piše: Jadran Šantić Šangarelo
Mislija san da san sa ovon godinon završija sve moje štorije koje san tija notat na kartu u ovon 2014 godini. Je šipak.
Poslin lipega vrimena na badnju večer i za Božić i na svetega Stipana danas je malo zaladilo i svaka me žunta tila boli jerbo moje stari i izmučeno tilo čuti velike promine vrimena. Kako ni bilo tri dana za kupit foje jutros san izaša na kafu sa mojin prijatejon Boron i na povratku doma kupija san Jutarnji list i onu malešnu trač novinu 24 Ure.
Lipo kuntentan ča mi je kafa lipo legla sa travaricon iz Šibenika otvorin male foje kad tamo štorija o autiman pokojnega druga Tita i to dva statusna auta iz jamerike a jednega od nji mu je naručija i poklonija sam Kenedy.
Ka šakon u možjane me udre vjest u Jutarnjemu koju čitan kako rat još ni gotov. Malo san se uznevera pa se mislin a di to u koju državu i čitan daje. Judi moji ovo stvarno ni moguče ča bi reka pokojni Mladen Delić jerbo iz justi mladega popa salezijanca i studentskega kapelana don Damira Stojića izlaze pozivi na produženu mržnju i na novi rat.
Kako je u nas več niko vrime jaka tema popbačaji joli abortusi sve su se file judi svi profili dali u komentare i kritike sa svojin mišljenjen ka jedinin i to za i kontra. Jedni su za, drugi kontra, treći nemaju pojma ča bi mislili i rekli o toj temi samo tamo niki mladi pop koji vjerovatno legalno neče nikad bit otac (more samo šakreto) uzima sebi u justa teške beside o ubojstvu beba. I to ne bilo kojih oli čijih beba vengo HRVATSKIH beba a koje dolazidu iz Srbije ubijat u našin ustanovan srpski likari zlikovci jerbo u tin legalnin ustanovan abortuse radidu stručno i za ta ubijstva (abortuse) još jemadu obraza naplačivat svoj trud.
I gle vraga ispada da su masovna ubojstva koja su radili ćetnici u ovenu našemu Domovinskemu ratu u Škabrnji, Vukovaru, Srebrenici i na druga mista izjednačuje naš vrli i parlativon jaki don Damir Stojić sa ti pobačajiman a za njega govoridu da njegove propovidi slučaju u velkomen broju naši maladi posebno študenti.
Ajde sad budi pametan kako če ti madi formirat svoje možjane nego devijantno paranojično kad slušaju take prolome mržnje i podmuklega poziva na rat pa to je ne samo da popizdi uzoriti šjor Bozanić vengo cila biskupska konferencija a napose bi tribalo ovake slučajeve prijavit i samome papi Frani.
Eto od badnje večeri do danas niko od naši vrli veliki biskupi ni da kritiku ma njanci malešni osvrt na bljezgarije izrečene od don Stojića a ti dični don Damir Stojić je tu svoju propovid održa a di drugo vengo isprid blagosovjenega šatora u savskoj ulici napačenin i umornin invalidiman i branitejiman kojiman je za spasenje i mir duše tribala samo takva huškačka retorika mladega duovnika.
Da ne bi skroz citira Antu Tomića reč ču samo to da je najpametnije reka kako nezna ča bi misalija i napravija po pitanju abortusi jerbo su to vrlo škakjive teme. Žana ima pravo vlastitega izbora a zna se da su mnoge zbog pritnji o dobivanju otkazi pobacile da spasu vlastitu egzistenciju. Ajde neka mi neko reče kjaro ča činit.
Mislija san počet štoriju sa meni dragin don Vladon Košićen jerbo je on neiscrpni izvor svakakvi izreka pritnji i sijanja simena mržnje meju hrvatima pod zaštitničkon kapon majke crkve. Najnoviji biser je zasja iz njegovi just kad je reka da on ne bi da šjor Josipoviću i Milanoviću da dojdu na njegovu misu. Ako je misli na njegovu misu koju drži u svojoj privatnoj crikvi onda jema na to prav. Moran odma zapitat dragega boga zar su crikve u vlasništvu pojedini popi joli crikve ka institucije u ovemu slučaju crikve u hrvata.
Ni mi je jasno kako to misli vrli don Košić zabranit dolazak onima koji mu dajedu plaču priko onega nakaradnega ugovora kojega je potpisa pokojni Tuđman sa Vatikanon a takvi ugovor nima više ni jedna država na cilemu svitu i okolici. More bit da don Košić misli i smatra da je on mesija i da jema posebne moći nedat judiman uč u crikvu.
Do sada je bilo jako bjelodano da don Košić, Don Stojić i još mnogobrojna popovska bulumenta stoji čvrsto na desnin zasadama i da im do demokracije nije stalo a posebno one koju slučajno vode liberalni ljevičari koje je fala bogu izabra hrvatski puk (koji je samo stado navedene popovske strukture).
Isto tako se nameče misao da mržnja koja je zadojena u tim ljudima našemu narodu ne želi dobro nego vječnu podjelu na crne i crvene ,na live i desne a to narodu ne donosi svitliju budučnost.
Svaki pastir svoje stado tretira ka blago i o njemu se tako brine pa bi se i naši duovnici judski pastiri tribali tako odnosit prema svome juskome stadu a ne širit mržnju.
Kažu ba je bog velik i da sve prašta pa neka i njima da oprost jer njiove duše nisu mirne a tribalo bi ji za stalno maknit od oltara i propovidi a za pokoru neka ustrajno uče o onome jubi bližnjega svoga.
Evo dragi moji štioci pa bili po uvjerenju livi joli desni želin van sve najboje uz puno zdravja jubavi i razumijevanja bližnjih u novoj godini i da nan se ovake scene sa oltara više ne događaju.
Pozdravja vas od srca vaš morski čovik Šangarelo.