piše: Jadran Šantić Šangarelo
Štovani štioci nisan van se odavna javi jerbo iman problema sa zdravjen i kad pišen ovi jebeni Parkinsonizam mi trese ruke pa puno falijen slova. Naslov san napisa kratak jerbo bi bili puno tega za stavit pa san se odlučija za ovako kratko a kroz dajnji tekst ču van sve spjegat.
U naše malo misto živija je jedan jako osebujan čovik. Zva se Mate Peko zvani Škaja joli Njoko a bi je vrstan pivač, zatin ribar kome je lignja bila krajica mora.
Bija je jedno vrime i pulitičar ma pošteni ljevičar koji je uvik za prvi maja jema lipi friško ubrani crveni gariful na reveru o jakete joli košuje ako bi bilo vruće. Uvik je bi pun humora i dobre voje a najskoli kad je tribalo zapivat. U svoje vrime bija je veliki galeb najskoli kad su u pitanju čekinje ni mu bilo ravnega.
On sad pok, pa pok. Dragan Jurić pa pok. Milko Andrijašević, pa Kleme i još par nji stvorili su klapu BEREKINI ka ča i jesu bili. Pokojni Škaja je u žepu uvik jema malu usnu armoniku i sa njon je dava intonaciju i ne bi tu malu armuniku da za sve šolde ovega svita. Jedan put mu je na poklon donija jedan moj prijatej novu HOHNER ma ke on je lipo zafali i meka je doma u kantunal. Nikad je ni upotrebi za dat ton pismi. Bi je neko vrime i diretur komunalnega poduzeće ma to ni važno razdobje njegova životnega opusa.
I sad ono najvažnije. Voli je more i ribanje ma od svi gušti na moru najviše je voli lignjolov. Vozija je jednu malu batelinu sa nikin starin Tomoson koji je u ona vrimena bi car oli kraj motora do 5 konji. I kako se priko zime vadidu kajići vanka tako je i Škaja izvadi svoj ma je zaboravi konzervirat motor i na primaliće je ti motor kroz zimu zariba. Nije to bogami našega Škaju zabrenzalo vengo je on baci ti tomos i u valu na vesla odija na lignje.
Posli bacivanja tomosa nije više vadi brod priko zime vanka mora vengo bi ga istega na žalo, očistija i pitura dno sa intoniton i nazad u more. Poza tin je lovi bome cilu godinu i unda bi se fali da on jedini lovi najmanje 365 liganj godišnje. I je, tako je bilo a kad bi uvatija malešnu stavija bi je u praznu škatulu o španjuleti a kad bi bila veća joli više nji onda u plastičnu vrećicu.
Kajić je veziva na poseban način kroz alku na provi provuka petju o konopa i kroz nju ka kroz laso bi provuka bokun daske od po metra, debele 2 centa i široke 6 centimetri. Kako je stari malo je pomalo zanemariva brod pa je lupa sa provon o rivu i puka pa se moglo šaku provuč kroz bužu.
I unda je kupi jedan malešni motor od 3 konja jerbo njemu ni triba veći. Malo se s njin služi radi godin i bolesti, pa je unda sa tin se počeja bavit njego zet Toni. Puno vridan momak koji je popravi brod i pitura ga je pa se bavi vršaman ma uvik dugo traži vrše jerbo ili mu ji niko makne joli zaboravi orjentire.
Naš junak ove štorije je počeja slabo vidit i prista je izlazit iz kuće ka da se zasiti života i sam se stavija u kućni prežun. Žaj me puno jerbo ga nisan dugo vidija a kako je moj veliki prijatej Boro koji je njegov netjak zna san uvik kako je i kakvega je zdravja.
Kako san ovu godinu radi ove kurbine korone produži stat u naše malo misto i nisan se vrnija u metropolu prin dva dana zove me moj prijatej Boro iz metropole i kaže znaš umra mi je ujac Mate. Ka da mi je niko ukreja dil mene tako san se osjeća i ka da mi je neko opalija plesku svon forcon da se zamantan.
Cilo naše malo misto je u žalosti i zato san nota PARTIJA JE ČOVIK jer je MATE PEKO zvani NJOKO joli ŠKAJA bija uistinu čovik sa svin atributiman koji određuju čovika.
S ovin befelon bi se i oprostija od moga prijateja sa pozdravon ADIO KUMPANJO I NIKAD VIŠE. Znan da mi je prijateju Bori teško jerbo je Mate bija njegov idol i najdraži ujac.
Neka mu je laka zemja i neka gori sviri u armuniku i neka ponovo sastave BEREKINE jerbo ji je više gori nego doli i neka jopet osvaja čekinje.
Živi i veseli bili štioci dragi, pozdravja vas vaš morski čovik Šangarelo!