Piše: Jadran Šantić Šangarelo
Evo judi moji mislija san da nikad neću za svoga burnega života doživit da se judi i cila država karaju oko tega kad dica smidu činit one stvari i bome kako.
Najprin nisa misli da ču napisat o temu njanka jednu rić ma vrag mi ne da mira i moran reć par besid oli puknit.
Moran odma priznat da mi se jako sviđa ka karakteran čovik ovi ministar Jovanović iz SDP-a. Nako stamen bez dlake na jaziku i gospemi ne boji se crnega vraga a napose oni u mantijan koji su u zanje vrime jako digli repicu i tili bi određivat bome sve pa i kad će i di ko prdnit.
E gospe mi nemore jerbo mi u našu lipu zemju nismo papinska prćija vengo DEMOKRATSKA SLOBODNA HRVATSKA. I sad da se uvatin teme iz naslova .
Valiki fortunal kritik i skandali sa podignuti glasoviman je izazvala ona stara višćica ča su je iz ADZ-a doveli u Hrvatsku da nan ona prosvitli papmet i da nas jadne i neuke uputi kako će nan i kad dičica počet činit one stvari.
Ma judi moji za ngospu blaženu ja ne pantin da san ikad od moje pokojne matere ćuja upustva o tizin stvariman, vengo mi se dogodilo samo o sebe kad san sazrija kako među nogan a tako bome i u možjane i mislin da se ti ciklus ne bi triba nikako dirat.
A ča se tiče ovega zakona mislin da je dobro dici dat upute o boleščinaman i kako se dobiju ma i kako ji spričit jerbo je ovo zanje najvažnije. Nikako me ni jasno zašto su tu staru viščicu JUDITH REISMAN najprin odveli na fakultet pulitički nauk.
More bit da je seks uski proizvod pulitike i da je ona tribala isprat možjane studentiman. Vražija mularija je bila spremna i staru je zasula ka mečava pitanjiman o njenon stručnosti znanstvenin radoviman i ostalin pikanterijan da je stra na kraju popizdila i počela vriđat našu mladost.
U ti momentiman je dekan ZAKOŠEK tu pokaza ka budan i vridan čuvar reda i pristojnosti pa je staru pozva na red i pristojnost da spusti tonove i da ne vriđa studente. Ma zamislite vi judi moji da je ona rekla kako su ti naši mladi pametni judi indoktrinirani komunizmon a oni o temu u svomen životu mogu samo učit iz libri.
Moran malo da se taknen i one gospode u crnim mantiajn jerbo neznan u koje malo misto svečenik koji je bi lip i pametan ni jema jubavnicu pa to u malin mistiman znaju i repci i sad me ni jasno kako oni jemadu morala i zagovarat ćudoređe.
Eto ja se sičan dva primjera jedan je tamo iz šezdeseti godin kad je u neretvansko misto Krvavac svečenik minja župu ( a zašto to znaju njegovi šefovi ) da je za njin plaka samo ženski dil tega mista.
Pa onda u naše novo vrime oni svečenik sa konjskin repon do po leđ je javno na motorbičikleti liti po Opuzenu i ušću Neretve vozika prilipjene za leđa iza sebe gol do pasa sa Rey Ban očaliman ženskice u bikinijiman a priznat čete di jema dima jema i vatre.
Nisan ja ovo reka da koga optužijen bože sačuvaj vengo da se i nji razumi jerbo su i oni judi o krvi i mesa i da je crkva pametnija ukinila bi celibat a samin tin činon ne bi više bilo tajni jubavnic meju popiman, pedofilije ma mislin i bome manje pederi meju popiman.
Evo moran reć i vrlo važnu stvar da mi ne gre u možjane koji je to bi salto mortale o onega našega najvećega bivšega šefa o državni špijuni Karamarka koji je bi domaćin ka pozivatej one stare višćice.
Kad je vidi koju je smutnju učini ni se pojavi ni na jednomen njezinome dvoboju sa puplikon. Čini me se da je učini škerac i to u vidu greške u koraciman pa kad je doša do tega zakjučka da je fali i ni se tija još više blamirat.
Jema on svoji vrli vitezov za bacivat Jandrokovića, Stiera i da više ne nabrajan. I sad ono glavno:
U stara vrimena kad ni bilo letrike, natalitet je bi najveći u nas Hrvata jerbo kad bi pa mrak šterike i petroje za sviće je bilo skupo a zmi i drva za grijanje pa je bilo najboje leć u posteju i lipo se igrat sa sebon.
U ta vrimena su se cure jako mlade udavale i sve su bračne obaveze učinile jerbo onda se ni u skulu o temu učilo vengo joj je mater oli nona prinila znanje i sve je bilo lipo šesno i veselo ma bi je problem ko če toliku dićicu ranit.
Dunkve da priveden kraju ovu trakavicu moran reč da okad je svita i vika uvik je bilo kurbaluka, razni boleštin prijuba pederluka pedofilije, a da ne spominjen da su onda judi bili neuki ma gospemi o tin stvariman su sve znali.
Arheologija je na svitlo dana dala artefakte i to karta kanta o kad se piše slika kipari sa teman i fregmentiman o seksu i pornografiji i do danas se ništa osin celofana u koji se to pakiralo ni prominilo.
Tija bi ovo zakjučit i reč dicu triba naučit ča nesmidu i ča jin škodi zdravju a o ostalin stvariman priroda će učini ka i uvik svoje.
Uvik če bit oni koji su udreni u možjane i koji če bit devijantni za nike če se doznat a drugi če svoje perverzije radit šakreto i tu ni dragi bog do danas ni ništa pozitivno učini a mislin da i nemore jerbo smo svi učinjeni na sliku i priliku njegovu.
Eto štioci dragi živi i veseli bili zdravo se i zadovojno seksali i starost sa mudrošču doživili.
Pozdravja vas vaš morski čovik Šangarelo.
Bravo!