NE DA MI VRAG MIRA

Jadran Šantić-Šangarelo
Štioci moji lipi šesni i dragi nisan van se javi ohoho vrimena i ča bi naši stari rekli puno je vode ispod mosta proteklo a ja san muča.

Ne zato ča nisan jema čakod notavat vengo zato ča san sebe uvjerava da sa mojin notavanjiman ganjan vjetrenjače ka Don Kišote de la Manča, odnosno  kako je to činija veliki Servantes a ja mu nisan ni do gnjata.

I evo sad kad san seja za ovu makinjetu smrza san se pri pomisli kako sve notat ča je bilo akutno šporko i perverzno u našoj lipo zemji, a bilo je bome svega i svačega.

Moran odma na štartu dat jednu usporedbu i to između našega bivšega premijera dr. Ive Sanadera i ovega prisilnega upraviteja Agrokora Ramjaka. Mislija san da posli šjor Ive nemore niko zamračit veče šolde ma san se juto zajeba. Ovi Ramjak je u malo vrimena izmarčapija više za plaće nekin savjetniciman koji su njegova bivša firma ( a mislin da je tu i njegova manča obilata) nego šjor Ivo u sve skupa.

Izgleda da tomen Ramjaku sviću drži ovi naš kontroverzni premijer Plenki uz svesrdnu pomoć autorice Lex Agrokora nedodirljive i neuništive Martine Dalić koja nje posli pustega vrimena teškon mukon priznala da je ona autor spornega zakona jerbo je ona sa svin pustin diploman stručno najpotkovanija i nije bilo šanse da ti zakon napiše niko drugi jerbo su svi ostali analfabete i totalne neznalice.

Posebno je potriba istaći naš sabor ka svjetsku pozornicu di je redatej oni Bačić i Njonjo a glavni glumci su Pernar i kompanija iz ŽZ i Mosta. Pa koje ti prestave činidu ne triba jin Hasanbegović jer ga u nikin krecijan jako dobro zastupa šjor general Glasnović. I dok stranka ZNA SE neće da ratificira istanbulsku konvenciju dotle njezin župan lema svoju ženu, i to je slika i prilika našeg saborskog morala.

Moran odma udrit drivje i kamenje na ovi SDP odnosno na onega bezličnega Beru i njegove patuljke koji tako dobro mute vodu da su skoro SDP izbrisali sa političke karte Hrvatske. Mislin da ako se ne trgnu da če ji udrit šete kolpi i stvarno će otić u ropotarnicu povijesti političkega života. Evo i najnovije baze SDP mora onemu Ljubiću platit sa kamatan 10 miljuni kun jerbo je navodno nika tajnica bez odobrenja potpisala niki ugovor o cesiji i tako ukopala SDP. Ma meni ni kjaro kako SDP ne more tužit tu tajnicu i ne znan koga već i lipo se naplatit a ne upadat u duge iz koji će se teško izvuć.

Cila ova trakavica oko Agrokora i šjor Todorića postaje degutantna, pa kakva smo mi to jaka pravna država da ne moremo ovake marčapije meknit u red. Sramota.

Najnovije ča nan se dogodilo sud je vratija našemu poteštatu metropole Mikiju nekretnine ka da je čist ka prisvitla divica Marija.

Zlatku Mariću je vratilo na početak sudske sporove zajedno sa Klemon i mora mu se nota bene vratit oko miljun i nešto pinez bespravno oduzetih.

Svin velikin lopinaman se poništavaju presude i oslobađa ji se uz povrat love a onemu malemu Maškarinu ča je osta bez nog sud ne more dosudit poštenu naknadu za invalidnost i uništen život. Pa to je judi moji da ispalite na živce.

Ne bi bi red da se ne dotaknen onega našega velikega Rvatine Mamića o njemu se moredu napisat romani ma ja niman toliko interesa ni vrimena.

Ovo san se dotaka malo oni tema di su šoldi u pitanju a pravo me stra tricat u pulitiku jerbo bi moga i najebat.

Sićate se naši vrli šatoraša i velike jubavi sa našon matovilkon Kolindon a, e stari  bi rekli da vrč gre na vodu dok se ne razbije i njiov se razbija.

Ona nji naziva šakon jada i marginalciman a oni  njon odma šajedu befel u kojemu jon prite da neće više proć izbore.

Pozvala je ona u naše dvorište onega muzuvira Vučića ma se Plenki ni baš razveselija. Glogoškoga i Klema ni bilo ni čut ni vidit samo je oni poznati lovac Đakić komentira priteći njenu izjavu.

Vučić je bija i otiša a ni se izvinija ma su naši domaći Srbi koji su u vlasti sa strankon ZNA SE odma digli repicu i jopet tražidu nike pravice koje jin je prin odbila šjora Vesna Pusić ka prava gospođa ministarka.

Oni bajni pripisivač Vaso nudi veliku koaliciju između stranke ZNA SE i SDP-a ma ni mi kjaro koju struju on zastupa i ča o temu misli njegov šef koji ka Ponzije Pilat stalno o nečega pere ruke. Ta njegova poza prikriženi ruk postala je ka veliki tik kod njegovi pristaša. Svi sada vrtidu prste i križaju ruke  tako da ispada da je Plenki to propisa stranačkin dekreton. Samo dokle?

Građani metropole i moga Splita sa svojin vlastiman vode puste ratove oko vonji o škovaca i ništa se još ne zna. U metropoli su tribale proradit puste kante o škovac uz novu naplatu a sve je to sa figon u žepu odlučeno u kabinetu i kužini našega vrlega Mikija iz Pogane Mlake.

Malo me iznenadilo kad san u foje proštija da oni isusovac iz crikve svetega Marka gre u Afriku za misionara a bija je glavni zaštitnik braniteji koji su potkopavali legalno i legitimno izabranu vlast. Jeli on to biži od nečega joli mu je proradila savjest ( a mislin da je to malo teže ).

Ako mogu ka nike zakjučke reć ništo reka bi sljedeće: maloga Beru triba šuperat sa glavnega mista u SDP a izabrat onega velikega bračanina Ranka Ostojića joli će SDP propast jerbo dok se dogovore Rajko, Komadina, Bero i ostali ode stranka u pizdu materinu. O stranki ZNA SE neću puno palamudit samo me se čini da i njiman sa partnerima gre karoca nizbrdo a posebno okad se oni lisac Vrdoljak vratija na čelo HNS-a.

Bilo bi ovod dragi štioci još tega kala ma san se umorija pa mislin da je za ovi pud basta.

Živi bili i veseli pozdravja vas vaš morski čovik Šangarello.