piše: Jadran Šantić Šangarelo
Sve san mislija da ču pasat lišo do partence na more ma je, malo sutra. Neda mi vrag mira jerbo ka penšjunat jeman vrimena pa štijen po dva tri foja na dan.
Uvik očekujen ajde danas če bit lipi naslovi ma ono te svaki dan udre u možjane sve jače sa škandaložin nasloviman i ajde ti onda ostani miran i nemoj se neurozirat . Očeš šipak da ne lanen čakod gore. Stalno se ti naši bajni novinari bave istraživačkin radon i to bome sa uspjehon da mi se čini da i po noči radidu na otkrivanju spletki a more bit da ji oni sami izmišljaju a to bome ne bi tribalo u ozbiljnemu novinarstvu.
Reka san miljun puti odnija đava onega ča je izmislija kartice o plastike ka platežno sredstvo jerbo je odma zavija u crno puste fameje, pojedince koji nimadu krimen poznatega svita i na kraju naše bajne pulitičare koji bi ka judi tribali bit čisti ka najboje cviče u pitaru, ma ni to moguče jerbo kad ti se da, da sa tuđin kurcon ledinu mlatiš unda to radiš žešče nego sa svojin i odma se izgubi regula.
E kad se to dogodi onda novinari počnedu kopat i iskopadu puste skndale u kojiman okrive jadne naše političare i prisiljavaju ji da dajedu ostavke na lipa mista i još veče plače sa državni jasal, a dogodi se da dobiju i šup kartu ma niko ne odgovara za ništa vengo još jemadu pune plače za lopovštinu i nerad 6 miseci i unda još 6 miseci po one malešne plače. Niko od nji njanka da primirišu vrata remetinca.
U zanje vrime kad san van nota zanju štoriju mislija san da je za ovo vrime prin moje partence u lipu i šesnu moju Dalmaciju bilo dosta škandali kad poza tin ka dičiji romani u nastavcima još i gore. Eto ona šjora gospoja koja je ka trokrilni armerun sama sebe je bez kamat kreditirala iz kase ministarstva i lipo pomalo na rate vračala šolde, ma ispostavilo se da ni samo ona tako krela jerbo još jema osumnjičeni.
Kako u nas u pulitiku uvik jema patroni tako je i šjora gospoja Pusić a i ona je u donjemu dilu ka Barbara široka boka svoj kadar pokušala zaštitit jerbo ni virovala državnoj inspekciji. Pa za gospu komen češ za take stvari virovat ako ne državnoj reviziji ma ne onon sa šjora Šimon Krasić na čelu jerbo je i ona jemala masla na glavi vengo ovoj sada koja nikoga izgleda ne ščedi, no vidit čemo kad če se oni pokvarit jerbo mic po mic svi na kraju ispadu mučki.
Naš vrli premijer ni jema muda odma dotičnoj ministrici a i šjora Pusički dat šup kartu iz vlade jerbo i on sam ništo mutno kemija. Ajme ti ga naman sa onima prin ako se vrate n a vlast , a ni sa ovin nan cviče ne cvate,samo drača, sikavica jad i nevoja nas jubi.
Prin nikoga vrimena smo jemali napis u kojem je šjor naš veleuvaženi Đuro Glogoški ispa osoba koja jema misečnu rentu ka prisidnik vlade i unda su desni reakcionari kukon i motikon drvjen i kamenjen napali novine, novinare, premijera i bidnoga ministra Matića da su oni naručili te napise i spletke koji od tega stvaraju afere ma niko ni reka je judi čovik stvarno jema lipu misečnu poputbinu pa ča to je i zasluži . Evo nova afera oko našega dičnega i poštenoga šjor Đure Glogoškoga koji pet i po miseci priko dana prosvjeduje u šatoru kontra vlade, kontra ministra i njegovi pomočnici a niko ni reka di ti jadni čovik spava jeli u šatoru joli u otelu. Ma da je bilo u šatoru bi bi se jadan razboli moga je uvatit punturu i partit bogu na istinu. D
a je odija u bilo koji otel niko je triba platit te troškove zato je bilo najboje u ministarstvu maznit kjuč o kuče koja je data udruzi šjor Đure na korištanje za 100% invalide ii koja je tribala bit spas za one koji na par dan dolaze u Zagreb na likarske vižite a naš vrli šjor Đuro je okupira tu kuču ministarstva Braniteji sa svojoj suprugon i prijatejiman jer koje vidija išta plačat kad je država za koju su ginili krava muzara. I jopet je ispa skandal . Oni body gard šjor Klem je odma napa iz svi oružja i kaluna opet iste osobe ka i pri ma nije da njanka besidu u obrazloženju okupacije kuče ni nikakvo oprvdanje za taki čin jerbo kako kažedu u Trogir „reci joj majko da je kurba dok ti ni rekla za te“. Tako da se dimnin bonban zakulisaju svi škandali.
Ma judi moji sad bi po meni tribalo lipo ispostavit račun šjor Đuri i njegoviman za korištenje i najam kuče a i za trošenje struje i vode a bome i za odvoz škovaca pa bi se unda neki posli opametili. Kako je šjor Glogoški uz šjor Klema medijska zvizda bi je do ovega škandala uvik vojan javit se novinariman i bit na raspolaganju ma ove zanje dane nesta je u ilegalu jerbo se nikomen ne javja i sad se triba zabrinit jerbo mu je možda sve ovo prisilo i naškodilo zdravju. Bidni čovik.
I na kraju ove tirade bilo bi u najmanju ruku nekorektno ne dotaknit se one naše nove muškobanjaste prisidnice šjore Kolinde jerbo se jema i onjoj čako notat. Izbacila je uz pustu pompu bistu drga Tita sa pantovčaka jerbo bi jon on narušija imiđ kod oni VIP gostiju sa inauguracije a i kod sve desne populacije tako da je sigurno kod nji pokupila koji punat više u svoju korist. Cili normalni svit se zgraža jerbo smatra da se to ni tribalo dogodit ipak je Tito bi povjesna veličina a to mu je svit prizna kad su se na pogrebu uz odar skupili 129 državnikov koji sigurno ne bi riskirali svoj ugled i osrmotili svoje zemje da su smatrali da je Tito bi diktator kako je rekla stamena šjora Kolinda.
Moran reč da je postalo alarmantno i zabrinjavajuče kad ista gospoja kaže da ona nikad neče dozvolit da se Tita veže uz antifašizam. Možda je ona na nekomen drugemu planetu živila i učila o povjesti drugega rata di lipo stoji da je antifašistička borba na području bivše države pružila najjači otpor Hitleru i okupatorima te tako direktno utjecala na tijek rata a načelu ti ratnikov ka strateg i vođa koji je zna bit i ranjen je bija niko drugi vengo TITO.
U našemen Domovinskemu svetomen ratu naš prvi prisidnik i zapovjednik Hrvatski soldati nije ispali ni metka na neprijateja a ni direktno ni bi za vrime ratnega djelovanja na prvoj crti bojišnice. I na kraju kad je partija bogu na istinu na odar mu je doša jedan jedini šjor Demirel. E tu se vide razlike između državnikov i njiovi vridnosti od svita priznati.
Poručija bi našoj vrloj prisidnici da je ANTIFAŽIZAM utkan u ustav RH i da bi bilo dobro da barenko promisli prin davanja važni izjava jerbo svit sve to snima i poslin nan može sve doć u vidu bumeranga ka politički piz oko vrata.
Eto štioci moji u očekivanju dobri a ne loši vjesti živi i veseli bili pozdravja vas vaš Morski čovik Šangarelo