OGLEDALO …

…sa čistin liciman i šporkin obraziman

piše: Jadran Šantić Šangarelo
E štioci moji lipi i dragi moran van priznat odma unaprid da če ova štorija bit malo iz malega a puno iz veloga mista.

Kako i sami znate svi smo mi potekli iz naši mali misti bez obzira iz kojega dila lipe naše, ma jema oni koji to ne priznaju i nastojidu živit ka nika falša gospoština ma jema i oni koji živedu u velomen mistu a u duši su ostali pošteni i vridni judi iz mali sredina.

Upozna san pri jedno 50 godin tada mladega svečenika koji je bi skroman i pošten ma taki je i danas samo danas jema puno za reč a bome jema i di i odma su ga njegovi razapeli ka isusa na križ jerbo neče da puše u isti rog sa ostaliman iz crkvene branše.

Upozna san pri jedno 20 godin jednega fratra tada več u godine ma bogami jako žvelat kako na noge tako i u možjane. Isto jedan pošteni fratar koji cili život žive i radi za narod, skromno i pošteno.

A sad na kraju moran reč da u fameju jeman jednega rođaka svečenika i pokojnega barbu fratra franjevca. Tija bi van o njiman pisat jerbo me ove dane svako malo skoro kolpa sa čimen se sve ta bogata i neradnička kasta bavi i na koji način sebi uzimje za prav da narodu pere možjane.

Zašto san gori da oni naslov upravo zato ča ču van pisat štoriju o oniman sa čistin obrazon i poštenjen oliti sa umivenin i nešporkanin licen i oniman sa čunkon ogrezli u svakoj obilanci ča in narod daje i još nisu zadovojni vengo bi tili sekularnu državu pritvorit u crkvenu pa in onda i oni Tuđmanov famozni ugovor sa Vatikanon nebi triba jerbo bi i država bila njiova ka da smo u doba sridnjega vika a nemore to tako.

Evo več san se infota moran malo fermat. Malo san nagazi na balun jerbo me pamet neče služit a baš bi tija ništo pametno spjegat. Oni svečenik ča san ga upozna prin 50 godin je dragi tihi i pošteni čovik don Ivan Grubišić, čovik koji se nigdi ni ogreba za ništa koji je živi skromno i pošteno a judi su ga stimavali i volili. Onega momenta kad se „drznija“ progovorit javno i pošteno protiv muteži u crkvenin redoviman odma se upalija veliki alarum kontra njega od biskupa do onega gori još višega u metropolu Bozanića.

Oprosti mi bože ma ja nikako da odgonetan kojin jezikon on govori i kojin narječjen? Ma isto je don Ivan izdura sve te pritiske i nastavi širit istinu kako o barufan unutar crikve tako i sada ka narodni tribun kontra oni u Sabor koji uredno potkradaju vlastitu državu. Oni prvi su mu uskratili pravo propovidi, pravo na dodilu sveti sakramenti i na kraju pravo na zarađenu mirovinu pa di to ima.

Ima ima u crikvi u Hrvata koja bi tribala bit vertikala istine a ne njen tamničar, koja bi tribala narodu u teškin vrimeniman vračat dil koji jon je narod da a ne živit u svin obilancan gradit velebne dvore dok narod kopa po kontejneriman i to ne iz obisti vengo o gladi.

I sad judi moji koga podržat poštenoga malega svečenika ma velikega čovika oli one u zlatnin matijaman koji su pokvarenjaci i mutivode svome narodu. Sada se karaju sa ovon jadnon vlasti oko zdravstvenog odgoja ka da je to krucijalna stvar za izlazak iz krize oli jedini problem lipe naše. Ne nije to jerbo se moglo pročitat u novine da se narod huška na rat i nemire ka da nan nemiri i rata ni dosta za sva vrimena.

Ma odma sa njiman u prve redove su i oni ča su državu opjačkali do kosti oni kojiman se sudi, oni koji su nas 20 godin varali bezočno i uništavali sve čega su se dočepali i bome lipo to složili na vlastite račune da in jemadu pokoljenja o čega živit jerbo znaju da in se više neče nikad pružit taka prilika ,a i za napomenit je da je sam Tuđman tija državu o 200 bogati obiteji i ostatak stoku sitnega zuba.

Moran se ošervat i na onega fratra fra Stanka Radića koji je ka i don Ivan pošteni i vridni duovnik koji mi je puno puti reka da i šandale sa habiton nisu njegove vengo njegova reda. Poza njin dolazi na red i moj dajnji pokojni barba fra Bernardo Buljević koji je također živija skromno od vire i za viru koju je približava narodu, a na kraju moran spomenit i moga dajnjega rođaka mons. Josipa Šantića za kojega nisan ni zna da postoji do ovega rata. Zva me je jedanput sa Hvara da mu triba rješit jedan veliki problem na carini u Split jerbo je dobi za narod pekaru za kruv a carina ne pušča bez carine.

Dobro, ja san to sredija za narod a ti moj rođak mi se više nikad ni javija čak ni onda kada san jema velike probleme sa pokojnin sinon i sad mi recite kako se more ovako živit i kome se triba virovat.

Znan da se na zanji popis puno svita notalo ka vjernici katolici ma isto znan da se više od pola nji nije u zanju godinu dan zlamenovalo oliti prikrižilo i da ti isti ne gredu u crikvu a bogami neznan ni koliko dobrega činidu u životu. Na takove se poziva naš dični kler i zazivje boga za nerede pa su se crkovne propovidaonice pritvorile u mista žustrega govora proti vlasti i oni koji su glasali za nji, ma niko ne osuđije javno one lopine i njiove pristalice pa di je tu poštenje i pravda.

Čini mi se da je crikva u Hrvata po nekin svojin naznakaman priuzela misto opozicije umisto HDZ-a a da su in dotični poslušni slugani i teklići loši vijesti.

Moran se zapitat jesan li ja rebanbija ili je cili svit otiša na maravan i dali čemo ka država ikad stat na zdrave noge reda rada i poštenja.

Očemo li zadržati sekularizam ka zdravu osnovu dijaloga sa crikvon i oče li konačno crikva vazest svoje misto tamo di pripada u viri sa narodon a vlast mora vodit zemju. Eto bija bi puka ka čvrčak da nisan ovo napisa . Živi i veseli bili štioci dragi pozdravja vas vas morski čovik Šangarelo.

P.S.

I dok san par dan razmišlja oču li ovo impoštat da se objavi oli ne dogodilo se ono najcrnje i najgore. Virujen da to ni bi poziv za drugu Oluju ča pripovida ministar Fred Matić ma isto se poklopilo sa propovidima biskupa Pozaića.

Nadan se da če se sve završit tresla se brda rodija se miš ma isto ni lipo ni ugodno čut take stvari da se događaju u metropoli.

Krapinske Toplice 10.01.2013 god.