Marija Juračić
Ajmo, Mare, do kafića
pored Korza ćemo sidit
kapučino ćemo piti
puno lipog svita vidit.
Korzo je ka modna pista
malog mista, bela vista.
Ča se nosi u Parizu
to ćeš ti na Korzu vidit.
Ča u Londri je u modi
to će malo misto slidit.
Tu se šeće gori, doli
tu se smije, ćakulaje
tu se piva, tu se voli,
tu se šuti, barufaje.
Ajmo, Mare, do kafića
pored Korza ćemo sidit
kapučino ćemo piti
živ teatar ćemo vidit.
—
ćakulati – ugodno razgovarati o svakidašnjim temama
barufa – glasna svađa