PEČALBA, STAROST I ŽIVOT

ŠTORIJE IZ MALOG MISTA
Piše: Jadran Šantić-Šangarelo
Ma sve se ništo mislin i razgovaran sam sa sebon ka sa pametnin čovikon, jerbo nemoreš uvik sa svakin ni govorit, a posebno kad su važne stvari. Evo san bome i ja uvati lipe godine a to znaći da san napuni 63 i jaman …za pofalit se …dva lipa i smišna i napose …pametna mala unuka. Stariji BRUNO i mlaji ROKO. Kad se ja pojavin kod nji u Split, odma je fjera, jerbo in donesen lipe zjogatule za igrat se, a bome in je i bez zjogatul drage me vidit.

Svaki mi se put duša ugrije kad me zagrlu, pojubu i stisnu oko vrata …ma nima lipšega osječaja za jude u mojin godinan.

Počeja san sa ovin uvodon da bi vi dragi štioci jemali pravu sliku o onomen ča ču van ispripovidit. Dunkve …u jedno malo misto na drugemu Braču, a to van je …oču reč Hvar …poslin pusti godišć vratija se jedan naš stari pečalbar, oliti ga iseljenik.

Uvatija je bome lipe godine, ma isto se drža dobro i kad je odija …jema je pravo mladenačke mote ,ni nosi ni šćapicu, ni bija ni zgobavjen …dobro je čuja …bome moga je lipu miru izist, a će se tiće bibiti …moga je i lipu miru počunćit …daklen ča bi se reklo …bija je dobrega zdravja.

U temu malemu mistu ni jema nikoga doli jednega netjaka o pokojnega brata …i njegovu dicu. Svoju dicu je ostavi sa njiovon dicon vanka, jerbo nisu tili zauvik se vratit s njin, a bome ča bi ode i radili kad in je tamo boje.  Jemadu lipe privatne firme o dobri posli i bome lipo zarađiju, a jemadu i nike rente o kuć ča ji afitaju, tako da su dobro fudrani.

Da ne dujin …ti naš čovik je doni sa sebon i jedan lipi gliser, oliti fišermen  ..ma ni bija ni o driva a ni o plastike vengo o aluminija. Niko nikad u to naše malo misto ni vidi taki gliser …lip okretan br,z a ne more ga ruzina izist. Zada lipa otvorena krma …moreš lovit sa ščapiman, sa tunjan parankalima, a more se lipo bome i mrižice bacivat.

Kako je bilo malo svita njegovi godin ..tražija je kumpanje za na more ma i ni bilo …i jedan mali misni farabut,  zvani Toni mu se svidi i on mu ponudi da gre s njin na ribe.Oti farabut se malo primišlja …ma je bome prista i oni su počeli lipo ribarit, dobro jin je išlo tako da su puno ribe dilili siromajiman i onin potribitiman, a i prijatejima.

Svaki put kad bi se vratili u porat i lipo po propisiman armižali brod i podilili ribu zase i drugiman …ti naš čovik, koji se zva Grišpin, (a ime je dobi od svoga pokojnega nona koji je bi postolar) temu svomen kumpanju o ribarščine bi da po sto kun ka nagradu i da jema za španjulete i biru… Ti farabut se čudija …ma je isto prvo vrime uzimja ti sto kun.

Lipo su se družili i ti naš šjor Grišpin je jako pozitivno utica na našega farabuta tako da je poslin samo nikoliko miseci misto počelo govorit ča se sa farabuton događa …ni više vitren …posta je pravi mlaldić, savekomen se lipo javi …zna i pripomoć i više ne čini pizdarije. Koliko su oni dva postali dobri kumpanji svugdi su po mistu odili zajedno, igrali na karte bunbili, a i na marendine se odilo u konobu kod prošpera zvanoga Rašpe, jerbo je bi doseli davo iz Trogira, a na škoju su svi Trogirani Rašpe.

Kad su prvo lito po Grišpinovu povratku došli njegovi iz Australije ..ti naš bivši farabut se toliko svidi njiman da su mu ponudili da dojde kod nji i da čemu oni dat posal. Prolazilo je lito i došlo je vrime povratka u Australiju ma naš farbut je Grišpinovin sinovima lipo spjega …da jin velika fala na ponudi …ma on bi isto osta u malo misto, jerbo mu je sa njiovin papon lipo i da misli kako mora niko vodit konte o njemu jer če če bit nedaj bože da sa zdravjon krola ko če ga ašištit vengo on i njegova cura sa kojon se ima brzo vinčat.

Dica se izbleušila i ne moredu virovat da jema take mladosti u malomen mistu. Koliko se ti naš bivši farabut zbližija sa našin šjor Grišpinon …jedno jutro vadidu oni parangal i on Grišpinu govori: –znate moj lipi šjor Grišpin ja san odlući da više neću od vas vazimjat šolde jerbo mi više ne tribaju. Mala mi se zaposlila a i ovo ća se proda ribe nan je dosta ja Vas puno poštijen …i nije fer sad kad mi netriba da vazimjen vaše šolde.

Gleda ga stari Grišpin i iz škafa ispo katride izvadi bocu lipega viskija …potegne dade i farabutu …počeše čelo pa brke i reče mu ako je tako dobro ma ako ti ikad ča zatriba a posebno šoldi pitaj ne škrbaj se jerbo ji ja jeman zame i priko mire.

Došlo je vrime da se naš farabut ženi i ko če mu bit kum vengo šjor Grišpin. Prošlo je još par godišč …odilo se na more …lovilo, a farabut je dobi i dva sina, jako smišna dičica …na zvrki ka ča in je bi i pape.

I jednu večer u zimu tribalo je partit sa svićon na lignje ma šjor Grišpina ni i farabut se zabrinija i parti u gornje selo vidit ča se događa. Kad tamo auto ispri kuće svitlo gori kroz fumar dim gre put neba jerbo ni bilo vitra a šjor Grišpin leži na sečiji i ništo ga ne sladi. Naš se farabut pripa i pita -a ča me niste zvali na mobilet?

Stari šjor Grišpin kroz brke procidi …nisan te ti plašit a da ti rečen zna san da češ ti doč da te i ne zoven. Priča san sa tvojin papon, a me posla u kurac da oka san doša i tebe vazeja na brod sa sebon da si mu glavu napuni …šjor Grišpin ovo …šjor Grišpin ono …ka da u tvomen životu jema sam Grišpin. Ajde reci ča jemaš da te ćujen.

-Najpri mi recite ča van je jeli vas ča boli oćemo li zvat likara oli da vas odvezen doli u ambulantu.A sad ono ča ste pitali. Sićate se ka ste došli i pitali oću li sa van na ribe? Vi ste bili prvi čovik u momen životu ko me je gleda normalno a ne ka farabuta …kako su me svi zvali i uvik ste me lipo i šesno zvali Toni. Otvorili ste mi novi način života i poštivanja, a ja bi bi najveći smrad kad to ne bio zna cjenit.

Sjede šjor Grišpin na sećiju i lipo gleda u farabuta nasmije se i počne tiradu:
-Je bome sve je kako san i ja sam zamisli, vridan si pošten a bi si sa menon ka da san ti ja pape. Slušaj dobro i ništa ne pitaj, ja se vračan dici jerbo više godišča ne puščaju svaki dan na more. Lipo san se sa tebon izgušta i sad san sam sebi reka …gotovo …finili su mare bali, nima više …svršija je kurbin pir. Dica i unuci jedva čekadu da se vratin …i sad slušaj dobro: brod san pripisa na tebe i evo ti sve karte o broda. Učini san ti jednu štednu knjižicu da ti dica sutra kad odu na skule jemadu za platit fit i spizu …znan da češ ti sa ovin šoldiman dobro upravit za svoju dicu. Ostavjan ti kjuče o kuče da je moreš liti afitavat sve šolde od afitavanja troši zase i za svoje, a ako ko o moje dice bude ti dolazit lipo ga primi …vodi brigu o njiman, a kuću održavaj ka i dosad. Znan da jemaš starega „stojadina“, pa san nate pripisa i moga mercedesa tako da ženu i dicu moreš sigurno vozit …i sve ti ovo dajen o srca, jerbo si zasluži, a i moja se dica slažu, jerbo si ji zamini i vodija si konte o meni ka pravi sin. Molin te sutra gren na vapor za Split i onda na aerodrom …tija bi da me otpratiš i da se lipo rastanemo.

Naš farabut je cilo vrime sta otvoreni just pun suza i ni moga njanka besidu pustit. Kad je doša sebi reka je …baš me drago da van ni ništa …ma isto smatran da ja nisan ovo sve zasluži …popili su po lipi viski i sutra je on odveja šjor Grišpina na reoplan za Australiju. Posli ovega uvik je vodi konte o siromajima i svi su ga jako stimavali. Kad je šjor Grišpin umra on je iša gori sa cilon famejon na sprovod, jerbo nikad nije moga dobrin vratit ča je dobi od pokojnega šjor Grišpina sa čijon je dicon osta u dobre …ka sa svojon famejon, a oni su njegovu dicu odveli na skule u Australiju.

Eto dragi štioci ovo van je sve istina tako da se more reć da su judi sa koja jako duševni i pošteni. Do sljedećeg čitanja pozdravja vas vaš morski čovik Šangarelo.

Zagreb 03.11.2011                                                       Jadran Šantić Šangarelo