ŠTORIJE IZ MALOG MISTA
piše: Jadran Šantić Šangarelo
Jo judi ča je ova priroda i klima ćudjiva, nemore se ćovik ni snać na jedno vrime a ono te ka baton opali drugo i ajde ti budi u redu sa zdravjen u ove moje godine bez tlaka bez cukra bez kolesterola a prognoza te tuca u glavu. Ma svi znate da sve gre iz glave doduše nikiman gre iz guzice ma o njiman nećemo ovi put. Dunkve moran van pripovidit najnoviju štoriju o sinoć. Jučer je dan lipo počeja i parilo se da bi ja i moj kumpanjo Đeki mogli bacivat parangaliće ma vrag ne ore a ni kopa vengo uvik o zlu i barufama sanja. Nadija moj kumpanjo jedan parangal i mi se popodne oko 7 uri spremili za na more kad tamo za gospu sinjsku udrila tramuntana. Dere li ga dere gospemi more zapinilo digli se valovi skoro o metra i di češ po temu na more moredu samo ludi i berlavi. More se i glavu ma i guzicu izgubit a nikakva riba ni tega vridna i ća ćemo sad, oćemo li raspremit parangal to je velika rabota i zajebancija i u zanju ka spas iz vedra neba moj prijatej ugostitej Osvit radić zvani Baletić vlasnik poznate gostione „Naše malo misto“ spasi je situaciju. Ja nako sav grintav i infotan sujen sve u šesnest a on mi dojde i ka da mi ni ništa zapita mrtav ladan, a ča ti je pa moreš cili parangal nadiven stavit u mene u gostionu u frižider jema mista. Ja se zablenija i ni mi kjaro ma brzo san se rekupera i zafalija momen Osvitu i lipo spremija parangal u frižider. Računan da bi ga moga dan posli bacit u more. I tako kako je dan odija kraju tramuntana je sve žešče i žešče cipala i pinila more i dizala bote pa ma koje bote. Partija san doma jerbo je malo i zaladilo a bi san u kratke rukave i požurija san doma da mogu uteplo gledat TV. Nigdi oko 10 uri navečer mi se učinilo da kroz ponistru o vrat na teraci vidin u mrkloj nočini svitla od nekega broda, majko moja ča je to plesalo gori doli da ne poviruješ jema san osječaj da se more igra sa tin brodon ka sa igračkon. Vrati san se mojin krim serijaman i oko bota poza ponoći lipo otiša leč. Kako san jučer zaboravi izvadit čep na brodu za pražnjenje jutros san rano otiša do porta da to učinin jerbo je nočas dobro kiše palo pa da mi voda ne leži u brod. Tamo sritnen malega Lazu Ogija o moje žene prvega rođaka i on mi ka dežurni informatičar govori …a jesi čuja ća je sinoć bilo? Kako ja niman pojma pitn a ča i on počne štoriju. U Bristu je nevrime prikinilo konop od jedne pašare kojin je bila vezana za kolpo morto i valovi sa vitron su tu pašaru nosili drito prema naman u Gradac. Bidni čovik čija je to pašara doleti je auton u Gradac i iska pomoć da bi spasi pašaru da je more ne razbije o stine a tek ju je kupi i novu pentu na njoj jema. Svi su se u „Naše malo misto“ uzneverali ma niko nima dobar brod za tu neveru i more osin jednega miščanina Bačana iz vale Bošac i jednega bosanca Dragana koji se naseli u Gradac. Kako nisan bi na licu mista neznan jeli ko zva Bačana oli ni tako da o temu nemogu ništa spjegat. Drugi čovik ti naš naseljeni bosanac jema tri lipa broda jedan veliki za privozit turiste i dvi koče jednu manji i jednu veču. Nastala je potraga za tin bosancon jerbo niko ni jema broj o onega nesriknjega mobileta. Na kraju su ga našli ma pašara je več bila na po naše vale prema Pločama i ti bosanac a mora mu se priznat da je pun korađa upalija je motore o jedne koče i otiša u neveru lovit pašaru. Potraga i lov je bome traja lipi tri kvarta o ure ma na kraju su uspili ulovit pašaru po temu kurbinomen vrimenu privezat je za koču i doteglili su je u porat. E i tako san ja poveza ona svitla na more o sinoć a nisan zna o čemen se radi i sad san lipo dozna. Od dežurni misni pripovidača kojiman ni strano izventat ništo i nadodat čuja san da je more u konalu prema Pločama jemalo u fortunalu vitra valove velike o5 metri, i kad to znaš onda triba našemen bosancu malešnoga rasta a velikega srca dignit kapu i čestitat mu na korađu i na motiman pravega pomorca. Eto štioci moji kiša je malo oduminala ma naoblaka nikako da se razbije a gledan kroz ponistru kako tramuntana opet dere i dere tamo o Splita prama Pločama tako da mi se pari da me neće kurbino vrime ni danas molat da bacin parangale a moj kumpanjo Đeki stalno ronja …propast če sardela na parangalu morat čemo je bacit i nove friške nadit …a kako on stalno prati sve o moru i vrimenu i mogu reč da se u to jako tendi stvarno nan se danas ne piše dobro. Eto zdravi i veseli bili štioci moji i dobro mi stojte i do nove štorije pozdravja vas Vaš morski ćovik Šangarelo.
Subscribe
0 Comments