EVO I NAS DI SMO DAVNO BILI
Piše: Jadran Šantić Šangarelo
Judi moji puno me vrimena tribalo da se odlučin pisat o ovako važnoj temi ka ča je ulizanje u EU. Jeman bogu fala puno godin pa radi tega i puno pantin, a to moja pamet jema i buže koje su nastale jerbo san nike stvari zaudobija oču reć zaboravija.
Sve ovo ča se događalo oko nas a u vezi ulizanja u EU jemalo je name veliki učinak jerbo san ja jako duševna i osjetjiva osoba pa me svaki škerac smeta. Kako mi godine gredu naprid svaki dan smatran da u svemu jeman sve više i više prav.
Dunkve da počnen od početka moga suvislega pančenja. Sičan se kad san bi momčić i tija partit u veliki svit ka i mnogi moji vršnjaci …e ja nisan moga jerbo mi je mater pokojna bila jako vezana zame a i zato ča je bila puna straja ča če mi se u tuđemu svitu dogodit.
I tako je vrime prolazilo moji kumpanji su radili u Njemačku, Francusku, Italiju a mnogi su partili u Jamerike, Australiju i Novu Zelandiju i danas su kapitalno jaki da ne rečen bogati ka ča san i ja moga bit.
Ne tužin se jerbo san ja i ovod doma neloše proša pa danas kad san stavjen prid zid o brisanja granic jako me žaj ča niman 40 godišč manje jerbo bi odma parti trbujon za kruvon.
Kako san bi jedan od oni ča su upalili sviču usrid mraka moran ronjat jerbo ta sviča je osvitlila samo 200 tinjak fameji ( kako je zamisli šjor dotur Tđman) a ostali smo ostali i daje siromaji bez mogučnosti izbore a ko je za to kriv …Zna se.
Kako svaki dan proštijen barenko dva dnevna foja, mogu reč da san dobro informiran i vidin da se država veseli ulizanju u EU …ma jopet kad boje pogledan vidin da je raja skeptik i da puva na ladno …oču reč da ništa ne viruje da če nan bit boje.
U naše malo misto se otvara mini kompleks sa jednon statuon malešnoga ditiča ča piša isprid sebe. Bit če lipo sve u braški kamen a i po noči če ga osvitjavat jake žeruje o letrike …samo me još ni jasna simbolika zašto ti mali piša i na koga oli našto, možda mi niko od vlasti to razjasni.
Da neče bit sve to lipo vidit i po danu a najskoli po noči …oče, ma jopet mi ni kjaro da je ti kip malešnog pišača bi spremjen u niko skladište više o dvajest godin i ni mi kjaro jeli i tamo piškija i na koga.
Spremaju se bakanalije ka u doba starega Rima jerbo nas odonda prati parola Kruva i Igara a to znači kad ti je najgore udri brigu na veseje. Ma dosta zajebancije jerbo moran opravdat ovi naslov ča san ga stavija na početak ove moje pisanije.
Je …mi smo stari Evropski narod koji je pusto vrime bi pod okupacijon razni carski fameja ma isto znan da nas oni ne bi anektirali da jin nismo ništa značili, pa iz svega izvlačin zakjučak mi smo ka i oni ča su nas tlačili stari Evropski narod.
Samo …za razliku od nji nismo jemali bogate care oli kraje a nismo jemali ni unda ka ni danas pinez za velike vojske jerbo da smo imali niko nas nebi okupira i koristija naše prirodne lipote, spizu, vina a bome i jude za vojsku, jerbo smo mi uvik bili jak i stamen narod.
Eee a, danas kad smo došli prid vrata Evrope mislin da bi tribalo napravit transparent sa parolon moje pokojne none i to „Dobro je zasvirit pa unda za pas stavit“, ča oče reč veselit se sa miron i unda se uvatit lavura jerbo u nas u Dalmaciju napose u Split jema izreka „Bravura je živit bez lavura“, a morate priznat da taki odnos još niko ni izumija osin pjačke i lopovluka a ko tako živi i danas ne triba se puno mislit jerbo ZNA SE.
E sad da me niki ne bi napadali i švacavali moran reč da je pjački i lopovluka bilo uvik samo u manjoj miri, a ovo ča su nas u privatizaciji i pritvorbi doveli na prosjački ščap niko nije a misli da i neče nikad bome odgovarat.
Ča ja ka grintavi stari morski čovik očekujen od ovega ulizanja u EU je to da se mlade nauči boje radit, da jemadu izbora di študirat i poslin se pošteno zaposlit a da nama stariman starost bude poštenija i boja.
Zato san svon dušon i tilon za EU. Ma skoro san zaudobi ča oče reč zaboravi ono ča je najvažnije ča se dogodilo u naše malo misto a to je da se pokrenula ideja kako triba napravit mali maraton Pelješac-kopno i jušto tamo di su tri puta otvarani radovi za fantomski most koji je triba našu jadnu rascipjenu domovinu spojit a ko ji je otvara …ZNA SE.
Idejni tvorac je moj dragi prijatej Šime Rosin uz pomoć Milojka Glasovića iz Opuzena meštra o Neretvanskega maratona koji je izumislija i do danas odnjegova Maraton Lađa na Neretvi.
Ova sportska manifestacija če bit jušto u 11 uri na prvega srpnja oliti na dan kad nas primaju u EU sa sloganom „ I Dubrovnik je EU“.
Eto štioci moji da van ne buden više dosadan dovidova i pozdravja vas ka i muvik
…vaš morski čovik Šangarelo.