ŠTORIJE IZ MALOG MISTA
piše: Jadran Šantić Šangarelo
Jo judi moji koja se čuda po svitu događaju, ma jopet misliš to je po svitu a ne kod nas, ovod na more. Dunkve Gradac malo lipo i šesno misto u sri Makarske rivijere jema dva porta. Ma o temu san več pisa i da mi ne bi niki brontulavali moran bome još jednon o tin portiman i tomen lipemu mistu pisat.
An da se vratin onin čudiman, jo kako je to sve ingropano a na kraju jedniman je tužno drugiman je smišno, a bome jema i oni kojiman je to jako ozbiljna stvar. Šoma dela šoma u to malo misto na puntaman o muli zna bit puno oni koji lovidu na tunju glamce, špare, kneze, fratre, babice… Ma zna se ulovit i sipa a znalo je bit i obotnic, ma ovi put štorija gre drugovačije.
Nikidan pridvečer na tin muliman se skupila jarpa dice, a bilo je bogami i ozbiljni stari ribari, i svi baciju tunje niko nadiva kruv niko pizdicu olitiga pedoču a naš junak ove štorije mali LOVRE koji je planetarno poznat jerbo je uvik u portu di mu otac jema restoran “NAŠE MALO MISTO“ i di se svako lito izminjiju puste jarpe turisti svak zna LOVRU.
Tu večer mu je Jakov Šime rosinoga nadija krak od lignje i posla ga na mul, ma mali Lovre ni tija sa sviman stat na mul več je parti na puntu malega porta i baci udicu.
Ni prošlo ni pet minuti kad za gospu nastala dreka Pape Pape dojdi pomozi ništo san ulovi ma ne mogu izvuč …dere se Lovre. Skoči moj prijatej Osvit Radić i iz konobe …vazme osti i trč do Lovre potiže i on ma gospemi oni doli ne popušča i ujedan momenat pojavi se obilata glava a Osvit je brzinon munje moton pravega profesionalca ostiman pribije na dno.
Trese se držalo oliti salma od ostiju ma Osvit ne pušča. Skupija se narod svak pun znatižeje ka salpa govan i svi nagađaju ča je. Zna Osvit ča je i u nika doba izvuče lipi bokun o ugora dabi u njemu bilo oko 3 kila.
Kad se je to sve stišalo a Lovre posta junak dana kojega bi oni stariji najradije skalamaštrali a dica ga dizala u nebesa ka junak,a Osvit je na balancu baci ugora i virujte da je u njemu bilo obilati 2 i po kila. Kad se je sva ta gungula u portu malo stišala onda su u „Malo Misto“ počele zajebancije na račun oni ča uvik pituraju oči sa velikin riban ča su ji ulovili …ma zajebancija je pala i na one dežurne zajebante jerbo ča oni jemadu pizdit a nikad nisu ništa uvatili osin upale plući oli od velikega lokanja ladne bire upale grla.
Ča je sa ugoron svršilo neznan jerbo nisan dobi avize …ma ča je bilo da bilo lipo je platija glavon i sigurno pomoga da se sparića lipi brudet.
Poslin te večeri nemožeš o dice proć rivon u portu, jerbo ji jema mali miljun i svi bi tili ulovit kojega ugora ka i naš junak Lovre.
Kad se vratin u moje ditinjstvo koje san dilon proveja u Opuzenu na Neretvi a dilon u Split u Veli varoš …največa stvar ča san ulovi sa nikoga mula je bi jedan stari raspali postol, a troke ugor.
A kad se sitin moga barbe Šanta koji je cili život lovi glamce, onda bi i za njega mali Lovre bi junak.Eto štioci moji lipo vas i šesno pozdravja vaš morski čovik Šangarelo. Živi i veseli bili.