piše: Jadran Šantić Šangarelo
Evo poslin puno vrimena da van se javin dragi štioci sa jednon malešnon štorijon iz našega malega mista.
U naše malo misto jeman jednega prijateja Vedrana koji je osin ča je završi skule za kapa o makinje i propju pravi morski čovik.Na raznin brodiman i moriman je naviga a u zanju na tunolovciman i oniman ća opskrbjivaju ribogojilišta tako da o moru i riban zna sve. Voli idrit i zato je kupi jedan lipi jedrenjak jahtu od niki dvanet metri.
Voli i ribarit sa svin artiman a posebno sa puškicon na ariju marke Mares. Jema i vrše pa i u njiman uvik bude barenko za obid. Ča se tiče liganj tu sa svojin malešnin kajićen ča mu je nadija ime Frfa tamani lignje i po danu i po noći i sve u svemu je stručnjak o rib i ribanja.
Kaoko je iz jedne fameje koja se po svitu rasula jema i jednega rođaka Franu koji žive u Kanadu i to po godišća gori a po godišća ovod u Dalmaciju u još manje misto od našega melega ali odma uzanj.
Lanjsko lito je ti Vedranov rođak Frane kupi jedan lipi plastificirani kajić za male šolde i počeja je uz Vedrana učit sve o moru i brodima a napose o ribanju.
Doša je naš Frane i ovo lito i odma se angažira na vršaman i taman kad je mislija da je apsolvira vrše ukaza mu se prvi problem. U vršu je ulovi ugora i odma je zva Vedrana da mu ga izvadi jerbo on nezna a i straj ga da ga ugor ne ugrize. Vedran je izvadi ugora a Frane pita a ča čekaš ajde naući me da ga zakojen jerbo ja to nikad u životu nisan učinija.
Napravi je Vedran i ti operacjun i mislija da je sa tin sve svršilo, a e. Zove Frane sutra dan Vedro jeman u vršu obotnicu ajde dođi izvadi je jerbo ja neznan a i balava je pa me straj. Doša je Vedran i izvadi obotnicu koju je Frane stavija u plastičnu vrićicu koja je jemala bužu i stavija je obotnicu u vrićicu u jedan sić koji je bi na srinjemu banku u brodu uz bandu.
Kako su se nji dva zabavili sa popravkon jednega pajola nisu se ni ošervali ća obotnica čini i ka za vraga kad su pogledali bilo je kasno. Obotnica je kroz onu bužu na plastičnoj vrićici utekla u sić pa unda priko bande u more. Koja je to bila dežgracija?
Frane se rasplaka i optužija Vedrana da je on kriv, jerbo ka Vedran sve zna i triba mu je reč da sić ne stavja na klupu blizu bande o broda vengo da ga poklopi sa nikon daskon joli sa pajolon i tako sprijeći da zvir pobigne u more. Ajme majko moga san šest judi naranit pa koja je to dežgracija ća ču sad i sve tako da je suze ronija. Vedran ga je malo smirija i reka da u vrši ostavi dva žbirca raka i da če se obotnica sutra vratit. Frane se malo doveja u red u nadi da sve ni izgubjeno.
Ma kako u nas u naše malo misto uvik radi radio Mileva sve te fjabe Vedran je pripovidija ujutro u kafiću uz kafu i dok je Frane ariva na kafu cilo misto a posebno zajebanti su znali za njegovu pegulu tako da je jedva priživija zajebanciju.
Ma judi moji reka bi pokojni Mlade Delić ma jeli to moguće da čovik koji se rodi deboto na samemu žalu ( jerbo mu je kuća skoro u more ) nima pojma o moru i ribanju a u guzicu je uvati 70 godin. Kažu judi da za ništo naučit nikad ni kasno a kako je naš Frane bistar i brzo uči moga bi dobrzo on nama prodavat barufe iz ribanja. A ona se obotnica još ni javila.
Eto štioci dragi pozdravja vas vaš morski čovik Šangareli i živi i veseli bili.