ŠTORIJE IZ MALOG MISTA
piše: Jadran Šantić Šangarelo
Evo kad van sad pripovidin ča mi se dogodilo …ritko če ko virovat. Ma znan da če bit i oni ča če me proglasit za trči laži, a bome znan da će se nać i koji stari ribar kojemu se ništo slično dogodilo.
Dunkve …bija san kod jednega bivšega prijateja na prvi Brač u po lita za odmorit se …poć na ribe i sve u svemu zajebavat se kako i priliči čoviku na godišnjemu odmoru. Upozna san jednega jako smišnega čovika bračanina Tonkota koji je više bija na more vengo sa ženon i dicon doma, ma pari mi se da je i dicu pravija na more.
I bome mic po mic ja san se sa otin Bračaninon sprijatejija. A kako? Lipo jer me je jedno jutro rano intra sa svojon batelinon na more di lovin ribu sa puškon i odma mi je tija kazat za jednu lipu poštu o oborite ribe.
Problem je bija u temu ča se do te pošte more samo kajičon a ja niman kajič na otoku i on se je ponudija da če me vozit, a ja bi triba diko kupit benzinu. Odma san prista jerbo ti trošak o benzine je bi mizeran u odnosu na …kako san mislija već ubijene komarče, zubace, velike ugore, a more bit i koji lubin, kirnja i ko sve more znat.
Dogovorimo se mi za sutra ujutro i ja odma s njin gren kupit benzinu za motor da ostane u kanti u brod. Kad san se vratija doma kod onega bivšega prijateja lipo san sve spjega ča mi se dogodilo i da ču sad moć svako jutro na ribe brodon do lipi pošti.
Svi su me počeli zajebavat da ćedu odma kupit ledenicu za stavjat ribu ča je ulovin. Sutra u jutro san se diga …deboto pri nego san lega, jer san bija cili nervožast kad ču doć do ti pošti i zaronit. Skala se ja do porta u Sumartinu kad tamo isusa mi oni moj bračanin več sidi u batelini i puši i pita me očeš li kafu, ma samo da znaš ni ti je bog zna ča jer moja Tone slabo kuva kafu …perke jon mora 20 deki trajat cili misec.
Potega ja prvi gutljaj tega otrova parilo mi se da je voda o pranja zagoreni teč a ne kafa, ma jebiga nemoš zapalit na prazan stumik a onda san pušija ka turčin. Još se bome ni svanilo a mi smo već izašli iz porta …kad u nika doba vidin ja ništo se crno vaja u more na niki par sto metri od nas.
Govorin ja onemu mome Bračaninu …Tonko a ča je ono a?
Pogleda on …ma kako ni bi sigur okrene batelinu pravo na ono ča smo vidili. Kad tamo …gospe moja pravi pravcati divji prasac nako od oka svoji 70-80 kili i bome lipo pliva prema prvomen Braču. Asti boga a čačemo sad?
Jema moj Tonko nike stare osti ma su tupe i ruzinave i nevirujemo da će se moć prasca sa njiman ubit, a kako je prasac u more i ako ga uspijemo ubit nemore nas niko kaznit za krivolov.
Digne se Tonko na noge i udri sa ostiman jedan dva puta ma tvrđa je koža o prasca ja mislin nego o kita. Rokče prasac i provaje uteč ma mismo brži i manovramo oko njega.Udri vrti …udri vrti …ma ništa o tega i onda u nika doba pade meni na pamet ma koji san ja cukun pa jeman dobru maresovu pušku sten sa harpunon i ostiman.
Skočin se ja da san skoro privrnija batelinu, a Tonko sav pristravjen zaronza …čati je nesriknjače očeš nas potopit i mene udavit ,pa znaš li ti da ja neznan plivat.
Od sve muke san se skoro zacenija o smija Gospe moja cili život je na more i ne zna plivat.
Onda smo napravili ratni plan ka pravi lovci na divje prasce. Malo mi je bilo jebeno nategnit pušku vanka mora, a u more nisan tija skakat jer je i mene bilo straj. Namistija san pušku na jači šuc i opalija sa niki po metra prascu u šiju. Muku ti ježovu …kad se počeja koprcat skoro me potega u more. Kako je harpun vezan tankin najlonskin konopon …nesmiš jako potizat jer če puknit …vengo polako nategni konop i sa onin tupin ostima svon forcon san opalija prasca u šiju i bogami san uspija probit kožu još se je on koprca skoro i po ure dok se ni smirija.
Lipo smo ga vezali cimon o bateline i vratili se u porat je bez ribe ma sa lipin divjin prascon. Kad smo ga izvukli i sa karijolon odnili u mesara jema je 96 kili. Judi su se u portu zlamenovali kad su vidili ča smo ubili.
Eto to mi je bija najteži trofej ča san ga ubija a sa mojin bračaninom Tonkon i danas san prijatej. Lipo smo podilili prasca posolili osušili i bome u pršutima guštali.
A poslin su mi pričali da je još vaki lovina u kanalu bilo. I moji štioci dragi …ja bi se potpisa samo vake beštije lovit u more, a ako uleti i ča lipe oborite ribe bogu fala.