a moja rič posebno jerbo ona mora judiman dat snagu za jubav i voju da se mržnja iskoreni”. Danas od svečenstva taki riči nima.

Držidu se mise zadušnice za poglavnika Antu Pavelića največega zločinca našega naroda koji je darova najlipje dilove naše obale fašistima koji su ga smatrali kolaboracioniston i danas mnogi gredu njumu na misu zadušnicu. Pa zar to ni sramota a i apsurd?

Unatoč povijesnio dokazanim istinama novi prešidente sabora traži povrat imena Hrvatskega državnega sabora koji je egzistira u doba ustaške vladavine a kojega je  ustoličija dr Ante Pavelić koji je bija fašistička marioneta Hitlerove vladavine a naša mu vrla predsjenica povlađije i sa njin se slaže.

Danas kad cili svit osuđije fašizam prisidnica RH podupire ideju za povrat ustaškoga naziva sabora. I u  vrime kad cili svit zazire od FAŠIZMA mi u novoj Hrvatskoj i dalje želimo da nam se glavna institucija zove ustškin imenom. Moran se dotaći i oni čija su justa bila puna braniteji a sad ji nima nigdi i jako me žuja oče li i ovoj koalicijskoj vlasti zagorčavat život i pritit rušenjen vlasti ka ča su radili prošloj vlasti.

Moran se sitit kurbaluka jerbo je i ova koalicija sastavjena na kurbanjski način no nikomen ko je pročita pulitiku onega mladega psihijatra Bože Petrova ni bilo strano ni čudno zašto je prista na koaliciju sa strankon Zna se jerbo je od početka bija proizvod kužine štovanega barba Luke Bebića i znalo se da se ne smi vratit u Metković bez saveza sa strankon Zna se.

Eto i ova trakavica o pulitike je gotova a na naman jer da s pomjon pratimo ča če se događat.  S moje strane bi iskaza žeju da bude sve ok i da lipa naša gre naprid u boje sutra a onemu šjor Oreškoviću želin sriču i zdravje i da ostvari sve ča je obeča me ne građevinama vengo građaniman lipe naše.

Štovani štioci želin van iz srca i duše sve najboje u novoj godini vaš morski čovik Šangarelo