ŠTORIJE IZ MALOG MISTA
piše: Jadran Šantić Šangarelo
Davno kad san bija dite puno san se igra oko mora. Stalno san bi na mulu stivava morske piljčiće, baciva i u more pravija kola na morskoj površini, lovija sa trstikon oli tunjon glamce, babice, špariće a zna san dikod ulovit i lipega arkaja, oli kakvega ciplića ma znala se bogami zajebat i orada, a da ne govorin o malin fratriman, kneziman, pirkan oli kanjciman.
Sve san ja to nosi mojon Noni i ona bi ako je bilo obilata lova frigala na maslinovon uju, a ako je bilo mižerjasto skuvala bi brudetić sa puron …ma na svoj neretvanski način sa juton paprikon, jerbo je moja pokojna Nona bila iz Opuzena Parmačuša.
Kako mi u to vrime nismo jemali kajić …uvik san zamišlja …jo bože da mi je sada odit sa mojin pokojnin Nonoton na …ribe bija bi najsritnije dite na svitu.
Ma za belaja ni Nona a ni kajića. Sićan se da smo jemali jednega susida koji je uvik bi graintav i uvik se kara sa svakin, i to ne za ozbiljno, vengo za pizdarije.
I kad san malo naresta jedno lito ja ti se okurađan i gren ja pitat našega grintavega susida koji je krpi mrižu na mulu …mogu li ja sa njin diko na more. Približin se ja njemu sa leđa i pun straja počnen sa njin razgovor.
-Evala šjor Toni kakve ste voje danas?
A on se ošerva na moju stranu i priko brka i lule (koju je uvik jema u justa a mislin da je sa njon i spava) pogleda me i lipo mirno …o to si ti Jadro kako ti je Nona?
Ja se inkanta jerbo san očekiva barufu …ma odma san se snaša i ja njemu …je bome dobro je i fala će ste pitali.
Gleda on mene i miri me i opet lipo …ma znan ja da ti nisi doša onako a bome lipo su te odgojili ajde pucaj pitaj ća si tija. A ja se okuraža i gren na prvi balun
…ma znate šjor Toni ja van jako volin lovit ribu i diko bi volija kad bi moga sa van na more. Bit ću miran i sve ču vas slušat samo da mi je odit ulovit za moju Nonu koji lipi bokun ribe.
Gleda on mene, a bome i ja gledan njega i ne bojin se jerbo mi je on da korađa i poslin nekoliko minuti koji su se meni činili ka dani …rokne on nako priko lule …hm dobro a jemaš li ti arte?
Ja se odma snaša i ka iz topa jeman dvi tri tunje sa malin udican, a sa većin i debjon krenon niman jerbo nimamo pinez za kupit.
Gleda on mene i nasmije se …evo vako čemo nas dva: Ti češ svaki dan kad ja gren na more odit sa menon ako te tvoja Nona Ivka pusti …i da znaš …nima u mene trte mrte triba sve slušat oprat kajić poslin lova, a ča se tiće ješke to je moja briga …moreli? …pita on mene. A ja osta ka inkantan i gledan a ne virujen …pa judi ovo je niki puno dragi čovik ni to zvir ka ća pričaju… ajme odma san se zajubi u njega ka da je moj pokojni Nono.
I sutra dan gremo mi na ribe. Moja stara Nona me probudila uzoru, a ja san misli da nisan ni zaspa. Govori ona …ajde dite žvelto šjor Toni te čeka na mulu.
Ni mi tribalo dva puta reć …izleti sa ka roketa i u jedno malu boršetu o stare Nonine traverše nosija san moje tunje. Ja na mul i ka iz topa …dobro jutro šjor Toni evo me nadan se da se ne jidite ća ste me čekali ..a on nako mrk …a jesi li popija bilu kafu oli čaj?
Mislin se ja će ču reč …ma najboje je ne lagat i odgovorin …nisan jerbo Nona ni jemala.
–Zna san ja dite i zato san vazeja zame i zate ajde evo ti čikara i lipo se napij čaja to ti je sparičala moja Mandina.
Odveza ja cime i mi lipo partili. Grijen ja ruke na čikaru o čaja i pitan … a šjor Toni o čega je ovi čaj jako je lip i lipo vonja? …a on meni …e vidiš da moja Mandina zna ča je dobar čaj i to ti je o kor o menduli to ti je jako zdravo! Vozimo se mi a šjor Toni najedanput grune ka iz topa …evo ovod čemo namistit samolovke na zubace a malo daje čemo na tunju ti i ja lovit sve ča se uvati.
Lovili mi skoro cili dan, a kako san ja izletija iz kuće bez kore kruva počela me mučit glad.
Vidija san ja da me šjor Toni priko oka snima ma nisan zna zašto. Negdi poza podne govori on meni …ajde Jadro daj tu boršu ispo prove moramo i mi ništo izist jerbo če nas ubit debuleca.
Izvadin ja boršu a on počne vadit …fritule koje je šjora Mandina zame napravila pa lipi domaći kruv namazan sa masti i posut sa soli i crvenon paprikon . Jo bože ča san se nakusa. Nisan ni gleda ča ćini šjor Toni a on bome sav važan grmi …ajde jesi li moramo vadit samolovke jerbo će nan ugori sve izist.
Ti dan neču nikad zaboravit, jerbo san mojon Noni doni lipe ribe ća smo na tunju ulovili, a i šjor Toni mi je da ka nagradu jednega malega zubonju, jerbo san kajič lipo opra, složija konope i dobro veza cime.
Kad san doša doma nisan o sriče zna ča ću sve Noni ispripovidit i nafalit se kako san Šjor Tona sluša cili dan. Pozatin danon stalno san priko lita odija sa tin dragin čovikon na more, a i priko godine san isto odija kad san moga od skule.
Nikada mi nije bilo jasno zašto su se judi njega bojali, a meni se činija jako drag i volija bi da nije poslin par godin umra ka moj Nono. Jako san bija tužan ma i danas se često sitin onega čaja o kor o menduli ka da i sada grijen ruke na onoj čikari.
Fala in šjor Toni ća ste mi ditinjstvo učinili lipšin nego ča je moglo bit i dovidova van.