KAKO ME SIN ULOVIJA NA UDICU

piše: Jadran Šantić Šangarelo
Je bogami prav za prav ovu štoriju san bi zaudobi i da me moj sin pomorac ni podsjeti možda nebi o njon napisa njanka slovo.

Kako smo dok su dičica bila mala uvik litovali u Opuzen na najlipjoj riki na svitu Neretvi, a u Neretvu jema i puste ribe normalno je da se ta riba i lovi.

Ja ka strastveni ribolovac od mali nog san i moju dicu vodija sa sebon u ribarščinu kako na more i to nigdi drugo vengo na ušče Neretve najpoznatiji i najboji lokalitet za ribarščinu.

Isto tako san ji vodi i na  ribolov rikon i njenin pritociman di je ribe za bacivat.

Kako su dica resla tako su i boje lovili pa su se uvik karali ko je boji. Jednon prilikon smo bili na ribe u malu riku Crepinu koja je pritoka Neretve.

Sa naman je bi i moj šura Goran pa smo se podilili ja sa mlajin Viboron a on sa starijim Luciom.

Lovili mi lovili kad najednon moj sada pokojni sin Lucio zove u pomoč

-Pape Pape ništo je veliko vuče me u riku.

Kako je Goran bi bliže on je potrča do  njega i pokuša mu pomoč  …ma gospemi u jedan momenat sa bajera o rike nestali su oba. Ostavi ja moj ščap i trk tamo kad jeman ča i vidit nji oba je ništo veliko poteglo u riku i odnilo ščap sa svon krenon.

Odili smo mi sve do kraja te pritoke i nikad nismo našli ni ščap a bome ni zvir koja je ukrela ščap. Poza ti su judi u mistu nagađali pa bi je veliki šaran pa bi je veliki som ma do danas se ne zna ča je bilo.

Vratili se mi nase i nastavili lovit a moj mlaji sin Vibor sav pun sebe …nadija je sam kozicu na udicu i svon forcon priko glave zamanija sa ščapon pa umisto da udica ode u riku on je bome sa udicon ulovi mene i to jušto u več postoječu ranu na palcu o ruke.

Jo da je bilo snimit tu situaciju mali se smije a ja kalajen sve svece u beštimjan dok san vadi udicu iz prsta, ma isto san se brzo smiri i nastavili smo daje lovit.

Kad nan je dojadilo skupili smo ča se reče tunju i partili lovit na more. Na ušču san jema pasaru o četri i po metra sa Tomos penton o četiri konja i lipo se mi zaputili na poštu za arbune.

Lovilo se jako lipo i moj Vibor je zna na mali ščap ča san mu napravi sa tri udice vadit i po tri arbunića i uvik bi vika …Pape Pape pomozi …jerbo je bi mali i ni baš bi vičan skidanju ribe sa udic.

Kako na more di se lovi nemore bit bez galebi jedno jato je stalno letalo i plivalo oko nas. Bacivali smo jin one malešne vučiće ča ji doli zovedu tabakalo …a zašto to je štorija za drugi put …i bili su zadovojni.

U temu jatu je bilo stari i prifrigani tic a i mlaji bez iskustva i ja ti momen Viboru namistin malu ribicu na krenu sa udicon bez olova da bi on pokuša ulovit galeba.

Zagucali su par puti galebi udicu ma čin bi poletili poslin par metri kad bi jin u kjunu zategla krena oni bi ispjunili ribicu i udicu. Ma vrag ne spava i u jedan put moj Vibor se izdere pape evo ga i boga mi je uvati je jednega mlajega galeba i privuka ga do kajiča ma sad ga triba oslobodit.

Ni to mali manevar jerbo galeb tuče kriliman a bome i svojin kjunon koji je jako opasan jerbo te more ruvinat okrvavit i napravit gadne rane,ma isto san nikako uspija i moj Vibor je uvik priča te svoje zgode.

Dunkve moran reč da san dicu bi zarazi sa ribarščinon a ovi mlaji je i danas za poč na ribe uvik atento.

Ma još san ništo zaudobi kad bi nas dva oli prije tri moji sinovi i ja odili lovit ribu na riku i to skroz doli malon rikon do ušča nikad se nismo vratili doma bez barenko 5-7 kili peškeja i babuški koje doli zovedu rusi, a znala bi se zaletit i koja lipa velika plotica, pa delicija cinka a bomen i dikoja jeguja.

Način na koji se u Neretvi lovidu riječne ribe je specifičan zato jer  se more lovit osin sa malon rječnon kozicon oli kockon kako se doli zove a još je boje sa sezonskin vočen komadić smokve oli trišnje a najboje je na smokve i na pome.

Iskidaju se sitni komadići i nadiju na udicu, pa čin je potonilo a diko ni potonilo ne bi ribe u letu gucaju i bižidu u kraj jerbo je tamo punio šaša za sakrit se.

Nekad se u Neretvu u sva mista ta rječna riba puno jila …ma danas gospemi niko neče svi iščedu morsku a ja tvrdin odgovorno da dobar peškej na gradele ili plotice i cinke na brudet su zakon delicije o spize.

Eto štioci moji Ova štorija je napisana ka uspomena na zajedničku ribarščinu sa mojin sinoviman a posebno za onega mlajega ča me je ka največu ribu u životu nemilosrdno uvati udicon.

Živi i veseli  bili pozdravja vas vaš Morski čovik Šangarelo.