piše: Jadran Šantić Šangarelo
Mola san sebe nikoliko dan da se pripremin i da dobro razmislin kako ovu štoriju napisat. Nemore se vengo nako kako je sve bilo i tako karata kanta notat događaje po redu.
Gledan niki dan na televiziju niki prosvjed ma kako san zakasni na početak mislija san da je ono nika reportaža o onemu prosvjedu na Spliskoj rivi kad je pulitički pokojnik šjor Sanader angažira desnicu da ruši lege artis izabranu vlast na čelu unda sa pokojnin šjor Račanon.
Gledan ja gledan ma kako san gluv ne čujen ča spiker na TV govori i ništo mi ni jasno stalno se ošervajen oču li dikod ugledat more oli svetega Franu oli lučku kapetaniju da znan da je moj Split …ma jok.
Utaka san aparatiće u uši i onda san ćuja da je ti prosvjed u naš herojski grad Vukovar. Judi moji gledan i nemogu se čudon načudit, a svičica u možjaniman mi je odma dala sinjal da se tote iza svi maski, bajnoga stožera i šupji govornikov sakriva HDZ.
A moga bi se zaklet da je glavni igrač njiov prešidente šjor Toma koji je ka glavni državni špijun dok je bi ispeka zanat o spletkarenju pa je jopet izazva desnicu nebili zavadili nas Hvate i onda dobili lokalne izbore.
Zaludu je njiman govorit da je povijest učitejica života kad njiman to do možjani ne dolazi jerbo nisu uspili sa Spliskin mitingon pa neče narod ni sad bit pizda i nasest ni na ove provokacije.
Malo me ka dragovojca i ratnega invalida i razvojačenoga ratnika štrecnilo kad san ugleda puste invalide i razvojačene ratnike u uniforme ka da je svečano postrojavanje. Zašto san ovo reka jerbo smatran da razvojačeni ratnici smidu i moredu uniforme ratne obuč samo na svečanon postrojavanju postrojbi a ne za prosvjede i kojekakve redikulade i onda sa ti prosvjedi šavat poruke od naroda izabranoj vlasti da če je nasilno rušit.
Ma za gospu blaženu to znači da su svi naoružani do zub i da in nebi bilo teško jopet zapucat ma ovi put bi bilo ne na dušmane vengo na svoj narod HRVATE.
E a sad da se vratin na ono ča je uzrujalo sav taj svit u Vukovaru. Je donesen je zakon i u Vukovaru uredba o HDZ-a i njegovi partneri u ondašnjoj vlasti 2009. god da se piše na dva jezika i to hrvatski i srpski jerbo tamo Srbi jema kažu priko 34% pa me sad ni jasno kako su to gospoda na čelu sa šjor Tomon dobila totalnu amneziju i traže zabranu onega ča su sami propisali.
Ovod ispada da je niko lud oli ča bi rekli u narodu jebe lud zbunjenoga. Nadan se da čete mi oprostit na ovoj prostoti ma nisan to moga slikovitije prikazat.
Znan da če bit oni koji se samenon neče složit ma zato je ovo vrime o demokracije more svak jemat svoje mišljenje ma svi nas USTAV i USTAVNI ZAKON držidu za muda i moramo se divertit kako zakon kaže.
Znan da smo do grla u velikin govniman ča nan ji je ostavija HDZ ma isto mislin da bi tribali svi zbit redove i pomoč da da ova do kosti opjačkana država barenko prošepa ako ne zdravo prooda i da se svi nadamo da če nan kad ulizemu u Evropu bit barenko malo boje.
Moran još jednu stvar bome naglasit, jadna ti smo mi država i narod kad još poslin 20 godin o rata koji nas je zbližija jema oni ča nas oče ponovo zavadit i ka muva brencuja bacijedu upjuvke di ko stignu.
Nedajte judi da opet bude nemiri a VI „ gospodo“ pulitičari dozovite se pameti jer od objesti lopovluka i veliki pinez izgleda da neznate ča bi sa sebon pa trujete narod i na sve načine nas očete zavadit i podilit.
Da je danas živ moj veliki uzor Miljenko Smoje reka bi za nas: „ludi narod triba ga prolit petrojon i sve užgat“ jer bome tako i izgleda.
Sa ovega mista šajen signale sviman pametniman da čuvaju mir u zemji i da ne nasjedaju ni na kakve provokacije.
Eto za ovi put toliko. Živi i veseli bili pozdravja vas vaš morski čovik Šangarelo.