KIŠNE OVČICE

ŠTORIJE IZ MALOG MISTA
piše: Jadran Šantić Šangarelo
Sidin doma u lipo ugrijanome kabinetu i dok vanka snig pada sve sam sa sobon ka sa pametnin čovikon razminijen misli. Pa me je na pamet moj dragi pokojni prijatej Ante Gudelj zvani Žorž. More bit da san van več o njemu govorija a more bit da i nisan ma šoma dela šoma ovu štoriju ču van ispripovidit jerbo je zaslužila da je se nota.

Dunkve, moj prijatej Žorž i ja smo jako često odili na ušče Neretve i iz mojega kajića lovili ribu. Jednega lipega litnjega dana došli mi na ušče i sa špurtelon iz kajića luvili kocke (male kozice) za ješku …jerbo je ka prvo najboja za sve vrsti ribe …a ka drugo jema je koliko ti duša oče …i mukte je.

Kako smo obično potizali tri do četiri puta …a ti dan je bilo malo naoblačno …baš vrime za lovit …mi smo potegli šest puti i lipo u kraj pribirali kocke od morske trave i sitni spužići, pa kad smo završili, partili smo lovit.

Kako na ušču jema puno razne ribe …partili smo na veliku poštu na Arbune pa ća bude. Bacili smo sidro jerbo je kurenat jak i počeli smo lovit. Bogami bilo je lipi arbuni a kako je moj prijatej Žorž bi specjalista za Bukve on je malo doli …malo gori i lovija kako bi on reka mišano meso.

Sve nan je lipo išlo do podne i onda je naglo stalo. Nije tilo grist ka da se riba šticala  i gotovo.

Gren ja dignit sidro za prominit poštu a moj Žorž, se uvatija lipo očistit ribu dok smo na otvorenome i čistome moru.

Odlučili smo otić na Galebov sprud …a to je di se glavna velika rika Neretva uliva u more,  jerbo i tamo jema lipe ribe i bome digli smo desetak lipi glamaca skoro kilo i po u njiman,a bilo je i mali orada i za nevirovat skoro dva kile lipi Pauci.

Ja san se  najviše  veseli Pauciman i Glamciman i posli nikoga doba i tu je pristalo grist. U međuvremenu se još jače naoblačilo i mi smo se pripomistili na drugu poštu za lovit Ovčice oliti Arkaje kako mi iz Splita rečemo.

Bacili smo sidro u pličak …ni bilo više od metra i po dubine …i polako bacivali dvadesetak metri o nas i polako vukli po dnu da olovo zamuti jerbo tada Ovčice najboje grizu. I bogami počelo je jedna za drugon …i to sve lipi komadi …kad u nika doba udrija pjusak.

Štačemo sad lipo se lovi …ma kalalo je nebo na zemju i mi odlučimo ostat lovilo se još boje …sve lipi bokuni od 25 deki pa gori …i onda smo na smjenu šekali kajić, tako da jedan ne prikida lov a drugi šekaje i minjali smo se.

Jo judi moji koji je to bi ludi litnji dan bija. Srića da je bilo teplo, inače bismo se razbolili i mogli smo uvati punturu, a bogami kako je moj Žorž stariji čovik …bi san se pripa pa san njemu da kabanicu, a ja se svuka u kupače mudantine sa litnjin šeširićen na glavu da mi kiša ne skvasi očale jerbo onda ne vidin.

Ulovilo se tega dana čudo …ma počela je đeložija, jer oni ća šeka nemore lovit i unda smo posli nikoga vrimena pristali šekat. Kako nije bilo duboko ni nas bilo straj da čemo se afundat.

U kajiću je bilo vode do gnjata i mi bi svaku novu ribu skinili sa udice i bacili je u kajić podanak nog tako da bi plivale dok nebi zabelugatile, jerbo je u kajiću bila kišnica slaka voda, a morsku ribu to ne sladi.

U nika doba je pristala kiša i odma se slabije lovilo a  mi prominimo poštu i uz put i išekamo kajić.

Na tu novu poštu smo uvatili dvi tri Oradice i vidili da je svršija kurbin pir …pa smo lipo smotali arte i na mulu di ja vežijen kajić na ušču i počeli čistit ribu. Ni odma izgledalo da jema  puno ribe …ma poslin uru vrimena još nismo bili sve očistili i onda smo počeli bacivat u more one manje a čistili smo samo velike.

Kad smo u nika doba zgotovili čiščenje bil su deboto dvi velike kante o jupola pune. Majko moja nismo nas dva nikad toliko ribe uvatili.

Kad smo se vratili doma počeli smo dilit ribu prijatejiman, a zase smo ostavili one najboje bokune kako za gradele tako i za juve i brudete, moran van spjegat da smo cilu šetemani jili ribu tako da nas je skoro štufala.

Dežurni misni zajebanti nisu mogli doč sebi kad su vidili ti ulov a mi smo prije nego smo odili doma ka da nije naš posal sa otvorenin kantaman sili isprid gostione popit lipu ladnu biri i priko oka smo kibicirali kako jin justa ćinidu vodu na naš ulov.

Eto mora san van ovo notat jerbo bi bila grijota da san zaudobija kako radim, ene tako i radi moga pokojnega prijateja Žorža.

Živi i veseli bili štioci moji pozdravja vas vaš morski čovik Šangarelo.