K VRAGU RIBE, PUŠKE I OSTI

piše: Jadran Šantić- Šangarelo

Dragi štioci moji i lipi jur san se sitija jedne barufe koju je opetovano činija jedan moj susid i prijatej i to dosta vrimena.

Kako i sami znadete u Split su se  jedno vrime ka tsunami skalali naši dični vlaji a i bome vlasi ča oče reč oni pusti svit iz Ercegovine. Nisan i ne bi tija nikoga uvridit ma u nas u Split se tako kaže za one naše vridne jude pune furbarij priko naši brda zovemo vlaji a one koji su još daje iza brdija u Ercegovini i koji su isto vridni i furbasti zovemo vlasi. Eto tako je i gotovo.

I tako kako se ti mas pokret seobe širija sve je više interesantni judi dolazilo i nastanjivalo se oko nas  u susidstvo. Niki su kuće i stanove afitavali a oni koji su jemali pinez joli nikoga u Njemačku kupovali su stare kuće  sa dvoriman u Veli varoš, Manuš, Lučac i da ne nabrajan sve lipo tamo do Barutane.

Kraj moga barbe u Veli varoš jedan je pravo kršan i grlat čovik kupi lipu  i stamenu kuću sa dvoron iz kojega je svaku subotu i nediju dimilo da se u cilu kalu moglo šušit pršute  a dim je lipo vonja jerbo je ti čovik jema uvik lipo drivo. Kako san ja sa barbon odi na ribe on je uvik sta atento i čeka da vidi ča smo ulovili i svaki put nas je mata da mu prodamo one veče i boje bokune iako bidan ni zna kako se zovedu.

Tako smo se upoznali  i ja san mu služi ka  informator kako se zove koja vrsta ribe i na koji je način najboje tu ribu sparićat. Kako je vrime prolazilo tako su u nas u Dalmaciju počeli postavjat ribogojilišta i jedan put pita mene ti susid kakve su to ribe iz ribogojilišta. Bome reka san da su dobre i sve za gradele. Nauči je on s vrimenon pripoznat frišku ribu a bome je zna i kako se zovedu jerbo je bi jako bistar i brzo je uči. Odija je nikoliko puti sa nama na ribe i dok bi barba lovi na tunju ja san tuka ribu puškon a on to nikad ni vidi.

Jedan put ulovi san jednu lipu kavalu a on odma ja ću je kupit  a kakva je to riba je li dobre vrsti i sve ništo pita. Bi mi je več dopizdi kad mu je barba reka da je ta riba boja od one na peškariju a on odma zašto. Zato ča ji raznoliku spizu a one na peškariju iz ribogojilišta jidu stalno umjetnu i to istu ranu. Zamisli se moj susid i grune ka iz topa od sad kupujen samo ribe sa bužama od ostju i harpuni. Kad smo došli doma ja izaša vanka i pripovidan mojin kumpanjima a jedan linčina je odma skonta kako bi moga lipo zaradit. Zamoli me da ga upoznan sa susidon i da ga pristavin ka sportskega ribolovca a unda je sve na njemu. Ja mu udovojin i odma u subotu u susidovu dvoru dimi ka ferat. Vonja riba lipo se čuju i razgovori , pala je i ojkalica a moj susid priko zida mene zove i fali mi prijateja kako jema  pravu oboritu ribu a ni ni skup.

Sutra dan pitan ja tega muzuvira o moga prijateja oklen mu riba? Kad jeman ča i čut da se on dogovori s nekiman koji lovidu s bocan i tako on od nji kupi i proda ma bome lipo i zaradi. Ajde mislin se ja neće više žicat o nikoga  kad pošteno zaradi svoju lovu. Sve je to lipo trajalo dok jednega dana nisan triba poć sa puškon u lov na ribu za jedno društvo. Dođen doma u barbe i u konobu di su stali svi arti o ribanja tražin pušku i osti a bome i harpun. Puška je na mistu ma osti i harpuna nima pa nima. Ja cili jidan i infotan oden do kafića kad tamo oni moj časti ekipu i odma s vrat kad me ugleda drekne ajde Jadro koji ono ti Whisky piješ? Popijen ja ma sve se mislin di su mi svršili arti i ekipa me napade ća je, ća si jidan a ja in ispripovidin moje muke. Kad oni moj junac sav skrušen dođe i prizna mi nisu ti se izgubili u mene su doma to mi je osnovni alat za zaradu. Gledan ja i ni mi kjaro uvatin ga za prsi i počnen ga trest.

A kako su u tebe a puška mi je doma? Sede on i počne pripovidat , ne triba mi puška jerbo ja svu ribu izbužan doma u kužinu na staremu stolu.  A oklen ti riba? A bome iz ribogojilišta iza Trogira , tamo san se dogovori sa jednin radnikon da mi kad vadidu ribu iz koriti odvoji uvik 5-6 komadi oni veči od kila i ja ti dva puta na šetemanu oden i on mi izvadi te veče i proda jeftino ja ji doma probužan ka da san i ja ubija puškon i lipo u kofu pa vrkon do onega tvoga susida vlaha i njemu prodan jutros friško ulovjenu ribu. Lipo me je moli da mu ne odnesen alat za rad  a ja i ekipa smo se cenili o smija kako je niki dalmatinski muzuvir privarija ercegovca. Isto san uzeja moje osti i harpun a njega san natira da sebi kupi nove  uz rić da ga neću izdat. I nisan ga izda  do sada a od tega jema više o 35 godin.

Eto štioci dragi živi i veseli bili i pozdravja vas vaš morski čovik Šangarelo!