ŠTORIJE IZ MALOG MISTA
piše: Jadran Šantić Šangarelo
Kažu oni stari, stariji o mene da se ritko kad u životu moredu stvorit prijatejstva između čovika i divje beštije.
Ma ja ču van ode spjegat jednu štoriju koja to baš i ne priznaje. Pri neki 6-7 miseci, jedno jutro puno nevere i jakega juga …izajden na teracu vidit jeli pada jerbo san gluv pa ne čujen kako kapje tučedu …kad na teraci sa jednin obišenin krilon skupjen u kantunu mladi galeb.
Gledan ja njega ma bome gleda i on mene i tako dok smo se mirkali zekrešti on ništo prema meni.
Ma kako na more puno puti zoven galebe da in bacin kojega čućina …i ja san naući kliktat ka i galeb …i ja bome zaklikćen prema njemu.
More bit da se galeb izbleušija kad me je čuja i ništo otvara kjun i vrti glavon, pa me fišo gleda u oči. Kako kiša zna na teracu nabacivat i do po terace …mislin se kako ću mu niku škatulu u butigu nač pa ga uselit u nju.
Krenen ja prema njemu, a on jadan sa onin obišenin krilon po pločican začeprja i vidin ja da ne more letit. Oden ja u butigu i prošetan do peškarije kad tamo moja prijatejica Jadre iz Splita ka prava peškaruša, ća i je, prodaje ribu.
Gledan ja ča jema i govorin daj mi 3-4 malešna molića i po kila srdel tribaju mi za naranit galeba. A na to moje naranit galeba svi udru u smij ma koji galeb, di galeb, ča galeb ….i ja in lipo ispripovidin ka i van sve o galebu.
Vratin se ja doma sa lipo škatulon o banan i tin molićiman …pa za provu baci prema galebu jednega molića. Gleda on a ja stari pokvarenjak baci san mu po metra daje njega da vidin oče li straj oli glad bit jači.
Uđen ja u kužinu skuvan kafu i gren čitat novine a sve priko oka gledan na teracu.
I bogami poza niki po ure …okurađa se galebić …došeta do molića i ap u dva poteza ga proguta. Bravo mali drukan zate i bacin ja još jednega pa posli nikoga vrimena još jednega i on ti to sve lipo pokusa .
Ma sad ga triba stavit u onu škatulu koju san doni doma i na dno stavija jarpu stari novin da jo mogu vadid kad ti moj galebić učini potribu.
Ma e ja prema njemu a on ispo stola, ja ispo stola, a on ispo roštilja i tu san ga zaskočija. Kad san ga vazeja u ruke drča je ka šibica na vitru, a ja mu lipo šapjen neću ti ništa blento vengo te stavit u suvo da ti bude boje, a moran ti i krilo prigledat.
Bija bi on mene cilega iščipa sa kjunon da nisan bi spretan, jedva san mu uspija vidit pod krilo …kad tamo san …jema ča i vidit zabola mu se nečija varalica za lignje… i bogami je on sam tija izvuč ma ni moga i dobro se ruvina.
Na jedvite jade san otkačija varalicu i lipon rakijon mu prolija ranu i na jedvite jade ga utira u onu škatulu o banan koju san pokrija a kako ona jema rupe na sebi znan da se ni moga udavit.
Jopet san ga dva puta priko dana naranija kroz bužu na poklopcu o škatule i tako san ga tetošija i ranija cili šetemanu.
Jedno jutro, a bilo je malo u burinu, skinen ja poklopac o škatule, bacin 4-5 srdel na teracu isprid škatule i maknen se u kužinu. Gleda galebić priko škatule, istegne se, zamlati lipo sa oba krila, iskoći iz škatule i bome izi jednu po jednu srdelu. Dođen ja na vrata o kužine a on me gleda veslo zaklikće i skoči na pašaman o terace, tako je sta par minuti, gleda livo pa desno i ode.
Ajde, mislin ja, ućini san dobro dilo i sutra ujutro gren na ribe sa kajićon pa po onoj mojoj užani …kad uvatin oni smrad o čučina …klikćen ja i odma se stvoru dva, tri galeba.
Malo san se bi izgubi u svojin misliman i nisan ni vidi da mi kraj kajića lipo na more kontra kurenta pliva galebić. Bacin mu ja na provu, za vidit jeli to stvarno oni moj, jednega arbunića …i bogami uzleti on, ućini đir u ariju i lipo aterira na provu, zgrabi arbunića, u dva zalogaja ga proguta i lipo zamlati kriliman ma ne gre sa broda.
Družili smo se sve dok nisan parti doma, ma kad san upali motor on je poletija a ja san lipo do porta mislija jo če je to pametna beštija. Svratin ja u Malo misto na travaricu i poza tin gren doma ma kad san doša doma jeman ča i vidit galebić lipo stoji na pašaman o terace a ispo njega lipa jarpa govan, more bit da je sve o moje ribe ća san mu dava. Ajde mislin se ja kumpanjo …evo ti još jedna bukva i aj ća, leti, lovi, nima više u mene manjamukte.
Ma kako san zaboravija onu škatulu bacit vratin se ja poslin desetak minuti na teracu a moj ti galebić u škatuli i gleda me ka da bi mi reka a čaje ti si mi napravi gnjizdo. Pustin ga ja i sve gledan kroz caklo o vrat ča on čini, nećete mi virovat, počeja je novine čupat sa kjunon i stivavat podase ka da pravi gnjizdo.
Pustin ga ja a moja draga žena, ka i svaka kojon je čistoča na prvo misto, meni šćeto neto u glavu ako će ti galeb bit ka postanar, na spavanje, na rani i piću, more ma nemoren ja a i neću prat teracu o njegovi govan.
Vidin ja di to vodi bogami neću ja sebe zajebavat sa njegovin govniman i mislin se kad poleti ja ču škatulu u škovace pa čemo vidit ko če koga zajebavat. Vratija se on opet na pašaman ma san ga mora potirat i tako pet šest puti dok ni svatija da je na teraci nepoželjan ma zato smo se to cilo lito družili na more.
Kad je lito završilo izvadija san brod vanka u dvor i partija u Zagreb baš san kurjož oćemo li se dogodine nač nas dva kumpanja . Eto moji lipi i dragi štioci i ovon prilikon vas pozdravja vaš morski čovik Šangarelo.