LUDA ZEMJA SA JOŠ LUĐIN JUDIMAN

piše: Jadran Šantić Šangarelo
Nisan dugo ništa nota na ovon  mojon makinjeti a skupilo se bome tega krcato za notavanje.

Evo ni me baš drago i ne sladi me puno ča moran u štartu počet sa šjor Vladon Šekson. Kaki je on veliki pravni um more me i tužit ako ča o njemu notan a on pomisli da to ni tako i zato moran stat atento dok o njemu stavjan misli na kartu.

Ni me kjaro jeli izlapija joli jopet muti vode oko sebe samo da bi se o njemu štako notalo u foje. Moran istaknit da  ni to mala stvar bit u vrju vlasti puste godine ka i on i stalno ništo muljat a jopet ostat normalan.

Puno je on pravni voda zamutija pa i sada kad kaže da če naša prpošna prisidnica objavit izbore po njenemu čeifu jopet ništo muti ma nezna se ča.

Drago me bilo proštit u foje da je iz ureda prisidnice odbijen prijedlog da časna rvatska vojska pozdravja ustaškin pozdravon, ne bi ga tija ni notat.

Isto bi me bilo više drago da je to prisidnica lipo po njenu sazvala konferenciju za tisak i ona osobno to odbacila, vako ispada da se njezin sud o temu nezna jerbo su ti odgovor notali njezini savjetnici, pa ispada da je more bit ona za ti pozdrav i da se zato ni obratila tisku na brzinu kako ona to zna napravit sa brzinski sazvanon konferencijon za tisak i za banalne teme.

Ta sramotna inicijativa je došla od navodno veliki lumena a posebno od naši vrli biskupi koji se nikad ne libu govorit i radit kontra ove vlasti a sada i kontra cile lipe naše.

Jemadu njemci prav kad su se obrušili na monsinjora Puljića jer on ka prisidnik HBK nije smi davat podršku ton inicijativi a kamoli je poduprit potpison.

Nigdi san proštija da če Papa Frane take ekstremne biskupe slat u penšjun pa ako i daje budu stali uz bok Paveličevciman i ustaškin natruhaman onda su ka civili a u demokraciji moreš bit uz koga te voja.

Ni me nimalo iznenadilo ča je šjor Košić uz ustaše jerbo je do sada puno puti sta na njiovu bandu.

Moran reč da je šjor Bandić ka feniks i to uspješan kad je državi manija 400 miljuni u korist metropole a ispada da se veliki Linić zajeba u računu, pa ča, oli če za to odgovarat a ako je te šolde unaprid meknija u proračun unda je sve nas privarija svojin brojkaman.

Štijen s pomjon da če stranka Zna se kad osvoji vlas a oče kako oni to tumaču smanjit broj ministri i ministarstav i u ton pogledu ja in priporičan da formiraju mjinistarstvo nerada i pozerstva a da na čelo stavidu našega dičnega splićanina Grčića mislin da bi to za njega bilo izmišlljeno radno misto.

Moran ovod spomenit i modnu dizajnericu Monu Lacko koja je naumila od nas muški napravit mone i obuč nas u hiđabe pa judi  moji ko  bi mona za te kreacije nosit odma bi te barenko u mene u Split proglasili leron i ridikulon a ča je najvažnije njoj je tribalo 2 godine promišljanja dok jon nisu sve kockice legle. Ajme judi lude žene a i lude mode na ovemu svitu.

Denisa Kuljiša ne triba posebno pridstavjat onako korpulentnega a bome i pametnega  i u prilog temu  bi pridložija da ga se izabere ka um 21 stolječa pa da mu se napravi kip veći od onega Francekova u Pločama i da ti kip stalno iznosi njegove misli da ji se ne bi zaudobilo jerbo su neponovljive.

Jako me drago bilo proštit da je Jasen Mesić biša perjanica stranke Zna se ostavi snimjen trag svoga političkega ronjenja. Moran reč da je to vridan opus za podmorsku arheologiju i da mu triba čestitat jerbo drugi nisu ostavili nikakvega pozitivnega traga osin razni spletki i marčapija.

Šjor Tomislav Čadež se uvatija bome opasne pisanije oko našega lipega Jadranskega mora i po njemu je veća vridnost za državu 800000 slovenac ka turisti kod nas vengo po Savudrijske vale. Moran reč da smo ginuli u povisti i to ne dalekoj da vratimo Istru  Dalmaciju i otoke u okrilje majke zemje a ovi bi šjor Tomislav benevolentno poklanja naše more slovenciman.

Neka su slovenci nama ka turisti uvik dobro došli ja ji stimajen a slovenke još i više ma Naše more jin ne damo i gotovo. Ovo bi jin tribalo ščeto neto spjegat u facu i unda bi znali ča mi u Lipoj našoj mislimo.

Evo štioci dragi za sada ovoliko jerbo ne bi tija da me se jopet napada zbog mojega notavanja pa mi sritni i veseli bili pozdravja vas vaš morski čovik Šangarelo.