piše: Jadran Šantić Šangarelo
Jo judi moji i dragi štioci ovega našega foja ča se zove Otvoreno more niko na svitu nemore predvidit situacije i barufe koje zadesu nas ribare.
Eto jutros san proštija zadnji broj našega foja kad tamo u priči od onega prijateja Slovenca jopet moje bezime se spominje. Kako to niki judi neznaju da sve ribarske priče nisu bajke ni izmišljotine.
Eto moj kumpanjo Žorž je parti bogu na istinu a ja san još bome u motu, pa ne bi ja sramotija lažiman ime svoga pokojnega prijateja. Je za uvik neka se zna i neka bude notano mi smo ulovili one ovčice na ušču Neretve a ko to neviruje moran bit malo prost pa mu po našku Dalmatinsku poručit: jebe me se ča ko ne viruje.
Ovi naš kumpanjo Andrej Balanč oliti kako u nas u Dalmaciju sve prikrste tako i njega ču ja prikrstit u Andro napisa je lipu štoriju koja me odma asocirala na jednega moga kuma.
Čovik vridan ka crv ma jopet ča bi rekli u nas u Split po vlašku pametnega ka da je dobi diplomu o fakulteta čin je ispa iz one materine stvari. Ti moj kum je čovik u čije bi ruke uvik da sebe i moju fameju, a ustvari je bi kum o moga pokojnega sina a ne moj, ma kako smo se jako zbližili zovemo se kume ka da smo mi dva kumovi a u stvari i jesmo jerbo ja vodin konte o njemu i njegoviman a on jopet o meni i mojiman.
E ti moj kum je bez veliki skuli posta meštar o svi zanati na ovemen svitu pa tako i meštar o kovačije ma ne svake vengo samo o kovačije ča čini osti za sve razne ribolove ostiman kako u more tako i u riku Neretvu di žive u najlipji mali gradić Opuzen.
Kad vas put nanese u njegovu garažu i kad se ošervate i pogledate nadase morete vidit cilu izložbu od ostiju. U njegovoj garaži jemate osti za tuč ribu po mrkenti ča oče reč po stinan i te su osti posebno kaljene da se nebi istupile oli nedaj bože iskrivile, tako da mi ni jasnoi kako su one osti ča su bile u Mornara bile nako tupe da nisu mogle probit škinu o Lubina kad tamo u Mornara život ostavja moj veliki prijatej Ivan Bronzović Bronza koji je život da za ronjenje ma i za svaku vrsti ribolova.
Poza tin jemate lipe osti sa 12 zubi za normalo tuč ribu kako u more tako i u riku a u Opuzenu se najviše u riki Neretvi lovidu Cipli i Lubini sa kraja oliti Bajera ča oče reč nasipa uz riku tako da je za drvenu palicu koja je duga od tri do četiri metra vezan lipi tanki ma jaki konop jerbo kad ribar itne osti i pogodi ribu da je more povuč na kraj ma isto je i kad promaši mora osti vratit sebi i nastavit. Kako se širi repertoar ribolova ti moj kum kuje i radi osti za lovit žabe pa za hobotnice i svu moguču divjač ča pliva ispo površine rike oli mora ma za lovit velike šarane u riku tribadu posebne jake osti jerbo je valiki šaran jak ka tele i osti ga moradu probit a nesmi se drvena palica oliti salma kako se u Neretvu zove slomit.
E sad gre štorija. Jedno jutro prin pet šest godin u lito oko 4 ure zvoni mi mobitel, i ja se javin a moj kum ka iz topa:
-ajde molin te probudi mi starijega sina koji se zove Elvis i dojdite na Napoleonov prokop i donesite 15 gajbi o mandarina.
Ja nako bunovan iza sna ka blento pitan a ča če ti gajbe pa mandarine so još ne beredu, a moj ti kum popizdi i dreku name samo dojdite i donesite gajbe i više ne pitaj pizdarije. Oden ja u njega doma probudin maloga ma ke maloga kus momka i mi dva u prikolicu ukrcamo gajbe zakačimo ji na moje auto i pravac Napoleonov prokop.
Došli mi doli a moj kum stoji u jednemu lipemu kajiču koji san mu ja pokloni do kolina u šaranima. Jo gospe moja koji je to bi prizor. Počela zora rudit budi se dan a moj ti kum ka poglavica indijanac koji je sredi generala Custera u Amerike stoji među šaranima svi mogući veličina i smije nan se u brk.
Pitan ja a, a ča je ovo a on meni:
–pizdunu, ulovi san ji u jednemu kanalu i nisu jemali di uteč.
Počeli mi iskrcavat šarane koji je bilo u rasponu od dva do dvadeset pet kili i punit one plastične gajbe o naranač i sve smo ji bome napunili pa smo svratili usput na otkupnu stanicu Konzuma za izvagat jerbo je več bilo šest i po uri.
I zamislite kad smo odbili sve tare od prikolice do gajbi ispalo je da je ti moj kum ulovi 135 kili šarana. Jo ča su se činile brudetade i puste gradelade ma je jopet i ti šaran dopizdi jerbo nemoreš dva do tri puta na šetemanu jist istu ribu na sto način.
Zašto san van napisa ovu štoriju zato da one nevirne Tome natiran da počnedu mislit da svi veliki ulovi nisu izmišljene štorije o dokoni ribari oli razni fločuni vengo da i tamo zna bit prave istine.
Eto za sada jemate četiri svidoka ovega velebnega ribolovnega događaja, mene …morskega čovika Šangarela moga kuma Dujića njgovoga sina Elvisa i bome moju kumu Danicu koja je meštar o kuvanja.
Do druge prigode živi i veseli bili štioci moji a moran pozdravit i našega dičnega prijateja iz Maribora šjor Andru i poručujen mu da bi voli da se upoznamo.
Sve vas od srca pozdravja vaš morski čovik Šangarelo.