piše: Slavica Sarkotić
Gda je sin z malum metličkum pokupil mrvice tere su ze stola na pod opale, otec je odvrgel komadič sendviča s tunum na stran, na tanjer.
-Samo ti jedi tata, rekel je sin kak da se pravda. Sam znaš, sad bu skoro Elsie došla, pa moram malo počistiti.
Čez obluk je curelo meko švapsko popoldan, narančaste zrake ke preveč ne greju, taman tuliko da bu dost.
Negde z obližne cirkve je vudrilo pet put.
-Idem si ja malo noge pretegnuti.-rekel je otec.
Sin je več bil v boravku, čulo se vudaranje po tastature. Otec je zel kaput z aufingera f predsoblu i f špiglu je videl starca s kapum tera je pokrivala ono malo sede lasi ki su ostali, videl je zbrčkano lice i podbradek kak visi i gledel je vu toga čoveka kak da je to nešto stranjski a ne on sam.
-Pazi da ne zalutaš, ponesi mobitel.-vikal je sin z voncimera.
–Vrak ti jebi mobitele.-gunđal je otec potiho. Če se bum zgubil, bum se zgubil i z mobitelom i bež njega.
Vane ga je mrzli veter vudril po zube i osetil je miris crnogorice s parka. Koraki su zazvonili po kamenomu tratuvaru.-Vraži Švabe, navek su znali delati vulice.-brundal je.
Navek ga je bunila steza za becikliste. Toga pri nami ne, ali tam dobro moraš paziti da ti beciklin ne dojde glave. Jer oni voze po te steza kak nori, slušalice nabiju v vuva i kapuljače na glave i nek sami dragi Bog zna kak opče kaj čuju i vide.
Pešaki pak moraju se strogo držati sve strane tratuvara, zato kaj im jedino tam ne preti opasnost. Par put se zaboravel meknuti pak su mu trubili kak šašavi.
Noga tera ga je bolela usporavala ga je v hodu.
Gledel je natpise po zgrada «Apotheke», «Obst und Gemuse» «Konditorei» i slične i vu te ljude teri su se narivavali oko njega.
Mislil je iti v cirkvu, ali kak mu je ta noga štekala, denes mu se put do cirkve činil nekak dalši neg inače pak je odlučil otiti samo do parka.
Bilo je fajn ladno pak je park bil skoro prazen.To mu je i pasalo. Sel si je na drevenu klup okrenjenu prema školskom igrališču tero je isto bilo prazno, podigel kraglin kaputa i ruke porinul v žepe.
Vlasniki pesov prepelavali su svoje ljubimce na lajna i bež njih i v ruka nosili vrečice i lopatice da za svojemi cucki počiste.
Sejeno je cuče drekof bilo po tratuvaru kuliko očeš i trebalo je dobro paziti da ne zagaziš vu nje.
Jen suvi čovek, kost i koža, predrčal je spred klupi po steze. Para mu je išla ze zubi, ali je na sebe imal samo nejakvi tenki gorni del trenerke i kratke lače dole, na noga tenisice, a v vuve naravno slušalice.
Otec si je pomislil, ne ni čudo kaj su si gluvi i sam se svade, kad stalno nose te slušalice i mobitele a nigdo nikoga i ovak i onak više ne sluša.
Jen žuti kuštravi cucek došel je do klupi i onjušil mu ruku. Mam je dodrčal gazda i nekaj rekel kaj otec ne razmel, ali je cucek mam podvil rep i potuleno odrčal niz stezu.
Za njim je otkasal i gazda.
Nejakof šari tič je prhal po grana i nekoga dozival. Valda drugoga tiča. Bože mili, je li se oni si razmeju med sobum ili i oni govore saki svem jezikom, gdo bi znal.
Otec si je po stoti put razmišlal o te svoje putovanja v Nemačku i nazaj. Negdo bi rekel da je te peneze mogel i pametneše skoristiti, nekaj kupiti, dati dece, ali on ne mogel drugač, š čem bi prešlo par mesec jednostavno ne više mogel zdurati i kupuval je kartu. A več par dan nakon kaj bi došel, mislil je kak je doma, su li žena, kči i nukek v redu, i več bi bil išel nazaj. I tak stalno.
Sedeč tak na klupi, otec je zaspal. Senjal je da je nafčil nemački i da se spomina z nejakovem trgovcem teri prodava motore .(bil si je šparal za Vespu, ali nikak dost vušparati, mirovina je mala, a i ta putuvajna…)
Zbudil se gda mu je bilo fest zima.
Vane je bila skoro noč. Noge su mu bile ftrnule, pogotovo ona tera ga je bolela. Pretegnul se i zdigel. Najemput je osetil glad. Na vuglu je mladi Turčin držal pečenjarnicu de se mogel kupiti i fini kebab. To mu je sin obično kupuval i donašal. Ali sad je on odlučil sam se snajti. Primeknul je glavu k steklu i pokušal prečitati kaj piše na reklame, ali videl je samo natpise tere ne razmel i brojke kuliko eurof kaj košta. Videl je da poleg natpisa» kebab» piše 2 eura pak je prečeprkal po šetoflinu i rekel:»Bite ajn kebab».
Nutre ne bilo Turčina neg lepa cura s črnemi očijami.
Jen euro mu je opal z ruke, valda zato kaj su mu se prsti bili malo spremrzli, pak je potiho preklel dok se prigibal da zdigne kovanicu.
Anđel z one strane stekla se nasmejal.
-Želite kebab?-rekla je na najlepšem horvackom i dale se smejala onak kak se moru smejati samo cure rođene na jugu. F prvi mah je zanemel, a unda mu se nejakva toplina razlejala po telu. Mislil je da sejna. Otkud sad vu tem strajnskom gradu, vu te turske pečenjare dete tero govori naš domači jezik. A unda si je pomislil, pak tak je i moj sin tu f tuđine došel kruva zaraditi. I mam su mu suze pošle pak se je zbunil dok je ona spretno baratala z nožem i rezala meso, pitajuč:- Želite li s više ili manje umaka, blaži ili ljući?
Ne se posle sečal kaj joj je rekel, samo da mu je porinula vruči, dišeči smotulek v ruke i šepnula, spremite eure, danas vas ja častim, valda sem ju podsetil na oca ili deda, pomislil je otec još neodlučen bi li prihvatil tu iznenadnu čast.
Išel je polagano, vusput je soprl škrniclin i pomalo jel. Mislil je kak je najemput srečen i kak je par domače reči čistam dosta za osvetliti celu ovu stranjsku vulicu.
Ja sem mislil da volim te grad, gruntal je vu sebe. A ja ustvari volim mesto de žive moj sin i vnukica, tak bi volel i bilo teri grad na svetu da su oni vu njem.
Za negvemi pleči se začulo besomučno zvonjenje.-Ote vrit, rekel je na čistem turopolskem kajkavskem jeziku mulcu teri je zvonil.
-Ni pojesti si čovek nemre na miru od vas.
Narančasti pirgavi dečec si je samo zmegnul z rameni i odjuril dale i Bog zna kaj si je mislil o čoveku ki je prešel na stezu za becikline i govoril nejakvem čudnem jezikom.
Otec je pozvonil na parlafon, sin se javil, uđi samo, otvoreno je, rekel je.
F stanu je se dišalo.Kak pri nami nigdar tak ne diši, pital se kriveči vu sebe ženu da ne zna zebrati omekšivača za firunge. I f kujne je dišalo.
-Spremio sam ti večeru, tata. Ono što najviše voliš. Bečke šnicle. Evo, i unuka će ti se pridružiti.
Curica mu se hitila oko vrata. Sneja je mahnula z hodnika f plavem hauzmantlu.
-Ali ja sem sit.-rekel je otec.-Sit i srečen.
-Opa, to je lijepo čuti. Inače samo jamraš. A što te to usrećilo?
-Slatka domača reč sinek. Domača reč i vruči kebab.
Pogledal je čez obluk. Prek v zgrade bila su prižgana svetla i videl je se kaj se događa od prizemla do četrtoga kata.
-Vraži protestanti. Ni firunge na obluke nemru vrči.-zagunđal je.
-Što ste rekli tata?. pitala je sneja (napol protestantica) ka je bila došla f kujnu po svoj čaj.
-A nikaj, dete. Velim kak su veliki ovi vaši obluki.
A potiho je dodal:-I da, zutra pem domom!