piše: Jadran Šantić Šangarelo
E moji štioci dragi u tuđemen svitu
mislija san van se javjat sa štorijan o ribarščini, o strankinjan e e o strankinjan jerbo iako jeman puno lita iza sebe još mi je drago se ošervat za kojon lipo crnkon, ma more bit i plavuša a i riđa svaka je lipa ako je lipa.
Ma ne gre uvik sve kako je čovik isplanira i mene je tako boleština prikovala za likarske vižite a di drugo vengo u našu lipu metropolu jerbo su tamo kažu najboji likari.
Moran van odma spjegat da uvik nosin sa sebon foje dok čekan u filu u ambulantana i lipo štijen od a do ž sve ča notaju naši vrli a bome i kvazi novinari.
Eto sviman je puna pipa šatora i šatoraša a ja san se bome pripa da čedu doč izvanka nika mlajarija i misleči da je u Savskoj niki egzotični kamp pa čedu i oni razapinjat šatore i tako podignit turističku sliku Zagreba. Svako malo oni šjor Glogoški i veliki specijalni policjot Klem održidu tiradu u kojoj ne zaborave spomenit pritnje i stalno zveckaju nikin oružjen ka da su se opet dušmani pojavili i vidi vraga di drito u Zagreb.
Moredu oni u ovoj zemlji ča očedu jerbo jin škinu čuva naša vrla prisidnica koja je ščeto neto sviman obznanila koje je vele. Čas govori o nonu koji je bi u partizane a unda ka grom iz vedra neba Tita udre nogon u guzicu i izbaci ga iz Pantovčaka. Neče da dođe na proslavu proboja logoraša iz Jasenovca ali gospemi oče kako je najavila na Blajburg jerbo je to njena osobna orjentacija. Neče da se kritično ošerva kontra fašisti, ustaš i ostali kvislinzi ma jako je brza za osudit Tita ka diktatora i zločinca ma koliko san čuja iz kuloara uvik jema lipu rić za šjor Antu Pavelića more bit da jon je žaj ča su partizani vratili majci zemlji Istru, Dalmaciju i otoke jerbo da nisu naša prva šjora gospoja je mogla danas bit Talijanka i umisto ervaski spjegavat nan talijanski. Nije dobro jerbo je ona na način na koji etiketira Tita posridno uvridilia 129 državnikov a bome i njiove zemlje jer oni su svi bili uz odar Tita ka velikega čovika, vođu i priznatega antifašista ma ne ka diktatora ka ča naša Kolinda stalno apostrofira. Proslavu Dana pobjede nad fašizmom i to 70 tu obljetnicu je priskočila osin ono malo u Istri a na glavnu feštu ni tila doč jerbo se možda šticala ča su jon antifašisti odbili pokroviteljstvo i za Boga miloga lipo je vazela državni reoplan i diče vengo u Agfanistan jerbo je njozi to ka druga domovina. Mislin se da bi njoj i nama bilo boje da tamo i ostane jerbo bi mogla ka friška povjesničarka čagod naučit i Afganistance o povjesti kad i nas uči onomen ča mi mislimo da ni istina. Ma ni ona sama jezično jaka u suknji, škužajte u gačan jerbo je uvik skoro u veštitu a bata ka soldat dok oda.
Tu je i šjora policjotkinja naša vrla Ruža Tomačić ocvala ruža crnokošuljaša jerbo je ona njiova heroina, a sad je i eurozastupnica pa jema i veči radius kretanja a samin tin i držanja govora. Ona bi jopet mene odnosno nas utirala u niki ludi rat majko moja koji su to sve imbećili, a jema ji koji jon aplaudiraju i koji bi zanjon u vatru ma neče ona u nikakvu vatru more samo u naše lipo more na Korčuli.
Zaboravi san postavit pitanje: ko plača reoplan i troškove za put u Afganistan i zbog koje državne potribe je naša prva šjora gospoja išla na ti daleki vijađ.
Moran ode još jednon pa ko zna po koji put reč kako nisu ni svi Hrvati dobri i pošteni tako nisu ni svi Srbi loši i nepošteni, jerbo svugdi jema žita i kukolja.
Taka bi se malo lipega našega okruglega jubileja najsvitlije pobjede u Domovinskemu ratu i to Oluje i 20 godin našega života poza njon. Razumin ja zašto se navija iz sve snage da cila fešta ostane u Knin a bome se čuje i ona u Čavoglave jerbo su to dvi destinacije ti dana di se okupi cila krema desne populacije i di se veliča ustaštvo i Paveliča a vriđa i zvižde legalno izabranoj vlasti.
Tada tamo nima snage koja bi provodila hrvatske zakone koji branu svaku ikonografiju koja veliča fašizam.
Iako je i metropola postala grad otvoreni vrata za naše desne nadan se da će nas na paradi ipak biti više koji smo kontra svi zala a posebno oni koji su izašli iz ustaško-fašističkega armeruna.
Ove dane se igra velika partija ping ponga između naše vrle prisidnice i još prčevitijega prisidnika vlade, jo da mi je bit viščun pa znat ko če dobit ovu ping pong partiju. Šjora Kolinda priti da je ona vrhovni zapovjednik vojske a naš drčni Milanović kontrira da je on sa Vladon i ministron obrane u miru oni koji zapovidaju sa vojskon.
Judi moji zar nan ni dosta gori problemi koji muče drževu od ovega. Lipo bi bilo a i za turizam da se 20 godin Oluje obiluži paradon u našemen lipemen Zagrebu pa kome to još more smetat, samo ludin judiman.
Od ovega san se umori ma moran još dotaknit onega novega ministra Vargu kojemu bi rado branče izvadi vanka. Koji je to muzevir?! Najpri smanjuje prava invalidiman unda smanjije liste dobri likova koji gradu na ricetu i sa zanje ča je pokuša učinit pustu privatizaciju zdravstva tako da ispade ča kažu novinari u fojiman močedu se lipo ličit samo ona čejad koja jema pineze a sirotinja more krepat i ko je na kraju jebe kako nima višje sridnjega sloja boje bi za sve bilo da nima ni siromaji jerbo su oni i Bogu teški.
Jema bi ja još tega za notat ma dite moje lipo ja zasvirat ma triba i za pas stavit.
Eto, štioci dragi pozdravja vas vaš morski čovik Šangarelo.