piše: Đurđa Vukelić Rožić
Zvala sem vnuka, gazdu agencije za prodaju nekretnina, bez Jožekovoga znanja i pitala ga kuliko bi jezera eurov dobili za našu sirotinju. Vse skup: zemlu, šumu, stroje, kravice, pajceke, zdenec… Vse, vse, vse.
Za nas, računala sem, bi zeli lepi, topli, mali stan v Zagrebu, blizu tramvaja i bolnice, da moremo do dece, a da je ne štentamo, i naj za promenu, drugi sadiju cveče i drveče, kosiju travu za nas. Bumo gledeli lepotu, a da se ne moramo mučiti, makar mi se čini da to ni isto veselje. Bumo se špancirali kak je doktorica rekla da se mora, a negdo naj popravla nogostupa, pomeče lišče i odgrinja sneg. I zaradi si. Dale, prema planu, nekaj bi penez dali vsakomu detetu, malo na banku za crne dane, malo v strožu, i otišli kruzerom na putovanje oko sveta. Vse sem lepo i prelepo splanirala. Stan bi došel tuliko, put oko sveta oko pedeset jezera eurov. Valda smo zaslužili sveta videti, am smo se ljudi i marve nadvorili za svojega živlenja, gdo zna kuliko. Za dva sprevoda treba ostaviti peneze, a grobnicu imamo. Gda se vrnemo z puta moremo mirno mreti. Bye-bye ovej svet! Okrugli ili ne.
Da bi vsakom detetu nekaj dali, a da malo penez ni velka sramota, zračunala sem da bi nam treba inkaserati oko 540 jezera eurov. To je bilo minimalno, a more i više če bu dragi Bog praveden. Navek sem čarape krpala, staru robu predelavala deci i sebi, od radnih lač đakima šlape za školu šivala, štrikala od stare vune, heklala, malo toga se išlo kupiti v dučan. Sad sem štela videti kak se bu ta naša skromnost i strplenje splatilo.
Vnuk je naše bogatstvo gledel i obilazil, kak da je tu prvi put. Podbočil je bradu z desnu šaku, levu je metnul prek želuca, čelo nabral tak da je zgledelo kak livada z redima zrušene, pokošene trave.
– Nije vrijeme za prodaju. Za sve možeš dobiti oko 40 tisuća Eura. I to ako! Morao bi netko baš dobro zagristi, zaljubiti se u kuću, staje, livadu, pogled, čisti zrak, finu vodu u bunaru. Ono nešto što bi ga privuklo da kupi. Sjećanje na djetinjstvo, možda… A za taj novac ne možeš kupiti ni špajzu bez garaže u Zagrebu. Preporučam da pričekate oporavak ekonomije i tržišta nekretnina.
– Ali, sinek…
– Razmem, babica. Ali, na kuću moraš gledati kao na investiciju. Sve vrijeme ju uređuješ i investiraš u nju da bi zaradila.
– Am je to dom! Ni to tam nekaj. Gde se onda čuvaju uspomene? Kam se deca vrneju?
– Bako, vremena se mijenjaju. Tako se nekada živjelo i mislilo. Emocionalna vrijednost…
– Stare ljude se otpiše još dok su živi! To je taj napredni svet koji nikoga ne poštuje! Emocionalna vrijednost! To, sinek dragi nesu cigle i žbuka, crepi i beton. To je dom! To predstavla tvoga deda i babu, dom je tvoga oca! Skrbelo se ciglu po ciglu celo živlenje.
– Babica!
– Ja bi štela pobeči od te robije. Sveta videti! Počinuti! Stara sem, nemam kaj čekati! A sad to vse skup niš ne vredi.
– Babica, na kompjutor ti instaliram Google Earth i otkrivaj svijet iz svoje fotelje pored tople pećice. Kaj da te morska bolest uhvati na kruzeru, povraćala bi na tri oceana! To se ne isplati, ako mene pitaš.
Pogledela sem ga spod oka ze svih onih svojih osemdeset let. Zato sem njegvoga oca i njega slala vu vse te škole! Bome lepo. Nekaj bi potopilo lađu, kvar, santa leda ili ljudski faktor i onda bi me morski cucek pojel za gablec. Ili bi se smrzla več negde i za jezero let bi našli primerek stare bedače v prnjkima, vu večnom ledu na vrhu nekakve gore. I istraživali. Pak bi se vidlo kak je sirota teško živlenje imela. Bar neko.
– Bum, bum, bum! Sinek, bum pričakala da svet ozdravi, a, kam mi se žuri?
Nesem štela detetu pokazati kak mi je teško i žal. Senje buju ostale samo senje. Ni prva ni zajna, Ifkica ko Ifkica, zna gda gubi. Štela sem prekleti staru lesu, a onda se setim da smo lepu i novu od inoxa naredili! Več gda takvu delaju vsi v selu, nesmo ni mi za hititi. Ni otpisani! Drugi te otpišu ak se sam otpišeš. Kak god stari bili, još idemo naprvo. Bu se kupcu lepše vidlo dvorišče, na sveto nigdarjevo!
foto: Đurđa Vukelić Rožić