piše: Jadran Šantić Šangarelo
Evo judi moji počela je jesen naveliko, ma jopet više unutra u zemji a manje u nas na more u prilipu Dalmaciju. Naglo je pala fibra jerbo bura puše sve u šesnaest pa je i na more ružno odit jerbo kad si na more moraš se i skvasit a bogami ni lipo u ove moje godine od mokre robe i bure zepst u brodu za ulovit kil dva ribe.
Kako je takva situacija najboje je lipo doma na teracu okrenutu jugu čićat sunce i štit foje da bi se barenko malo boje informira ča se dogaja među sviton.
Jo judi moji koje su to berekinade i to ne samo u kurbu pulitiku vengo i meju judiman kulturnjaciman pa i oniman koji nan dicu učidu na fakultetiman.
Evo tija san van počet sa ton dicon ča su študenti. Poskupili su jin domovi a i ona bolesnička spiza u menzaman od koje se nemore umrit ma bogami se nemore ni udebjat a ko more po cile dane i noću lupat po librima i svon forcon duperat možjane ako si debul.
Ja se sićan da su študentskoj menzi u Zagreb u Savsku ulicu uvik jemali lipe velike pašte a cine su bile mizerne a kako je danas neznan jerbo nisan bi na te pašte jema barenko 30 godin. Je kažu odgovorni da je spiza poskupila 2,10 kun i da to ni puno ma kad se to sve skonta za misec dan ni ni malo.
Evo čitan jutros u našu Slobodnu Dalmaciju da se študenti u Split bunidu jerbo više odavna ni študentske menze u centru Splita a bila je jako dobra i sa spizon su študenti bili jako kuntenti, očeli se ponovi oni indeks otvorit samo nebo zna jerbo u nas danas nima pinez za ništa.
Evo konačno je jutros nikomen palo na možjane ideja da bi teatar u Split triba dobit ime velikega kompozitora Spliske glazbene zvizde pokojnega šjor IVE TIJARDOVIĆA. Fala gospi o zdravja čija je crikva priko puta teatra jerbo mislin da je i ona jemala upliva u nečije možjane pa se rodila ta ideja.
Ma jopet mislin da če bit i oni koji će nać čakod kontra pokojnega meštra i eto ti belaja i škandala. Ja gospe moja nerazumin ovi naš nikad zadovojan svit u Splitu ka da nas je pokojni Smoje ( bog mu da pokoj ) ureka kad je reka ludi grad triba ga prolit petrojon i užgat jerbo u njemu ništa ne vridi.
Jedna me novost malo izblesirala, a to je da ovi DIV oliti njegov gazda ča je kupi veliki Spliski škver oće kupit škver u Riku ma mu ga Obersnel oni doživotni poteštat neda. Svaka čast šjor Obersnelu ma ako čovik jema pinez i oče škver zašto mu ga ne prodat i da judi sutra jemadu redovne bušte a ne da radidu bez plače. Ja ovod ništa ne razumin.
E a sad bi se malo nevojko taka i kurbe pulitike jerbo meni a i sviman nama ona kroji budući život i sustavno nas jebe u možjane. Oni Lex Perković me je spizdi do kraja da san tija otić sa mora par dan u Zagreb i oniman u vlasti istrest u brk sve ča ji iđe pa neka se onda jebu. Ma jopet ko če slušat starega čovika a ne bi me ni policjoti pustili i tako se cila Evropa čudila Milanoviću i njegovoj tvrdoglavosti ka dalmatinskemu tovaru i niko ni zna ča on oče. Stislo nas je sa svi stran i na jedvite jade su izglasali promine ma ugled smo izgubili i kako će nan svit više virovat i stat na našu bandu kad smo se pokazali ka narod bez karaktera i rići ka da smo svi potomci bivše Mletačke i Dubrovačke pulitike zajedno. Ajte k vragu svi vi na vlasti i vaša pokvarena i dvolična pulitika koja je kontra naroda i državni interesi, a bome nisan ni razumi koji su to njiovi interesi bili u pitanju osin vlastite gluposti.
Sviman nan je poznato da naš „dični“ bivši premijer na sudu odgovara i za mito koje je primi od onega potomka Kuena Hedervarija Zoltana kako bi se Mađarski MOL dočepa naše INE ma iza tega Zoltana stoji njegova vlada i premijer pa mi moremo otrat guzicu sa našin uhidbenin nalogon i to sa onin na rvackomen a i sa onin na ingleškome i moremo mu lipo stavit soli na rep a ča če bit sa INON o temu ćemo moć lipo čitat u foje.
Jutros u najnovijoj Slobodnoj čitan da se u Kozici malešnomen selu na vrju Bijakova slavilo osnivanje XI Dalmatinske udarne brigade iz 1942. god i da je tamo prešidente o antifašisti cile Dalmacije šjor Krešo Sršen a koga bome dobro znan u vidu isprike za zločine koje su na tomen području učinili partizani zatraži i oprost od naroda tega kraja.
Je malo ma nikad ni kasno a i časno je priznat greške ma šjor Krešo se ispriča za zločine koje ni on napravi niti je u temu učestvova jerbo on ni bi u drugemu ratu vengo su to učinili razbojnici koji je bilo i meju poštenin partizaniman. Njemu se prikjući i gradonačelnik Vrgorca šjor Matković iz HDZ-a koji se isto ošerva na junački doprinos te brigade u borbi proti fašisti i domaći izdajnikov ma su ga odma njegovi popjucali i izvriđali, kurbin sin kako more lipo govorit o razbojnicaman koji su na temu području ubivali i klali domaći svit pa i jednega mladega fratra. Brže boje su istaknili da to ni mišjenje HDZ-a vengo njegovo privatno.
Ma judi moji doklen ćemo pribirat kosti i live i desne pa zar ni vrime da se zakopaju klice mržnje i netrpejivosti zašto da danas mene mrzi susid jerbo su moji bili svi u partizane a njegovi domobrani joli ustaše kad mi dva nismo o temu ni luk ili ni mirisali vengo se lipo stimajemo, dica nan se druže a mi znamo i dobru spizu zajedno sparićat i izist uz obavezno blagovanje u dobremu vinu i to obavezno crnemu.
Ja san da se jednon za svagda javno reče i ozbiljno napiše zločina je bilo i na jednoj i na drugoj strani ma kad gledamo antifašisti su dobili drugi rat,vratili Istru Dalmaciji i otoke matici zemji pa je unda i pošteno to istaknit, a isto je i pošteno istaknit ko je proda dil naše lipe domovine i ko je učinija konc logore i masovno ubiva i svoje i da tu štorija jednon za uvik stane a da povisničari uistinu utvrdu sve fakte i da to buduća dičica učidu u skule na satiman o povjesti ka pravu istinu o prošlin vrimeniman.
Eto dragi moji štioci malo san se od svega umori pa vas lipo pozdravjan. Živi i veseli bili!
Vaš morski čovik Šangarelo