piše: Jadran Šantić Šangarelo
Evo se nakanjivan deboto 10 dan da napišen jednu štoriju o momen kumpanju sa parangali ča oče reč sa ribarščine koji je nosi nadimak Đek, a puno mu ime neču spominjat jerbo svi koji ga znaju znat če o komen je štorija.
Kad san počeja dolazit priko lita u ovo naše lipo malo misto, za prvega san susida dobi čovika za koga su mi u štartu znali opisat ka čudaka čovika koji se zatvori sam use i žive na vrlo čudan način.
Mic po mic počeli smo se družit kako je i red sa prvin susidon i počeli odit na more bacivat parangale na mole a najviše na ugore.
Malo po malo san sve više uliza u dušu temu kako ga zovu čudaku i zamislite ča san otkrija, čovik je skroz OK ma isto je malo zastrani ča bi rekli u Dalmaciju jerbo žive u svomen filmu.
Sa tin mojin kumpanjon san bi jako kuntentan jerbo mi nikad s njin ni bilo dosadno. Čovik je u mladosti bi vagabundo. Navigava je na sva mora balote zemajske i vidi je bome jako puno svita, upozna je puno tuđi kultura i o svin rasan je zna sve.
Kako ja kupujen svaki dan barenko dva foja za štit on bi me uredno moli da mu ji ostavin pa če on ka sutra te moje foje proštit jerbo su za njega novi.
U jedno vrime njegova života ništo se sa njin dogodilo. Prista je navigat osta je živit u naše malo misto i oženi se sa jednon prav za prav pravon ženon iz Sarajeva koja je dolazila u naše malo misto na more.
I sad štorija gre ovako:
Svaki božiji dan smo nas dva bili skupa barenko 8-10 uri. Kako ja za se kuvan svaki dan (a kažu i da bome dobro kužinan) …ja san kuva lipo i za moga kumpanja, a kako neznan skuvat malo uvik san mu u tečicu da i za večeru.
Kako je ti moj kumpanjo bi bez primanja i ni jema pinez vengo je skupja botilje i prodava, pa bi proda i svoj dil ribe ča bi mi dva ulovili ja san smatra da san ka čovik i prijatej koji boje stoji od njega dužan pomagat ga koliko mogu.
Ma zaudobi san jednu lipu anegdotu o naman dvojici:
Kad smo prvi put tribali odit na more bacit dva parangala pita moj kumpanjo mene an mogu li ja od ulovjene ribe kad je budemo dilili dobit 20 posto. Gledan ja njega i mislin se pa ovi ni normalan ma koji 20 posto.
Nakašjen se ja i nako iz duboka sa zadrškon opalin …nemore!
A on pita …kako nemore pa ribari dilu pola brodu a druga polovica se dili među posadon. Ja ga gledan i lipo mu govorin:
–Kumpanjo moj nima ti u mene po brodu pa ostalo dili vengo ja to dilin vako po meni a po tebi i ako ti ne odgovara ti nemoj vazest.
Pogleda me on i nako šeretski …a jesi me ustravija i zajeba mislija san da san puno pita.
Poza tin kad smo dilili ribu uvik je nastoja da ja dobiven boje bokune. On je bi veliki meštar o parangali i od pošta di se oni bacivaju, ja san kupova krenu, udice, olova, konope, kajine za parangale ribu za nadivat ča oče reč ješku, a njegov je posal bi nadit parangal, potopit ga u naše lipo mor,e sutra ga izvadit, pribrat i pripremit za novi lov …a judi moji ni ta mal i lak posal.
Pa ko mu ne bi da pola? To naše lipo druženje o ribarščine se prikidalo u jesen i ja bi parti u Zagreb, ma isto san mu pomaga …da bi mu pinez, kupi bi mu po koji bokun robe, a voli je samo vojnički stil i bome samo ako su originali.
E tu je jema malo mušic ma kad bi ja zabrontula ne bi se štica. Kroz cilo vrime od kad se iskrca sa broda i prista navigat plača je za penšjun doprinose ka ribar a u temu mu je pomagala sestra i žena koja je silon prilik živila u Sarajevo sa malon unukon a dolazila bi priko godine do njega a liti bi bila stalno s njin.
Ta mala unuka od njezine čere je po bila a po Čiroki i to ne obični Čiroki vengo joj je otac pravci poglavica i mala je Čiroki princeza.
I kako život piše priče koje niko unaprid nezna ti moj kumpanjo je uz moju pomoč dobi mirovinu i zaostatke koje je odma lipo položi u poštu na štednju. Ni se odma baš snaša, ma isto je počeja govorit kako če mu sad bit lakše živit jerbo jema stalna primanja i socijalno pa nedaj bože da zatriba more se i ličit dobit mukte bibite a nedaj bože more i u bolnicu mukte.
Ni bidan baš puno uživa u penšjunu jerbo je jednu večer kad je u portu ulovi jednega velikega ugora priko 8 kili piza ča od uzbuđenja ča od sriče skoći mu je tlak i od tega dobi je moždani udar.
Svrši je u bolnicu u Split na Firule ma su ga poslin misec dan poslali doma ka gotov slučaj da doma umre.
Tako je i bilo ma samo za razliku da je umra u bolnicu u Dubrovnik jerbo ga Spliska bolnica ni tila više primat.
Kako je doma bi više od misec dan njegova žena je bila najboja njegovateljica ča san je vidi u momen životu, al zaludu …moj kumpanjo Đek je parti bogu na istinu.
Velika tuga me obuzela jerbo san izgubi dragega prijateja i kumpanja o ribanja i vrlega sugovornika o svin mogućin temaman ma jako načitana i pametna sugovornika.
Eto štioci moji tija san sa vaman podilit ovu štoriju i nadan se da če je moj kumpanjo gori proštit i da če mu bit drago ča san napisa besidu dvi o njemu.
Živi i veseli bili pozdravja vas vaš morski čovik Šangarelo.