Piše: Jadran Šantić Šangarelo
Evo sa ču van spjegat zašto san napisa ovi naslov gori. Je da san van puno puti reka da se u naše malo misto more očekivat svakakvi baruf ma i mene je ova štorija iznenadila. Dunkve od moga velikega prijateja Mačka san čuja za ovi slučaj ča ču van ga ispripovidit i notat na kartu da se ne zaudobi, oču reč zaboravi.
Triba uvik meknit na kartu sve ono ča je interesantno a ne slagat u glavu ka u niki magazin oliti skladište o pameti. Ovo van govorin jerbo su naši stari rekli miljun puti pametni pišu a berlavi pante. Kroz one moje štorije ča su napisane u prošla vrimena čitali ste o mojin junaciman Šimi Rosinomen, Danilu Radeliću zvanome Somina, Mačku i drugiman da sad ne nabrajan i u ovu štoriju glavne uloge jemadu Danilo i Šime uz pratnju drugi statisti.
Kako van je sigurno poznato da je vrime o branja maslin i pravjenja maslinova uja naš junak Danilo jema bome lipu veliku i modernu ujaru u naše malo maisto. Svaku večer se tu satje maša oni pravi ča ništa ne radu vengo samo zajebaju radnike i uz to žderu i loču pa su skoro svaki dan pošprucani.
U takvomen okruženju jema i nanamjerni zajebi ka ča je ovi najnoviji. Odlučija je Šime Rosin obač prijateja Danila na ujaru i u mraku iz spreme vazeja je jednu botiju sa crnon tekučinon misleči da je crno vino i partija pod Grmu u ujaru .
Doša je gori a naš Danilo nako dubokega glasa zabrunda a jeli to crno? Daj vamo da se napijemo. Kako su na stolu jemali još zalih nepopijenoga Šiminu botilju su ostavili za kašnje. Kad se bome sve rezerve potrošilo došlo se na Šiminu botiju i naš ti junak Danilo otvori botiju i kako jema lipi cug nagnija i potega ma gospe mi zavrtija je očiman i sakoro se zadavija .
Oblija ga znoj i jedva je prosuja sovku a niko nezna zašto. Pita Šime oli je otišlo na maravan ma kako je Danilu bilo slabo i skoro ga je afanalo prolivali su ga ladnon vodon da dojde sebi i tili su mu dat umjetno disanje ma on je borac i počeja je pomalo dolazit sebi.
Kad se malo vrati u žive …sorija je sve na Šimu i sa neba i sa zemje da materina tija si me otrovat pa si mi da sok o borovnice ča san ja oli još gren u malu skulu da mi nije nako sa bi te skalamaštra. Ajde kad se sve razjasnilo da je bilo slučajno jer je Šimina žena primiščala botilje kad je slagala spremu ni bilo više jida i naš Danilo je opra justa sa dva litra gemišta da bi doša sebi i uništija okus o soka.
Nigdi u kasne ure društvo se rasulo pijano doma i onda su ti počele muke po Danila. Parti je on doma ma ga je u po puta počelo vretit u stumik i kad se uvati kuče i konduta dobi je jadan uraganski proliv kavi nikad u životu ni jema.
Sutra se ispovidija Šimi da je barenko uru vrimena granatira školjku o konduta dok ga ni pasalo. Eto lipi moji štioci triba iz ovega izvuč pouku i to prin vengo se napiješ najpri povonjaj i nikomen ne viruj jerbo te svak i neoteći more zajebat a najskoli oni ča su ti o povjerenja.
Nikomen ne bi tija vake muke i zato mi je jako žaj našega Danila več u dvi štorije guzica mu je mrski dušmanin.
Eto štioci moji živi i veseli bili pozdravja vas vaš morski čovik Šangarelo.