tekst: Jadran Šantić Šangarelo
Jo judi moji ča je to bilo?
Skala se na nas bis nebeski i u vidu ludega vitra učinija je da i naše lipo pitomo more Jadransko podivja i da se dignu bote o 9 joli 10 metri. Evo ja jeman 71 lito i nisan zapameti ovaku kalvariju.
Kako san se poza lita vratija u metrolpolu nisan bi doli ali jeman svoje informatore koji me jako slikovito avizavaju o svemu. Među njima je i moj prijate šjor Neven Jelavić koji je vrstan fotograf pa njegove slike govoridu stvarno ijadu besid.
Tako je doli u naše malo misto puvalo tako da je more razbilo cilu šetnicu na rivi koja je a znate i sami napravjena od lipega kamena. Samo san u prvu baci pogled na Nevenove slike i straj me uzeja jerbo je to stvarno ka kad su srušeni pompeji joli za vrime kataklizme u Skopje ma još i gore ka da je potres u Japan joli Kinu.
Naše malo misto je lipi turistički raj i nadan se da če pulitička maša koja vodi naše malo misto do početka turističke sezone sve to dovest u rad i dačeedu turisti jopet lipo špancirat našon rivon. U podanku našega kvarta jemdu dva tri betonska mulića oko koji je lipo žalo. Ajme majko da sad vidite kako je more ka bageron isprimišćalo žalo sa jedne na drugu bandu mulića i to ne lopatu dvi vengo puste kubike žala, ma more če ga jopet vratit na staro misto ali triba proč par miseci za ti posal a sada je bilo dosta par dan. Eto ča van je priroda niko nemore sa njon upravjat ona je gazda naši života.
Dosta o ovin ružnin temama. I sad da se pribacin na nešto lipje na berbu zlata uz more i to na berbu o maslin.
U mista di se obavjaju velike berbe ka če su u Neretvu mandarine svi u temu terminu govoridu samo o mandarinama i to kako su rodile koja je otkupna cina jesu li kurbe trgovci ča zajebali i tako a u naše malo misto kad je stađun o maslin ništa drugo ne postoji ma za razliku o mandarini ovod se svako malo čuje a jesi li zna da je Mate pa sa masline i slomi nogu, da je Mande Antina pala sa skala i slomila kuk da bi ovu godinu jedan čovik iz Bosne doša pomoč brat masline i strefila ga kap pa je bidan umra.
Jo gospe moja koji je to tetar o života . Uvik se čakula joli o ribanju joli o lignjavanju joli o lovostaju kad se ne smiju lovit plave ribe i unda je kaos nima sardel pa nima ni ješke za parangale a bome ni za udičare ka ča san ja. Pa dojde vrime o jematve i pravjenja vina a sa tin je vezana svakogodišnja nestašica cukra jer bome nikad vina ni dosta a zna bit i mali slador pa ga triba bokun pijačaat da bi i vino bilo jače. Pa kad se vino otoči sa dropa triba ispeč rakiju komovicu i tu triba malo cukra i tako u nedogled.
I unda pazite sad u sri berbe o maslin udre jugo i kiša natopi masline i kiša smanji kvalitetu uja pa ajde budi pametan. Rekla bi moja pokojna nona bog ti da vrag ti neda. Neznan dali su u povjesti svita i kad je bilo mnogoboštvo bilo boje jerbo si se moga molit bogu o maslin, bogu od lozja i tako daje. Niman koga pitat jerbo je to bilo davno ma znan da i danas u Afriku Indiju i drugdi u tin krajevima se mole i ostavjadu žrtve za boga kiše i čaja znan.
Moran se malo vratit nase jerbo san zaudobija da su u temu vitrovitemu nevrimenu stradali mnogi brodi i mali kajići koji judiman život znače a odma je na peškariju poskupila riba a posebno škampi i ona riba koja je i prin bila skupa ka likarija. Štioci moji voli bi da san van spjega i nota čakod smišnega a ne ovu kataklizmu ( ne ponovilo se )ma sve je to dil života i ja uvik rečen bit če boje.
Lipo vas pozdravja vaš morski čovik Šangarelo.