piše: Jadran Šantić Šangarelo
Jo judi moji ča je čovik zajebana beštija. Misliš da se moreš od svega iskjučit i živit ka zatvoren u svojoj glavetini ma kako svaki dan štiješ foje odma te lampa udre u možjane od svaki pizdarij a bome i puno ozbiljni stvari koje u tin fojiman proštiješ.
I ča se onda dogodi meni možjani šaju avizu vidiš, moreš li to priskočit, moreš li prič priko tega i unda mene ka da vrazi počnu tirat ajde piši, ajde piši i ča ču vengo sist za ovu malu ma bome jako pametnu makinju i notaj ka na kartu sve ča te muči.
Jutros san se zableušija čitajući u kafiču Večernjak kojega ja ne čitan inače ma dok san čeka moga prijateja Mačka uzeja san samo proletit naslove. Kad tamo dvi stvari stršidu ka rogovi vragu na glavi. Pišu „ Veleuvaženi“ saborski zastupnici iz naše lipe slavonije i veličaju svoga „junaka“ šjor Glavaša i to tako da jin je glavna besida bila kako su ponosni ča su pripadnici njegove stranke HDSSB-a i ča jin je on prisidnik u azilu mostarskega prežuna, a nota bene jemadu i saborskega zastupnika koji je lege artis osuđen pravomočno ma jopet neda svoje misto u saboru jerbo ko njiman iz HDSSB-a more šta.
Ja mislin da su oni pobrkali lončiće sa vrimenon i mislidu da su ekipa Eliota Nessa u vrime prohibicije i da su ka i on nedodirljivi. Moran van reč da su u pravu jerbo nji niko ne dira a jemadu i najjačega govornika šjor Burića koji kad se navije pari ka gramofon na komen se vrti pokvarena ploča,a služi se bome dikcijon ka da se specijalizira kod pokojnega Demostena koji je bi največi govornik onega vrimena joli sa druge bande ka veliki Seneka najpoznatiji senator u staremu Rimu.
Ma da nebi cili prostor potroši na jedan slučaj pribacit ču se na izlaganje veleuvaženoga fiškala a nemogu baš reč gospodina Vladimira Gredelja. Jo judi moji ča jadna karta sve trpi. Prije spomenuti fiškal odgovara na jedan napis još jednega velikega borca za pravdu sa kojin se ja baš uvik i ne slažen a koji obnaša funkciju prisidnika udruge izašle iz domovinskoga rata sa najdužin nazivon i to u Koprivnici a zove se šjor Pavković.
On je od tu udrugu koja je pod okriljen „Podravke“ diga gospemi na nivo najjače državne ustanove. Svako malo o nečemen piše, svako malo se kontra nečega buni, svako malo dili nika odlikovanja i tome nima kraja pa ču sad odustat od nabrajanja jerbo bi nas to odvelo daleko.
Nisan čita članak našega šjor Pavkovića ma ovo je prvi put da moran priznat da se sa njin slažen jerbo je napisa „ima li Radimir Čačić srama“ ma čini mi se da ni dobi odgovor od prozvanega šjor Čačića vengo je istega u obranu vazeja gori spomenuti fiškal koji se ka i Čačić diči prvi činon brigadira a drugi satnika, a kad bi njiman pridodali regimentu isti na čelu sa našon Hloverkon ja mislin da bi oni koliko ji jema bili udarna brigada a nisan sigur znadu li rastavit kalašnjikov oliti kakvu papovku a o pucanju na dušmane da i ne govorin.
Dotični gospodin fiškal kaže da ni da da se njegovo ime najde na popisu branitelji, pa sigurno da san i ja dobi čin ka i cila ta bulumenta nabi gospemi ni ja o srama da moje ime na popis branitelja. I tako dok je naš fiškal ratova sa pozicjuna koordinatora krizni štabov u Slavoniji oko Bjelovara za te vrsne ratne zasluge pokojni Francek ga je odlikova sa Redon Hrvatskog trolista za zasluge u Domovinskemu ratu i spomenicon Domovinskega rata koju da ne rečen svaka malo jača faca upitnega imena jema.
Sada bi triba koliko san infotan počet nabrajat jude koji su u ratu pucali po dušmaniman riskirali živote za slobodu a nisu njanka dobili čin običnega narednika iako je to častan čin a nekmoli čin satnika oli brigadira ka ča ga jemadu šjor trener Čiro Blažević i mnogi drugi.
Eto štioci moji sa mi je malo lakje pri duši a ove velike ratnike iz krizni štabov i razni pozadinski fronta nikada nečemo vidit da su vratili činove i pošteno se ponili jerbo su to ako ništa drugo činovi mnogi zaslužni borac iz domovinskega rata koji još u raspalin maskirnin uniforman živedu u ilegali.
Neka ji bog poživi a kako svi jemamo obraz neka se svak pogleda u zrcalo ako smi jerbo nisu sve slike u zrcalu lipe. Do sljedečega pisanja živi i veseli bili štioci moji pozdravja vas vaš morski čovik Šangarelo.