ŠTORIJE IZ MALOG MISTA
piše: Jadran Šantić Šangarelo
Kako godine činidu svoje nemoreš se uvik spominjat svega lipega ča si doživi u mlajin danima. Za nevoju jako malo spin i budin se uzoru tako san nekidan u cik zore gleda galebe kako se spuščaju ka kamikaze u jata male plave ribe i bome se gostu ka na švedskomen stolu. Gledan gledan i sitin se jedne zgode ča san je doživija prin tridesetak godin na onda novoj lipoj i velikoj koči Jadran I. Tu koču je u Rusiji kupi ondašnji ribolovni div i ponos Splita i Dalmacije „Jadran ribolov“ ma ne samo jednu vengo tri.
Jema san čast odit na more potizat mriže i gledat istinski patimenat ribari na moru. Ma isto utemu jema i puno lipi stvari koje ti poslin pusti godišč griju dušu jer se jemaš čega sićat. Tako jednon ja sa pravin profesionalciman gren oko Blitvenice na ribe. Koča nova jaka valika za ondašnje doba ma iso jema falingu, kabine i posteje tako su malešne da san onda pomislija gospe moja ovo su radili ka za kineze a ne za nas dalmatince koji smo ako ne svaki ono bar svaki drugi ka peča o čovika. Ma za nevoju se stisneš i kad se prva tura počne vadit iz mora to ti je kazalište di je pozornica more glumci su sa žujiman na rukaman ribari a puplika su pusti galebi od čijega se kliktanja ništa drugo ne čuje pari mi se ka da stalno viču bis bis …
Izvadila se mriža i bome lipe ribe je bilo ma uvatile su se i dvi amfore cile i nekoliko lipi bokuni od oni amfor ča su se razbile dok je koča orala po dnu.kako san bija gost na brodu kapetan oliti Barba o broda mi je pokloni jedan lipi vrat o amfore za koju san poslin dozna da je iz drugega stoliča prin Isusa Krista.
Kad se je oko podne vadila druga tura a predstava je opet odila ka u teatar dojde do mene mali Ive sin o Barbe i pita me barba Jadro a znate li vi uvatit galeba. Nu ti muku ježovu mali jema 10 godin i provjerava mene a ja ti ka iz topa a bome na udicu bez olova. Mali Ive vrti glavon i meni če šćeto neto ma ne tako vengo bez udice. Ja blenija i mislin se mali če me smantat i osramotit ma isto bi tija znat kako će on ulovit galeba.
Na krmi o broda su bile velike gradele brat bratu o dva metra i ispo nji lipo stivane isickane daščice za uspirit vatru. Uzme mali Ive jednu daščicu i sa jarpe jednega lipega šnjura pa mu kroz justa utira cilu daščicu i frkne ga priko bande. Deboto je šnjur pa u more a kus galeba ga je zapikira i u brišučen letu ga zaguca diga se u nebo i odjednon prista mlatit kriliman pa se ka nika lipa zračna jedrilica skala na more a moj ti mali Ive skoči u jedan kajič i na vesla do galeba i svon ga snagon opali po čiverici pokupi ga u kajić i dovesla lipo ka pravi mornar do broda.
Čin je izaša tumaći on meni kako galeb ne more letit ako mu je tilo ukočeno i dok ne provari šnjura sa daščicon moreš ga lipo ulovit iz kajića. Malo san se zamislija i pitan malega Ivu a ča čemo sa galebon? On lipo galeba pod ruku pa u koga a ovi je napravi lipi tingulet samo se moralo malo duje čekat dok se skuva i ti tingulet je vonja na friškinu. Eto štioci moji pa lipo provajte ovi način lova na galeba ma to provajte na otvoreno more jer tamo galebi jidu samo ribu a uz kraj bome i škovace. Lipi i veseli bili pozdravja vas stari morski čovik barba jadran zvani brada.