ŠTORIJA O ČOVIKU I MORU

ŠTORIJE IZ MALOG MISTA
piše: Jadran Šantić Šangarelo
Triba san davno ispripovidit ovu štoriju o čoviku i moru, ma još nemogu sebi reč zašto to niosan do sada učini.

Davno kad se vratin u misliman u moje ditinjstvo uvik se prid menon stvori čovik …visok, suv i uvik neobrijan sa rašketon na glavi za koju san sigur da je nikad ni opra.

Ti visoki i suvi čovik se zva Ante ka i oni naš veliki svetac. Nikad nisan zna sa čime se on bavi dok nisan malo podnaresta i počeja švrljat po mistu i po danu i po noći dok me pokojna mater ni ulovila i sa šibon o vrbe ubila boga u meni.

Kako san bi dite bez oca svi su me u mistu zvali mulac a niko po imenu osin par fini i dobri judi koji su bili prijateji sa mojon materon.

Moja je pokojna mater prodavala kruv u misnu butigu a navečer je honorarno prodavale karte u naše kino. Ja san bome svaku večer bija u kino i gleda sve filmove koji su se davali, i tako san zapametija i tega našega mišćanina zvanoga Toni (Ante).

Kad san se malo zainteresira za njega vidija san da on žive samo o ribe koju ulovi proda kraj naše pešklarije. Svi su judi u naše misto u njega kupovali lipu ribu i to za puno manje pinez nego se ista riba prodavala na peškariju.

Kako mi ni bilo jasno zašto on prodaje ribu ispo cine …počeja san ga šakreto pratit. Moran van spjegat da san se jako iznenadija kad san svatija da on tu ribu lovi na svoj naćin i da nikad ni nikomen reka kako.

Kako san i ja ka i on bi siromaj jedan dan san ga trefija u moju kalu i šćeto neto ga zapita …šjor Toni bi li ja moga sa vaman odit na more i lovit ribu za prodat jerbo ja i mater nimamo pinez za normalno živit.

Pogleda on mene i kroz kosmati brk frkne …a čigov si ti sinko? Ja se okuraža i rečen mu

-ja san od Luce Šantuše i zoven se Jadran.

Pogleda on mene i ka kroz nos pusti glas

-a ća ti znaš o ribanju?.

–Ma znan van ja sve ća se more naućit o ribari iz porta samo niman arte.

Gleda on mene i posli nikoga vrimena reče

-dobro mater ti je vridna i poštena žena a znan da i ne živete dobro moreš samnon na ribe samo nikad ne smiš nikomen reć di smo ća ulovili,očeš li moć o temu mučat?

Mislin se ja i ka iz topa

-samo vi i ja i crna zemja moredu znat našu tajnu.

Prođu dva tri dana i šjor Ante zvani Toni ništa ne govor,i a ja ka i svako dite kurjož trefivši njega u mojon kali zapitan …šjor Toni jema li ča o ribanju?

Pogleda on mene i kroz brk zafrkče …jema, jema a ja san mislija da si ti zaboravija ,večeras …ako te mater pusti, gremo na ribe.

Ja sav sritan trčen doma i pravo u posteju, a mater bidna, brižna doleti i pita

-Jadro dušo oli si se razboli?

–Nisan majko nisan samomoran večeras sa šjor Tonon na ribe zva me je i obeča da če me vodit.

Bidna mater sva se inkantala pa udri po meni

–pa di češ ti sa tin čovikon na ribe on nikad nikoga ne vodi sobon a zašto bi tebe vodija?

-E moja majko ja san ga pita i reka mije da če me vodit ako me ti pustiš,očeš li molin te?

Stane ona i misli se i na kraju reče …ajde dobar je to i vridan čovik moreš uvik od njega čako naućit.

Tu san večer odija prvi put na more sa čovikon koji je sve o moru zna i ja san posli od njega naući puno ma nikomen ni bilo jasno zašto san ja sa njin prodava ribu kraj peškarije. Do danas nikomen nisan tija otkrit ovu tajnu …ma moran reč da san sa tin šjor Anton zvani Toni naučija puno o moru i ribanju… i danas kad san uvati lipe godine i puno godin posli njegove smrti priznajen puno tega me naući o ribaršćinia.

Najviše me naući kako poštivat more i ribanje jerbo more moraš volit  i poštivat …ma ne smiš se mora bojat. Sa tin dragin pokojnin čovikon puno puti san prića o svemu a najviše o judiman koji nikoga ne razumu ili neče da razumu, a tako je lako sa judiman kad in se ne čini zlo i kad in se ne petaju roge u žepu.

Voli bi da šjor Toni pročita ća san o njemu napisa jerbo je on sa svojon dobroton meni i mojoj bidnoj materi puno pomoga da ne budemo gladni. More more svakoga ranit ma samo če one nagradit koji ga ne iskorištavaju vengo koji ga mole da in da lova za priživit.

Eto štioci moji zdravi i veseli bili …pozdravja vas vaš morski čiovik Šangarelo.