ŠTORIJE IZ MALOG MISTA
piše: Jadran Šantić Šangarelo
Ovo ča ću van sad spjegat živa je istina, samo ču ja velikin ribariman prominit imena a more bit da imena neču ni duperat.
U jedno naše lipo dalmatinsko misto di jema ribari više vengo brodi živedu dva stara prijateja. Ta dva stara prijateja se toliko družidu i karaju da se more i o toj temi napisat velika štorija, ma o temu drugi put.
Dunkve …kako je izaša zakon o parangaliman, koji ne da je nakaradan vengo je svjetska sramota, jedan put san pri nikoga vrimena reka da se te male arte o koji živedu puste fameje nesmi dirat jerbo su ritki ribari o športa koji svoju lovinu nosidu za priranit sebe i svoje a na peškariju.
Dobro zna se dogodit da se na parangal uvati lipa komarča oli škrpina i odleti u niki restoran ma to je ritko da za gospu ni spomena vridno. Ma ovi ča pišedu zakone za nas male jude ka prvo nemaju pojma omoru, artiman ni o ribarščini pa su za napunit državne jasle udrili taksu o 300 kun za jedan parangal jerbo ako jemaš koji više nebi me čudilo da svršiš u prežun.
Sto puti san reka da ministarstvo o mora i ribarščine mora bit u Split i da svi o ribarske struke moraju bit fetivi Dalmatinci, a e eno nan tamo niki Čobanković kroji veštite …ma samo bezime mu govori o čemu on more govorit. Nebi ja čovika tija uvridit jerbo se te njegove teme za nika druga podnebja i druge jude.
Malo san se maka o teme …ma evo me nase navrime.
I tako ta dva moja prijateja odu po novin propisiman bacivat parangal za lovit mole. Jemali su lipo frišku sardelu za ješku i sve su po starin navadama napravili i bome stručno bacili parangal, ma isto su padale beštimje …naprid šija …ma ća činiš …i tako sve dok ti parangal ni lega na dno.
Vratili se u porat i u misnu konobu udrili po okripi …jedan bome po biri a drugi po gemištiman. Sutra rano ujutro partili dizat parangal jer se nesmi okasnit da ribu ne izidu ugori oli koje druge beštije i oni ti lipo dođu na poštu dignu sinjal i počnedu vadit parangal.
Bome na prvin udican do pola je bilo lipi moli ma unda je sve krenilo k vragu i naopako.
Jedan o nji koji je bome meškinjastiji suje i govori:
-ben ti toga zapelo je ne gre gori puknit če parangal.
Oni drugi koji je bija za timunon o motora i koji je jak ka bik plane:
-aj kvragu di more ode zapet kad je doli sama pržina i trava, daj meni a ti lipo linčino upravjaj motoron.
I uzme on špag o parangala potiže i potiže ma jedva se malo ništo odlipilo o dna. Vučedu oni malo rukan, malo motoron …i posli jedno dvi ure izvadidu ništo do površine i jemadu ča i vidit .
Bome ogromna tuna (posli se izvagala jemala je 37 kili) i ča je najgore jemadu ča i vidit cili ostali dil parangala je vrteči se ka ringišpil omotala oko sebe i sama sebe udavila.
Ajde poslin te velike borbe oliti rata sa mrtvon ribon …tribalo je bidnu tunu i očistit i izrizat.
E tu je ka na veliku scenu o tega teatra nastupi treći prijatej mesar koji je tunu izbikarija.
Cilo naše malo misto je dobilo temu za priče laži izventavanja i to za barenko misec dan a i više …jerbo ako se malo zaboravi ona dva muzuvira če lako opet počet pričat o nesriknoj tuni.
Eto štioci dragi sve se dogodilo u cencu kako san van spjega …ma isto san osta ka inkantan, a bome i malo jidan jerbo me ti moji nazovi prijateji nisu zvali njanka na marendu. Evala in i fala in. Do novi novitadi živi i veseli bili …pozdravja vas Vaš morski čovik Šangarelo.