ŠTORIJE IZ MALOG MISTA
piše: Jadran Šantić Šangarelo
Evo doša san u vrime kad mi se počelo vračat ono iz ditinjstva, ono kad san ja čini berekinade starijiman. Jedno jutro ka po običaju gren ja kupi novinu u trafiku i bome popit kafu u „Karaku“.
Tamo se za nevoju ujutro ništa posebno ne događa jerbo je uvik ista maša, i uvik se vrte isti razgovori od pulitike priko maslin pa do ribarščine.
I to jutro sidnen ja i čekan oće li naletit oni moji mlaji kumpanji …Dejan i Kristijan jerbo se sa njima jako lipo držin i bogami me lipo stimaju ka starijega ma isto me malo o dragosti podjebaju sa onin …evala barba.
Ma to jutro i nima negdi su zaprašili ranije sa poslon ajde neka mislin ja i gledan u more. Lipi jesenji dan …sunce izašlo …lipa bonaca koju razbije jato male ribe koja izliće vanka jerbo je tira bilizma …i tako gledan ja i mislin se …ajde gren malo na more panulat, a moga bi i ščapon ispo sebe ćako i ulovit.
I oden ja doma po kjuče o broda. Lipo san iz dubokoga vazeja ešku koju držin u male škatulice o bonboni i partin ja vanka. Ma dok san odija priko dvora stalno san mislija da me niko gleda i ja se ošervan a na teracu uz ogradu moj lipi unuk Bruno i mlaji malešni Roko sa ocem mojin sinon Viboron i sve se ništo smijulju.
Ruknen ja mojin baritonon …ajde ća van je ća se zajebajete, a Vibor …ništa Pape ništa. Oden ja na more pustin panulu i polako gori doli popriko prema Trpnju pa prema Pločama …deboto dvi ure i njanka geru nisan uvatija.
Oko mene pusta mala riba ma na panulu ne gre i ne gre. Kako me je več bilo štufalo …oden ja na jednu poštu, pa ču malo ispo sebe lovit.
Bacijen ja sidro lipo se raskomodin lipa ladovina ispo tende božiji mir i tišina. Izvadin ja dva štapa …ka sa jednin ču lovit ispo sebe, a sa drugin ču niz kurenat na brumu.
Sve san ja to lipo polako po komodu učinija i vazmen ja prvu škatulu o eške kad jeman šta vidit …unutra bokunić karte …nacrtana mala kozica i piše mi smo prave pofrigali na maslinovo uje i sa juton paprikon.
Zabeštiman ja na vas glas boga čaćina i materina …vi ste našli sa menon se zajebavat i opizdin o dno kajića sa onon praznon škatulon. Uzmen drugu a ova je bome malo teža pa se mislin ajde dobro neka se zajebaju ma isto ću ja malo lovit.
Otvorin ja drugu škatulu a u njoj niki šoldi i pismo na malo karte i piše …ajde Pape nemoj se jidit …vako ti je lakše, pa kad se vratiš u porat …ulovi ribe za gradele na puntu o takujina.
Jebenti život kad je došlo dotle da te zajebaju vlastita dica, a bome i unuci lipi jin je primjer da otac ka da in je Nono redikul …čut će oni mene.
I sve ja to grintan …bacijen po brodu štape i škatule …udrija san o bandu dva puta i nogon od jida, a kad san počeja vadit sidro …popuza san i prostra se koliko san du i širok.
E unda san skala sve odozgara doli i nako jidan …udriven izvadin sidro i bacin ga u spremište …upalin makinju i u porat.
Lipo san veza brod …složija arte i šćape, pa u „Malo misto“ na travaricu.
I dok san pija …vrtin filmo o zajebancije kad me Osvit Radić podjebe ..an a di si sakrija ribu ća si ulovi!
A to mi je prililo čašu opalin ja šakon po šanku i nako grintav i jidan zaputin se doma …ma na peškariji ni bilo ništa. A ja ti u prijateja Gorana mesara kupin lipoga svinjskoga vrata za na gradele i dojden ispri vrat o kuće bubnen šakon na vrata kad u to me neko trese za ramena —
-Jadro Jadro ča ti je oli si poludi …cilu noć ne mogu oka o tebe sklopi stalno si ništo ronja ..kara se …lupa šakan po posteji …da nisi bolestan a.
Probuđen ja iza sna seden na posteju ..gledan moju Boku i udri u smij …ma gledaj ti kako furbasta dica moredu i u snu svoga Nona i Papu zajebavat..Ma oti smo dan isti ili meso na gradele i bogami san ja mojin zajebantima u Splitu lipo nazdravi sa par žmuli crnega vina iz južne Afrike.
Ko zna more bit da će me mularija diko i zajebat ..ma poslin ovega sna uvik pri nego gren lovit …dobro prigledan škatule da mi ko ne zajebe ešku.
Et zdravi i veseli bili pozdravja vas vaš morski čovik Šangarelo