DOK JE LUPARI U DALMACIJI, NIMA STRAJA O GLADI
tekst: Jadran Šantić Šangarelo
Jo judi moji koji smo mi lipi bokun naše prilipe drržave. Dalmacija je čudo nad čudiman jerbo ća se u nas u Dalmaciju dogaja to se nemore nigdi drugo njanka u snu dogodit.
Evo moran se dotaknit i moje pokojne None. Ona mi je uvik nala spomenit njezinu poznatu misal kako u nas u Dalmaciju niko nikad nemore bit gladan.
A kako?
Bome lipo jemamo najlipje more na svitu koje je bome i bogato ribon, škojkama, raciman i da sve napose ne spominjen samo se triba ošervat i pinku angažirat.
Ća to znači?
Znači da se čovik more bavit ribaršćinon i nemore ostat gladan. More se bavit maslinan lozjen i eto ti odma uje i vino. Kako je more slano u nas je tradicija priko ijadu godin u branju soli. Jemamo samonikle likovite trave koje su najboji začini na svitu a nike se moredu i kuvat ka ča je žutinica kuke i šparooge.
I sada na kraju bit ove štorije je Lupar joli Prilipak školjka koja žive zalipjena na stinu u moru a kad se lipo spravi govori 7 jezikov i bome zove stalno bumbit vino pa unda sa popivenin vinon govorimo i 8 jazik.. Za te Lupare ne tribadu niki veliki i komplicirani arti vengo samo lipi temperin i bokun mrižaste vričice a more i od najlona. Jo judi moji koji su to godimenti kad se Lupari lipo sparićaju nemore jin se odolit ma isto tribadu lipo uje sol papar pravi domaći luk i razumi se lipo crno vino.
Dunkve u naše malo misto di ja živen po godišća jeman susida i prijateja pomorca, kapetana koji je otiša u penšjun i on je dokazano najboji i najuporniji lovac na Lupare. Ti moj prijatej se zove Igor Vilović i kad on potegne put pod noge uz obalu ne vraĆa se bez 5-6 kili Lupar.
Jednon zgodon je skoro zaglavi jerbo je jema dvi velike vriće o Konzuma pa ga je skoro sa jedne sike poteglo u more. Zamislite vi koji bi to grij bija i nastala bi borba sa moren u dilemi ča spasit joli Lupare joli vlastiti život. Srića ni se ništa od tega dogodilo i on se vrati doma sa dvi plastične Konzumove vriče pune Lupari. Bome i ja san omastija brke i bradu jerbo san bi u dvor dok je on prolazi pa mi je ka pravi prijatej da oko 2 kila.
Moja žena koja je ka i ja bonkulović lipo je sparićala za večeru Lupare pa smo od pustega kruva ispo peke i točanja u lipo maslinovo uje uz Lupare skoro pukli. Ma gospemi ni mi žaj jerbo smo se lipo nabubali Lupari. Taki ulovi je u moga prijateja Igora bilo puno puti pa san se jednon zapita gospe moja mora bit da je potamanija sve Lupare do Ploča jerbo i dugo ni iša vadit. I da bi ovu štoriju koja potvrđije teoriju moje None da u Dalmaciju niko nemore bit gladan moran nadopunit jednim malin događajen.
Kako san se u mladosti jako puno bavija podvodnin ribolovon jedan put ka zavraga nisan ništa ulovija. Ekipa samenon tila me obisit. Svi su ronjali mogli smo kupit vrata i bržoli pa na gradele a ne ovako svi čemo pobenat jerbo čemo bunbit vino a spize ni i o sunca čemo rebanbit. Meni je ka pametnu čoviku pala na pamet ideja iz stari ribarski besid brudet od kamena iz mora. Lipo san se vrati u more i izronija 5-6 lipi faca o kamena koje su bile pune mali prstaci a izvanka je bilo na svakomen po 6-7 Lupari. Kako smo od doma donili konče za kuvat brudet a ja da bi zadovojija moje kumpanje skuva san in lipi brudetić o stinja iz mora.
Moran reč da san unutra baci i dvi šake Nanari koje su isto molale svoj šug. Eto vidite da je moja pokojna Nona bila pametna žena a bome je bila i u pravu. Ona me je naučila lipe delicije kuvat jerbo je u svoje vrime kuvala ka šef o kužine u Metković kad je pristolonasljednik o Austrougarske odija u Sarajevo prin nego su ga ubili.
Eto štioci moji nadan se da nisan bi dosadan i da čete i vi ka i moja Nona lipo pripovidat da u Dalmaciju niko ne more bit gladan.
Pozdravja vas vaš morski čovik Šangarelo.