ŠTORIJA O KAJIĆU GRINTI I ŠEKANJU

Jadran Šantić Šangarelo
Cipalo je orcalo i kalade sorilo da je to bija pravi potopka ka u ona vrimena kad je Noje napravi onu svoju arku. To su pucali kaluni blišćilo je nebo ka za vrime največega vatrometa i onda je ka malo se smirilo. Izaša san vanka kupit „Slobodnu“ a onda sa ženon doma popit kafu jerbo ni davalo baš nasigurno da neče opet sneverat. Srija san prijateja Šimu Rosina i pita me ma ča misliš koliko je palo nočas an? Ja se izbleušija i računan pa ka iz topa a biće blizu bar 50 litra, a on se smije i zlamenuje ma koji 50 palo je jušto 99 litri kiše. Ma za gospu dobro san reka da je bija pravi potop, bogami je sigurno nalilo sve male brode u portu di i ja držin svoju pasaru, ma o temu čemo posli.

Ovo štoriju san tija ispričat tako da ću rado spomenit nike moje prijateje i poznanike jerbo ti svi judi sa kojima se družiš ne moredu bit prijateji. Dok san živi u Splitu jema san nikad davno jedan lipi gumenjak o5,5 metri sa Đonsonon o 25 konji, puno lipi gumenjak ma ni za na ribe. Dupera san ga 5-6 godin i onda ga proda pa san posli odija na ribe sa prijatejevin brodon.

Bilo je tu razni brodi od velikoga lipoga krstaša“Larusa“ o moga bivšega diretura i velikoga prijateja Borisa Kačića pa do pasare moga prijateja Jure Politea koji je najgrintaviji čovik na svitu kad je na ribe. Nesmiš onda ni vajat brod nesmiš govorit naglas (a ja poslin ovega ludega rata osta gluv od minobacača) nesmiš kašjat nesmiš prdit a ne daj bože da se provaš priko bande popišat ,ajme ti majko o beštimji i grinte Jurine.

E kad bi pale velike kiše ka ova nočas odma se je moralo poč u lučicu šekavat kajić da ga ne bi afundalo. Puno san puti mislija gospe moja oču li ikad nač zase lipu šesnu  tešku i široku pasaru koja se sama šeka.I bome san je naša u jedno malo lipo brodogradilište ma ne na more več u Zagreb i to brodogradilište koje nima čovik sa mora vengo pravi i fetivi bosanac. Da me se nebi krivo svatilo niman ja ništa kontra bosanac ma to san reka da van pridoćin da više nima granic o tega ča ko more dobro napravit.

Ti mali smišni bosanac Mirzet je o moje žene a sad i moj prijatej i napravi je pasaru o5 metrikoju ne triba šekat jer je on napravi samopražnjenje i moš lipo spat miran dok je povodanj jer jemaš brod koji je razbi predrasude da se samošekaju oni skupi i veliki brod io šminke.Kako sad priko lita držin pasaru u porat u Gradac upozna san puno smišni judi, berekina i zajebanata ka ća su Fifi i Đoko, Mate Škaja pa Osvit Radić i moj prijatej Mleden Stipić zvani Mačak.

Ti moj prijatej Mačak je jedan zajebant i funcut da ga nima na svitu, on po noći sanja zajebancije i barufe tako da uvik moraš bit u fermu ta te ne zajebe. Ma  u prvo vrime ka san doveja ja tu moju lipu i šesnu a pametnu pasaru u porat svi su je gledali i davali komentare ma niko ni zna da se šeka sama. Pale su i prve kiše i svi gredu šekat kajiće a ja u Malo misto na travaricu i guštan. Počelo me se popriko gledat pa i između sebe ispitivat ma ko mu to šekaje brod i kad, sve dok nisan jednon reka momen susidu u portu Jošku da mi se brod sam šeka.

Prođe niko vrime a ja sidin u jedan kafić kad gre Joško poslin kiše i kroz zajebanciju da svi čuju viče Jadro ne tribaš se sekirat ja san ti išeka kajić a mogu ti i daje to radit ka prijateju.

Nikomen ni bilo jasno dok se ni otkrilo da se moja lipa i šesna pasara šeka sama.Sviman je bilo sumnjivo ma zašto Joško šeka meni brod? E i da završin štoriju sad kad jeman tako lipi kajić moj prijatej Jure Politeo more smenon na moreu svaka doba ma u momen kajiču ne smi ronjat i more radi sve po guštu ća mu se oće. Ma moran još ništo dodat ovo pišen na prvi dan lita a vanka tučedu kaluni lije ka iz kabla pala je fibra za vrime o zime a ne o lita i toka me mislit kako je sve išlo kvragu a vrime posebno. Zdravi i veseli bili štioci moji pzdravja vas morski čovik Jadran šantić Šangarelo.

Gradac 21.06.2010