piše: Jadran Šantić Šangarelo
Mislija san se bi li uopće ćakod napisa o ovin besramnin bezobrazlucima današnje vlasti.
Mislija san da je sve pokvarenjaštvo i lopovluci sa političke scene ka sa dasak o teatra nestalo odlaskon ZNA SE koga u dugu političku povjest ma sad mi se čini da će se oni jopet vrnit nase jerbo jin ovi ćinidu kako se to sada moderno reče platformu za povratak.
Čitan svaki dan i to do daske dva do tri foja i uvik me snerva kad pročitan one stvari koje graniče od gluposti do političkega bezobrazluka.
Nikako mi ni kjaro kako ti političari jednon ne svate ( ili kako mi u Split rečemo kako jin ne dolazi iz guzice u glavu ) da mi nisme kretini i da je današnji svit učeniji ,školovaniji i pametniji vengo prin 50 godin i da dobro razumi sve njiove marifetluke.
Eto čitan, vlast oče naplaćivat tunelarinu kad se prolazi kroz oni novi tunel ča nosi ime svetoga Ilije, narod Imocke krajine ni čut a najveću potporu jin daje vječni i bezvremenski gradonačelnik Baške vode šjor Joško Roščić.
Ka da se svugdi na svitu ne naplaćije tunelarina ? Unda se lome koplja oko mosta Pelješac kopno jerbo tega smo svi svjesni triba povezat državu sa Dubrovnikon.
E, to je pravi narodni zajeb! Kako, pitat će puno svita. Lipo, najpri je ADZ-e tri puta otvara radove radi razni izbori i glasačke potpore iako su znali da nimadu šoldi a i da su se zakrvili sa Bosanciman jerbo oni svojataju dil našega mora i več dugo nas jebu u zdrave možjane zbog ona dva škoja Veli i Mali te punte Kleka iako je Dr Davorin Rudolf i drugi pametni svit dokaza da se Bosanci služidu falcifikaton o dokumenti koje je falcificira i podmetni ka važan dokument u njiov državni arhiv, i sa kojin se oni busaju u prsi, jedan njiov geodetni, bivša a ni ova vlast nezna ti problem dovest do kraja i lipo našin dragin susidiman Bosanciman reč …judi ča je naše naše je i mi vaše nečemo ma lipo se ostavite našega kopna a bome napose našega mora.
Daje, kako i mi jemamo jako sposobni i pametni judi ka arhitekti, statičari i drugi koji su sposobni i priznati u svitu ka stručnjaci a ne podobni ka bivši „državni“ arhitekta dotur Jure Radić i koji su dali čistu studiju da je boje sigurnije i na kraju ča je jako važno četiri puta jeftinije učinit tunel ispo mora i da nas radi tega niko neče zajebavat, niko se od bajni političari ni na to ošerva ni da svoj komentar ča bi se reklo pro et kontra vengo i daje iskaju šolde u Evropi za fantomski most a ono ča je boje i brže za napravit ispada ka nika redikulozna poruka i koja ka da je napisana na led i pritakana na ovo litnje sunce.
Nemogu a ne dotaknit ovi famozni zakon koji je lipo po latinsku dobi i zvučno ime Lex Perković. Pa judi moji ovi Milanović ka da drži stalno glavu u guzici i ne vidi ča čini obrazu lipe naše i sviman nama koji nismo za zaštitu ničiji špijuni i razbojnici a najskoli oni ča su klali i ubijali.
A zašto ti bezvremenski Perković ni procesuiran pod moton šjor Šeksa „locirati, uhititi, transferirati“ kriva je prošla vlast i njiov glavni špijun oču reč kapo o svi špijuni. I njega triba procesuirat ka jednega krivca a to je več znate ko oni ča govori a ne miče justiman i koji je pri zagovara jedno a sad je največi bukač kontra tega.
I na kraju jučera san proštija u foje da je oni pametni mladi doministar o resora državni financij i pomoćnik šjor Liniča Boris Lalovac instalira svoga papu na misto prisidnika jednega NO u otelsko poduzeče na korčulu.
E judi moji mislija san da se taka lakrdija sa sramotnin činon oviman u vlasti neče nikad dogodit. Znan malega a znan mu i papu i osta san inkantan jerbo to nisan moga ni u snu predvidit.
I šta da van rečen pod stare dane san počeja jopet učit i to kako se ponašat,kako mislit, ča govorit oli ne govorit ništa i ča je najvažnije više se ne pačat u pulitiku jerbo ču od jida jednon puknit ka čvrčak u sri lita.
Sa ovega mista ču poručit onima kojiman je poruku važno inpoštat a to je: Zatvorite sve lopine pa i one iz vlastiti redov.
Oduzmite sav kapital onima ča su opjačkali narod i državu doveli na prosijački šćap pa ga lipo vratite u državnu kasu a tada sigurno nečemo bit dužni svitu ka Grčka.
Osigurajte narodu život dostojan čovika i bavite se samo progresivnon pulitikon sa poštenin i pozitivnin predznacima.
U vlastitin redovima potirajte sve one ča vas sramote.
A ka zanje bi priporučija da se mladi MIlanović probudi iz nekoga svoga imaginarnega sna pa svoje redove zbije i osvitla obraz SDP-u a ako to ni u stanju napravit neka ga se smini i izabere novega pametnijega i sposobnijega čovika.
Evo več san se sav infota i najidi da ne mogu pratit misli a znan da san tija još puno tega naglasit ma jopet mislin da je i ovo ča san napisa dosta. Ma isto tako ka da san sve reka u vitar.
Dragi štioci moji živi i veseli bili i želin van sviman da jednon živemo u pravednijemu društvu. Pozdravja vas vaš morski čovik Šangarelo.