MA K VRAGU I PULITIKA I MRŽNJA I JUDSKI NERAZUM

piše: Jadran Šantić Šangarelo
Evo me bome prin nego san mislija!

Kako me vrime ne jubi pa zbog vitra koji puva već skoro 10 dan ne mogu na more lovit ribu moran ćakod radit pa taman i notavat na ovu makinjetu. Ja mislin da kad ne bi bilo foji za štit da bi poludi ma nisan daleko od tega ludila i kad štijen te foje.

Majko moja draga kakvi su to judi koji uporno prodajedu mržnju i judsku netrpejivost priko foji i koji stvarno misle da smo svi

mone. Evo jutros san se opet snerva štijući napis onega muzuvira Tihomira Dujmovića, pa ni mi kjaro od koga je on instruiran da nan samo mržnju sije i prodaje svoje laži. Ja bi se skoro zakleja da je on očiti proizvod stranke Zna se i da je njiov največi druker a kako mu u Slobodnu Dalmaciju izlazidu kolumne i to je dokaz da je u nas sloboda pisanja bez granica ča uvik i ni dobro.

Slažen se sa njin da je oni Vulin iz Srbije ratnohuškač i da bi mu tribalo zabranit daljnje dolaske u RH ma ni mi drago ča opet proziva „ nenarodnu vlast“ ča nije žestoko nasrnila na dušmanski govor i uvride Stepinca a ka slučajno je zaudobi da ni naša vrla prisidnica nije rekla kritički ni a ni be kontra Vulina koji je bi četnički glasnogovornik u Jadovnom. Triba stvarno čovika ako ga se more tako nazvat proglasit PERSONA NON GRATA i zabranit mu svaki kontakt sa nšon zemjon.

Moran reč da san mislija da je Pupovcu došlo iz guzice u glavu ča su radili srbi u zanjen ratu kontra nas i da mu je ka pulitičaru u RH dana sloboda me ne sloboda razni negativni pulitički konstrukcij, i da se ne može jedan zločin brisat drugin zločinon i da bi on triba bit prvi koji je kritizira Vulina.

Iako san zagovara tezu kako nisu svi Hrvati dobri pa ni svi Srbi loši moran se korigirat i reč da mi se pari kako u Srbiji i danas postoji kolektivna mržnja proti nas i da je večina zadojena četništvom i da se to ne može podvesti pod kolektivnu informatičnu blokadu. Danas se sve zna i triba samo uprit prston u kompjuter a na oni Internet jemaš sve od a do ž samo ča oni to neče da priznaju.

Da bi ovi ciklus o Vulinu priveja kraju moran poručit kako njemu tako i sviman u Srbiji koji vriđaju naš nacionalni ego da se pomirenje i prijatejstvo ne grade uvridama i napadima več normalnim judskin priznanjen krivnje i isprikon a naša bi država tribala notat i poslat ozbiljnu diplomatsku notu Srbiji o svemu ovemu.

Puka bi kad se ne bi dotaka onega našega  Bozanića koji nikad okad ga pantin nije sponemija ustaške zločine i osudija ji pa ni ovin svojin zanjin govoron. U Bozanićevu okrilju i blagosovu je i Glas koncila sa svojin velemajstoron spletki i laži šjor Miklenićen koji svojin notavanjiman svako malo istakne između radaka kako crkva u Hrvata podržava i podgrijava ultra desnu opciju a bome i štovanje ustašije i njiovi „odličnika“.

Šjor Miklenić bi da je na vlasti a to otvoreno zagovara ako se vlast promini i dođe na vlast HDZ, da se državni antifašistički praznik ukine za sva vrimena. Daje notaje ka da otvara tribinu protiv antifašista i antifašizma koji po njemu stvara maglu iza koje se čuvaju povlastice koje uživaju komunisti umaškarani u liberale. I sve to šjor Bozanić odobrava ma ja bi pod hitno ukinija zakon o financiranju klera i crkve koji je nakaradno potpisa šjor Franjo i unda bi to bija prvi korak u stvaranju ozračja di bi popi i cili kler morali razmišljat kontra koga notavat u foje i tada bi bili svjesni da su ji ranili za nerad i širenje mržnje hrvatski judi koji su ji nfinancirali iz državne blagajne koju pune porezima.

Znan da če me se iz niki struktura osudit ma meni je dosta slušanja svega onega ča se prosipa iz just svečenstva kontra ove vlasti, možda bi jin bilo boje da se na vlast vrate oni koji su jin bili najbliži na čelu sa šjor Anton.

Kako Milanović uporno odbija kazati dan izbora i drži u neizvjesnosti največu oporbenu stranku a i cili narod počelo se donosit statističke brojke u popularnosti vladajući tako i oporbeni stranak. Izgleda da je narod svatija da nas pulitika rada reda i dobri ulaganja a unda i masovnega zapošljavanja more izvuč iz kala i govana di smo sad a ne unutrašnji neprijateji i pulitika stranke Zna se di ustaški zločinci zaslužuju pohvale ka poznati pisci i humanisti i di se ova vlast poistovječuje sa crnin đavlon ili sotonon.

Moran malo i lakše teme obradit. Digla se buka kritik oko spomenika caru Dioklecijanu jerbo nikor nezna kako je on izgleda a bome u cilemu svitu postojidu pusti kipovi razni povjesni faca i nikor ni zamiri ni iska jeli koji kip baš tako izgleda.

Naš mladi akademski kipar Đani Martinić je po zanatu i po zahtjevu struke napravi kip cara a unda je naš poznati novinar šjor Zlatko Gall svaštar jerbo notaje u novine od kulture do kulinarstav i od rocka do teatra a zna se upačat i u pulitiku, udrija drvjen i kamenjen na ti kip cara i njegovo postavjanje kraj Vestibula. Šjor Gall je ka vrhovni meštar tija naglasit da kako niko ni poznava a ni zna kako car izgleda da tu krivotvorinu ne triba stavjat na javna mista. Ajte šjor Zlatko lovit rake govnare pa danas se na svitu u turističke svrhe prodaje sve ama baš sve lipo i ružno loše i dobro originali i krivotvorine pa valjda je i naš car zasluži ukazanje narodu svita i našega prilipega Splita.

Eto okad smo od tranzitnega grada postali svitski požejna destinacija napravilo se dosta u turističkoj ponudi ma isto uvik ispade na javno niki feler joli lopovluk. Evo štijen u našu SD da se čeki bunidu jerbo su sa jedne bande kuntenti sa 30 euri za apartman a tamo jin se pojave vodići lupeži koji tražidu 20 euri po glavi turista za uru vrimena razgledanja carske palače to znači da za otprilike 5 uri posla sa grupan od 10 turisti jedan vodić joli vodička inkasaju ijadu euri svaki dan pa judi moji ko jema takvu plaču nima ni Bil Gates.

E da bismo ti lopovluk iskorenili triba grad i turistička zajednica propisat cjenik i onda na svaku prijavu nepravilnosti vodičima dat šup kartu i zabranit jin sramočenje našega najlipjega grada na svitu i carske palače.

Evo i za kraj moran reč da bi ja da me se pita kip cara Dioklecijana stavi na najfrekventnije misto u palači i to sa stražon od legijonari pa neka se turisti slikajedu i nosidu slike doma pa kad ji budu pokaživali prijatejiman činit če nan besplatnu a najboju reklamu za grad i palaču. Isto tako bi na svaki važni kantun palače postavi niki kip u togi joli u oklopu pa neka se slikajedu turisti.

Evo štioci moji neču vas više pilat zdravi i veseli bili pozdravja vas vaš morski čovik Šangarelo-