Jo da mi je bilo dobit nji dvojicu u niki stari Zagrebački portun
piše: Jadran Šantić Šangarelo
U zanjoj štoriji iz velega mista ča san van je nota obeća san da ču se odma javit čin se skalan na more i evo me.
Jo judi moji koje me je nevrime pratilo od metropole pa sve bome do svetega Roka a poza njin čin san ugleda more vrime se popravilo ka da nisan bi u istu državu ma i ja san se boje ćutija.
Kako se od moga zanjega javjanja puno tega dogodilo neznan bome od čega bi poćeja.
Ma evo počet ču o problemiman koji su zadesili sve invalidne osobe koje su gluve joliti one ča jemadu oštečen sluh. Svin tin judiman tribadu slušni aparatići koje nosidu u uvu joli iza uva ma svi oni radidu na baterije koje je bilo moguće dobiti na doznake HZZO-a. Meju tu kategoriju svita spadan i ja jerbo san za vrime ovega nesriknjega rata ogluvi od detonacij minobacača 120 mm.
Kako u našu državu svaki dan nike budale joli hoštapleri donosidu revolucionarne odluke da bi se u državnu blagajnu uštedilo čakod sitni pinez tako je i ovi novi na čelu HZZO-a doni uredbu da u buduče svi moramo iz svoga žepa plačat te baterije a ti trošak za našu jadnu državu je manji od cine auta ča ga dotični „gospodin“ vozi na trošak svi nas a bome i jema otvorenu karticu za benzinu.
Kad san se dotaka auti moran odma naglasit da bi mi ka siromašna zemja tribali donit befel da ni jedno državno auto ne smi koštat više od 100000 kun i unda bi u državnoj blagajni bilo od tega befela pinez za dilit i siromajiman.
Kad san ja partija u penšjun ka HRVI pokojni Francek je reka javno vi gospodo ča ste prolili krv za ovu državu do kraja svoga života jemate besplatno ličenje sve bibite koje tribate a da o ortopedskin pomagaliman ni ne govorin.
Po našku ko je reka poza njin je neko to i poreka.
Nisan nikad moga ostvarit pravo na toplice. Ortopedsko pomagalo moran nadoplatit i sad kako stvari stoje morat ču plaćat i baterije a da van rečen bez da me iko pita joli aviza smanjili su mi penšjun pa di to ima da se stečena prava moredu kako kome k…. pade na pamet minjat.
Čitan gori u Zagreb veleumne pizdarije i gluposti onega čoravoga ka i ja Begovića kako termoelektrana na garbun ni štetna i da je strateški gospodarski potez za državu i da se jednoj od zadnjih endemskih močvara u Evropi ( Neretvanskoj dolini ) neče dogodit ništa a da bi ta izjava imala i težinu bivši ministar prometa kapetan Pavlović diretur luke Ploče kaže da če se otvorit 150 radni misti i da če termoelektrana donit prosperitet dolini Neretve i Neretvanskemu narodu.
Jo da mi je bilo dobit nji dvojicu u niki stari Zagrebački portun sve bi ji bi skalamaštra jerbo su to svjesni razbojnici koji radidu o glavi cilemu pučanstvu doline Neretve a i samoj dolini .
I tako jidan i infotan san doša na more a tamo me prijateji iz udruge „EKO GUNDEVAJ„ iz Graca zovedu na prosvjed u Ploče kontra TE. Dakako da san se odazva iako san bi cili krepan od puta ma triba bandi u brk spjegat sve ča misliš i još jin pripritit.
Nikad Neretvanski gusari nisu trpili ugnjatavanje, pa za gospu milu njiman su i Mlečani plačali danak da bi mogli slobodno plovit i trgovat. Sinoć san čuja puno pametni besid i jako me drago da san bija na temu prosvjedu a steka san i dojam da če borba bit rovovska kontra narodni dušmani i kojekakvi lobija koji samo gledaju svoje portafoje. Sinoć je jedan Akademik nisan zapametija ime drža jako stručan govor potkripjen činjenicaman i brojkama koje su me zaprepastile .
Evo dok ovo notajen sve mi se trnci uz škinu dižedu prema gori pa majko moja kad je moj pokojni ujac NARODNI HEROJ iz drugega sviskega rata i ADMIRAL STANKO PARMAČ jema viziju o hrvatskoj kaliforniji koja če proizvodi ranu za nas i za po evrope nepismen svit ga je gađa gnjilin pomidorama i pokvarenin jajiman ma on ni odusta i napravi je raj na zemji koji je od Neretvanskega siromašnega seljaka stvori bogatune a huni i avari iz stranke ZNA SE lipo su podilili izmeju sebe ono ča je bilo najboje a ostalo rasprčili i uništili i sad se jopet javja jedan iz stranke ZNA SE koji oče udrit zanje brokve u kapsil NERETVANSKE DOLINE.
Toliko san se snerva da moran prikinit a ostale ču teme vaman notat drugi put ma samo bi vas sve molija da oni koji se slažedu samenon da triba zabranit TE Ploče neka se javjaju priko svi društveni mriža i neka podržu borbu Neretvanskega naroda za čistu ariju i vodu i ekoiloške poljoprivredne proizvode a da ne govorin čisto more i turizam te uzgoj kamenic i pedoći u Neretvanskemu kanalu.
Do sljedeče štorije živi i veseli bili i ne mučile vas ovake teške teme ka mene .
Pozdravja vas vaš morski čovik Šangarelo.