piše: Tonči Ćepernić
Jo san Bročanin i volin svoj Broč. Jema nas fola bogu dosta sedamnaestak ijad, a jemo nas od San Pedra, priko Bolivije, do Patagonije, pa priko južne Afrike do Australije i Novog Zelanda, Ma svima nami je jedno zajedničko – volimo svoj Broč, njegove tiče rede i kosiće.
Čakavci smo, ma nas jemo i štokavaca na istoku škoja. Volimo svoj jazik, ne sromimo ga se. Kad bi se koji študent vroti na ferije doma pa progovori književno, svi bi ga grubo gledali. Ma gle molega če se je brzo nauči pameti!
A kad se dvo Bračanina sretnu u daljini mozak in se som resetira i odmah propivaju savršenu čakavicu. Geni. Ma i jazik nan je različit. Svako misto jema svoju pismu. Prožnićani pivajući govore, sifonija. Pučišćani ubacuju ij di tribo i ne tribo. Mi Postirani udaramo tvrdo Č. Ali jo još nisan nauči rozliku izmedju č i ć. Supetrani i Milnarani uopće ne koriste č. Oni sve na C.
Svima nami je zajedničko da nan je posljednja žeja da nas ukopoju na naš škoj. Zajedničko nan je da se znomo zajebovat somi sa sobom. Sve ove viceve o broškoj škrtosti smislili smo mi. Tili smo vas relaksirat, opustiti, nasmijat. Jer smih je lik.
Nimo škrtog Bračanina. Ajte recte jeste li kojega vidili u životu. Jo ne. Evo nas je ova kurba korona razotkrila. Otkrila je našu strogu čuvanu tajnu. Dokazala je da znomo primit će nevajo sa teraferme, ma volimo i nesebično darivat. Darežljiv smo mi svit. Brzo su shvatili to oni će su u hipu napunili trajekte bižeći u Split od covida.
Če je je, mi smo van lipi šesni pametni, nismo škrti, znomo nesebično darivat. Zato, biš te ča od nos. Poradi tega će vas volimo. Eee.
..
A će son vam jo reka pasonu šetemonu. Zaraženi Bračani nemaju simptome. Epedimiolozi se čude. Ma jo san to zno, Covid djeluje na kopnu ali teško vojuje sa Bračanina. Tribalo ga je pustit po cilom škoju, pa onda ga dokrajčiti.
Svi bi mi dobili imunitet a virus bi pobiga. Reka bi i on: “Koji je ovo ludi svit! Svi u svitu tresu gaće od stroha somo ovima ovod ne mogu ništa.” A kad je tako. To je zbog našeg dišpeta, provog uja i plavca molega.
Ma sve se čudim ovim našim stručnjacima će još nisu stigli na Broč i proglosili da je serum napokon pronađen. Triba samo vazest dec krvi fetivog Bročanina i eto van milenijskog lika za cili svit. A če bi cili svit govori sa ča i če bi bili škrti, ha to je manje zlo!