ŠTORIJA O LITU I LITNJIN BARUFAMA

ŠTORIJE IZ MALOG MISTA
piše: Jadran Šantić Šangarelo
Ma stalno se mislin ća bi napisa za pozdravit se sa liton i litnjin kartolinama o barufi i zajebancij.
Jo judi moji ča se sve liti ne događa to čovik nemore ni dok spi usnit i palo me napamet da van na kartu zabilužin neke sitne barufe. U mala mista na moru uvik jema ribari i ribarščine ma ni ništa za čudit se ako i ženske gredu na ribe oliti na lignje …samo je čudno ako odu sa šešulon o dva metra nji dvi i to na stara raspadajuća vesla.
Kako mi je žena bolesna ako ne gre na ribe, a još više ako ne gre na lignje …moraš jon udovoljit jerbo ako ni kuntenta onada san najeba o grinte i prigovaranja (ajde ni baš tako ali neka ostane).
I tako moja žena gre na lignje sa svojon dragon rodicon Sinajkon. Samo ime van govori da je rojena u zbjegu u El Šatu …ma isto jon ribaršćina gre o ruke a dotična jon rodica jema istegnutu na žalo šešulu ma uvr glave o dva metra.
Kad je bonaca onda mi žena gre samenon …ma kad vaja onda ja ne gren na more jerbo znan zapivat onu operu rigoleto i to sva tri čina.
Dunkve jednon gre moja žena sa svojon rodicon na lignje sa dva raspala vesla i zaremuća ji Rafo o žene mi zet o druge jon rodice Jadranke. Ma kako je Sinajka malerozna uvik se sa njon dogodi nika dežgracija pa tako i ti put.
Najpri su cimale na lignje do ludila i ništa …pa in je kurenat odnija tunje sa peškafondima Rafi pod brod i zamotale su se oko propele.
I da ne bude se na dvi dežgracije Sinajka je izgubila jedno od ona dva betežna vesla …pa je bidni Rafo sa reflektoron đirava okolo naokolo dok ni naša veslo.
Eto ovo je ka jedna mala kartulina o lita a sad bi spomenija i moga prijateja Osvita Radića zvani Baletić koji samo ća ne spi u kajiću na more.
Dok je litnja sezona bome nesmi o žene Magde na more jerbo mora pomagat u oštariji „Naše malo misto“ …ma kad se dočepa mora nemoreš ga ni ostiman vratit u porat.
Jednu večer oko prvog desetog pijemo na šanku i pitan ja Baletiću …jesi ća ulovi …a on ka iz topa pa da ulovi bogati bila je jarpa lipi fratri …a njegov konobar Mate Sinković …pivač ka grdelin …sa lipin drugin tenoron …na vas glas da ga svi čuju baci besidu:
-pa nemore on ništa drugo ni lovit vengo fratre jerbo je jako pobožan.
Svi su zavarili o smija. Nerazdvojni par Đoko i Fifi …jedan dan me zovu na obid i to na brudet o cipli i ugori. Ma ti brudet je specifikum jerbo je vječni skandal između Đoke i mene jeli se brudet kuva sa petrisimulon oli sa selenon.
I ti dan dok je Fifi parića brudet Đoko i ja smo bome ka pravi govornici uz skandal popili skoro bocu viskija i to ne svakega vengo onega lipega Vat 69.
Brudet smo lipo izili i ni bi loš ..ma nismo mogli zakjučit ko je u pravu pa san ja lipo izvadi na Internet nike ricete za Đoki dokazat.
Ma ke pri bi tovaru ušlo u glavu vango Đoki.
I na kraju malo o lignjan i ulovu. Pozapodne …pri sumraka izajde isprid mista dvadesetak kajići i to sve domaći „meštri“ o lignjanja, a samo jedan među njiman je bosanac i to o moje žene zet ća san ga pri spomeni.
I moran reć da u prosjeku ti moj prijatej Rafaelo uvik jema lipi ulov pa su niki na njega i đeloži, a naš zajednički prijatej Milenko zvani Đek ga je prozva Talični Rafo po onemu sritnome liku iz crtići.
E da ne zaboravin sa tin Đekon koji je moj prijatej i susid ja gren na parangale. Niko na svitu nima pcijencu za odmrsit nadit i složit parangale ka on tako da on i drugima to radi. Najdraža mu je riba Ugor na parangal, a sa kraja kad lovi na tunju lipi veliki Glamci.
I moran se pofalit da smo uvik osim jedan put jemali lipi ulovi tako da san doni sobon u Zagreb oko 6 kili Ugori za kuvat brudete na Neretvanski nači ali sa petrsimulon a ne sa selenon.
Eto selen Đoki pa neka napiše ricetu i da je na Internet.
Moran se za kraj osvrnit na takmičenje u ribolovu koje je organizira lokalni klub „Lignja“ na čelu sa kapetan Jurićen i na tome takmičenju san ja i moj šura Srđan prošli loše uvatili smo samo tri ribe …ma bogami nismo bili zanji i da tragedija bude još veča prvo misto i pehar su nan odnili Briščani.
Ma ja i danas neznan pomoču koji trikov su uvatili oko dvanaest kili ribe. More bit da su škuše lokarde i ostali nesriknji pacijenti sami skakali u kajiće, ma ća je tu je i gotovo.
Za zabilužit na slike sve događaje a i izmirit svako jutro fibru u moru …dragovojno čini jedan dragi i smišni ček zvani Pepo.
I triba ga pofalit jerbo u naše malo misto bude u dva puta godišnje oko po godišća.
Eto dragi štioci ovo van je sve, zdravi i veseli bili pozdravja vas vaš morski ćovik Šangarelo.