PAMETNU DOSTA

piše: Jadran Šantić Šangarelo
Čitajući zadnji put moju kolumnu di san kritizira s razlogon onega veleuvaženog ultra desno orjentiranega biskupa Košića i repliku onega  Višanina bi san odluči više se ne pačat u pulitiku.

A e, poslin svi ovi tumbuli oko minjanja partneri za sastavjanje vlasti ka šporki mudanat o govan nemore se ostat sa bande a posebno kad se ponovo sa svojin drvjen i kamenjen oglasi moj dobri biskup sisački šjor Vlade Košić koji je jopet napa „komuniste“ i livu gospodu. Volija bi sad čut onega Višanina koji mu je sad komentar na biskupove izjave.

Ma da se vratin na prvu temu. Judi moji nisan ja baš puno pametan ma isto jeman u ovi 66 godin puno utakmic u nogan pa vezano za to dikod znan sparit dva i dva i dobit parvu sliku koliko je to.

Pojavon onega lipuškastega mladega Petrova i njegovin dolaskon na scenu u Metkoviču odma san pripostavi da je ti mladi dotur za možjane iskočija iz kužine štovanoga barba Luke vječnega vladara Neretvanske doline i njezinog a jučer, danas i sutra. Eee veliki je to igrač a još veči kuvar kad triba dobro zamutit juvu a da se nezna o čega je mutna. Sve ča se posli događalo imalo je i svoj normalni slid jerbo je glavni lutak bija dobro diriđan konciman koje je iz duboke sjene potiza nepoznat a dobar spletkar.

Možda i grišin dušu, možda barba Luka sa tin nima veze ma jopet ….hm. Svi oni koji su virovali Petrovu i uzimjali njegove izjave bez rizerve nisu gledali daje od nosa. Štartati sa idejon o stvaranju  tripartitne vlade od ovi igrači koji su juti neprijateji  i koji bi jedni drugima krvi se napili more samo psihijatar, a kakvi su oni pulitički mešetari znamo iz bliže povjesti pa se tako odma tribalo postavit sa sumnjon u realizaciju te sulude ideje.

No mali meštar Božo sa nečijin dubokoumnin vodstvon i smislon za spletkarenje dobro je balansira na konopu koji je zategnija oko vrata koalicije Hrvatska raste a isto tako je pro forma drža i oko vrata zategnut konop sa laškanin gropon oko vrata Domojubne koalicije. Kako su se ovi koprcali nako su ispo nji ispadali manji igrači koji su mislili da če oni ka miši vodit kolo. Malo sutra.

Naša vrla prisidnica poslin prvi vrludanja u izjavaman kome če dat mandat nikako se u zanju primirila i uz savjete veliki stručnjakov o prava čekala u busiji da se formira većina od Domojubne koalicije koju vodi njezin šef šjor Karamarko i Mosta ča se na kraju i dogodilo.

Ma zamislite koji je to bi prikriveni špijunski operacijun vrbovanja zastupnikov Mosta i to pri samomen cilju pregovori između Hrvatske raste i Mosta. Očevidno je da su naivni SDP-ovci uletili ka grlon u jagode u postavjenu trapulu i sa prstiman u medu su ji čapali specijalci šjor Karamarka i šjor Vase i svitu obznanili tu šporku i sramotnu rabotu. Ma isto je ovo ne melo vengo puno prozirno i nategnuto pa nisu ni ovi u SDP diletanti da bi sebe uvalili u govna. Mislin da je  ipak  to prava mučka pripadnikov našega obavještajnega  podzemja a more se samo pritpostavit ko mu zapovida.

Bome odma je došlo do priokreta i HDZ je uskoči u feratu koja je ekspresno posebnin puten sa vlakovođom Petrovin priko Mosta uletila do prisidnice da jon dadu na kartu saborsku većinu. I sad pazi ka munja sa neba bljesne biskup Košić i prospe sve moguće uvride po SDP-u i onemu bidnome Milanoviću koji se da navuć na tanak led.

Da je sve ono istina ča je istresa  biskup Košić u svojoj velevažnoj izjavi zar bi duovnik i pastir triba bacat samo šporko drvje i kamenje i sa zmijskin jezikon udrit po judiman kojiman je on razumi se smrtni neprijatej. Mislin da je on sramota za crikvu u Hrvata. Zna se i do sada iz njegovi izjav da nije sam na toj ideji djelovanja i to se zna jerbo nikad ni dobi nikakvu packu od svoga šefa Bozanića. Ja isto mislin da bi tribalo svetemu ocu poslat befel o njemu i reč  kakvoj opciji vrli naš biskup pripada.

I da se vratin na ono prvo ko je bi kuvar i iz čije je kužine ispala ova mučkalica sigurno se nikad neče doznat ma uvik će živit javne sumnje i pusta ulična naklapanja a oni o kome je rič lipo če sidit u svojoj fotelji likovat i uživat plodove svoje mučke.

A sad se  mali Božo  more slobodno vratit u svoj Metković ovi put bez straja o posljedic  jerbo je izvojeva pirovu pobjedu a ja  san bi čuja da mu se ne triba vraćat doma bez saveza sa strankon Zna se.

U interesu Hrvaskega naroda želin sriću novoj vladi i daj bože ba nas izvuku iz govan. Ma odma kad pomislin na sve marčapije koje su se događale za vrime vladavine stranke Zna se i njiovi premijeri i ministri odma me oko srca stega led.

Bilo bi lipo da me buduća događanja demantiraju a koristin ovu prigodu da vrlomen biskupu zaželin dobro zdravje i da mu dragi Bog razbistri možjane a da mu jazik ispere žestokon  lušijon od šporki riči i riči mržnje.

Eto toliko dragi štoci pozdravja vas vaš morski čovik Šangarelo.