MOJ PRIJATELJ MAČAK

ŠTORIJE IZ MALOG MISTA
piše: Jadran Šantić Šangarelo
Evo na današnji dan pri 68 godin za vrime okupacije Dalmacije koju je okupirala tada fašistička Italija …rodija se moj prijatej Mladen Stipić zvani Mačak u Milnu na Brač i to ujutro u 5 i po rano zoron, a Italija je kapitulirala isti dan u 11 uri ujutro.

I danas san ja tija moga prijateja počastit za rođendan sa dobron marendon i lipin vinon bome iz San Pedra a on je to odma prihvatija. I tako dok san ja parića marendu od fileti domaće kokoše sa šugon od luka i biloga vina i jute Neretvanske paprike …kako mi u Dalmaciju rečemo, a ostali od češnjaka  sa bilin vinon, juton paprikon i malo konšerve o pomi i lipin domaćin kumpirima sa bilin vinon  …moj prijatej Mačak se sitija barufi koje je napravi dok je bi mlaji.

Jednon prilikon u naše lipo malo misto ispo kostele sididu misni dežurni grintavci i pametnjakovići koji u životu nisu ništa radili doli pravili zajebancije i barufe. Dolazi on na bicikli od kuće i sav infotan i grintav suje sebi u brk.

-Jeben in mater njiman i njiovome penšjunu kako ji ni sram da mi dadu samo dvi ijade euri a ja san se rodi u Italiji.

Gledadu ga grintavci i ništa in ni kjaro. Jedan meju njiman se okurađa i pita …a kako ti jemaš prav na tu taljansku pensiju?

-Bome ja san se rodi u Milnu na Brač dok je bila Italija i tako jeman sva prava a kako san napuni 60 godin gre mi njiova pensija.

Ti koji je pita poslin dva godišća je umra u uvjerenju da moj prijatej Mačak jema talijansku pensiju.

Ma ovu san štoriju ti napisat sa jednon drugon zgodon. Mačkov otac Šime je bi funcut veći od moga prijateja Mačka, ma zna je bome sve barufe i berekinade a razumi se i u ribaršćinu.

Dunkve tako jednon mačak i njegov zet Baldo odili su lovit ribu sa puškon, i nigdi ispri otela Laguna nađu jedan dil dna sa samon pržinon a na njemu pasu i kopaju Arkaji oliti Ovčice.

Zaronu oni sa puškan i bome nisu ulovili ni jednu, i poslin dvi ure bili su ka posrani. Poslin tega su mislili ča se dogodilo i lipo su se dositili ajo mi opasat mrižon ovi dil di je pržina i onad pobit te puste Arkaje.

Dok su oni zapasavali mrižon nisu vidili ča se doli događa i bome spremni na veliki lov zaronu a u kolu ča su ga mrižon opasali ni gera. Vratu se oni doma i ko će o srama reč da nisu ništa ubili, ma Mačkov pape Šime ka funcut probije led …an a di van je riba,. ja san već naloži vatru za gradele koliko ste ubili-

-Ništa njanka jednu jerbo kad smo zapasali mrižon ti dil dna o pržine u temu kolu ni bilo ni gere.

Stari Šime …Mačkov otac udre u smij a oni se gledadu u čudu …ča mu je, ča mu se dogodilo?

I kad se stari Šimun smirija održa in je pridavanje.

-Kad Arkaja zapašeš sa mrižon on se ukopa u pržinu i viridu mu samo oči kako franje, a vi muzuviri to niste znali. Ajmo sutra zajedno pa čete vidit.

Sutra oni partidu sa gajeton na isto misto i tamo opet jato Arkaji ruju i kopaju pržinu. Oni lipo pa Šimunovoj zapovidi zapašu jato i ono se odma ukopalo u pržinu. Zaroni moj prijatej Mačak i njegov zet Baldo Šutić i sa puščicama na ariju ubiju ti dan priko dva kvintala Arkaji.

Eto štioci moji ovo van je živa istina i to mi je danas na rođendan ispripovidija moj prijatej Mladen Stipić zvani Mačak.

Pozdravja vas vaš morski čovik Šangarelo.