piše: Jadran Šantić Šangarelo
Najpri da se javin ka ča i dolikuje pristojnin judiman i da sve lipo pozdravin i da Van se škužan ča nisan dugo ništa nota u ovu makinju.
Kako i sami znate da ja po godine obitajen u naše malo misto na more a po godine u Zagreb, ove godine me nisu baš pratili godimenti. Nikad manje ribe nisan ulovi priko lita ka ovu godinu. Ova boleština ča je zovedu parkinsonizam me je fermala u svemu od rib do notavanja lipi događaji.
Nota bene nikad do sad nisan ništa notava u ove moje štorije o meni samome vengo uvik o drugima a da van pravo rečen nima se ča puno notavat o meni jerbo ča more bit interesantno znat o jednemu staremu čoviku vengo same pizdarije ča i je skupi za svoga dugega života.
Ma vrag ne ore i ne kopa vango uvik o zlu misli tako da je to zlo ovega lita na velu Gospu čapalo i mene, i to bome dobro ma uspi san se izvuč i rekuperat.
Moja pokojna Nona je uvik govorila sinko nikad se ne moj kupat u riku joli u more na velu Gospu jerbo je to opasno a najskoli punega štumika.
I baš na ovu velu Gospu ja san zaudobi nonine beside i vidi vraga skoro me koštalo ove blentave ludure o moje glave. Ma da ne dujin višje to jutro san bi na ribe a bila je žestoka pripeka. Ja san uvik ispo tende sidin na klupi o krme i lovin. Ti dan san osta sve do 11 uri ma za ludu ribe ni i ni. Kad san se vrnija doma žena me je lipo dočekala sa ledenon pelješkon travaricon iz dubokega zamrzivača, pa se onda potom lipo blagovalo, popilo se i žmul dva lipega crnega vina sa Sicilije i moji su se partili na plažu banjat a ja san osta malo ubit oko.
Nigdi oko tri bota san se i ja skala u kafić na plaži za kojega kažemo da nan je ka dnevni boravak joli tinel i odlučija se skočit u more. Sićan se da san doša na kraj mula i skoči na glavu ma poza tin se više ničega ne sićan. Probudi san se u auto o prve pomoći i cilega san ga pobljuva.
Vozili su me u moj lipi Split u bolnicu a onu dežgraciju u auto san jema kraj Zagvozda. Posli mi je žena pripovidila ča je bilo da su niki judi vidili da plutan i da se ne mičen pa su me istegli na žalo i davali mi prvu pomoć. Među tima se naša i moj sin Vibor kojega su dica trčala iskat doma. Svi su mi unuci bili u šoku Bruno, Roko a mala Mara moje zlato je bila cila izblesirana i puna suza, tuga je bila golema. Utopija se dida.
Kad smo arivali na firule u Splitu primili su me u ošpedal i smistili uz puno pažnje ka kraja oliti ga cara. U ošpedal san bi 4 dana i poza tin mi je sin doša po mene i vrati me unaše malo misto. Kad se ova nasritna vist raširila po mistu ni bilo čovika koga poznajen da ni pita ča je sa menon i kako san.
A ča se tiče dijagnoze iz ošpedala glasi: da san slučajno popija još jedan dec mora bi bi partija sa biljeton u jednemu smjeru. Da bi u sve ovo ubacija i notu smija sviman san ispripovidija da san bi gori u svetoga Petra ma ni ga bilo na vrata o raja i lipo san se vrati doli doma, ma nikad više neću na velu Gospu skakat na glavu u more vengo lipo s pomjon ulist u more do pupka i daje jok. Pametna je bila moja pokojna Nona od sad ću se uvik sićat ča mi je sve spjegavala.
Eto štioci moji živi i veseli bili i nemojte njanka promislit skakat na glavu u more punega štumika a najskoli na velu Gospu.
Vaš morski čovik Šangarelo